គណ​បក្ស​​ប្រជាជន​​កម្ពុជា​៖ ​«​ខ្លួន​មាន​​សន្លឹក​​បៀរ​ច្រើន​ សម្រាប់​​លេង​»​

01-05-2018 11:51 am 2665
​អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥសាន

​មុន​ការបោះឆ្នោត អាណត្តិ​ទី​៦ ចូល​មកដល់ គណបក្ស​ប្រជាជន​កម្ពុជា អះអាងថា គណបក្ស​ខ្លួន​មាន​សន្លឹក​បៀរ​ច្រើន​សន្លឹក សម្រាប់​ប្រកួត​។ សន្លឹក​បៀរ​នេះ គឺ​សំដៅ​ទៅលើ​ស្នាដៃ និង សមិទ្ធផល​នានា​ក្នុង​ការដឹកនាំ​ប្រទេស​កម្ពុជា​។ ការលើកឡើង​នេះ ដើម្បី​ឆ្លើយតប​នឹង​ក្តីបារម្ភ​របស់​គណបក្ស​ប្រជាធិបតេយ្យ​មូលដ្ឋាន​។

​អ្នកនាំពាក្យ​គណបក្ស​ប្រជាធិបតេយ្យមូលដ្ឋាននៅថ្ងៃ​ទី​០១ ខែឧសភា​នេះ បានបង្ហាញ​ភាពលំបាក ក្នុងការ​ទស្សន៍ទាយ​ពី​ការ​ប្រាស់​ប្រើ​សន្លឹក​បៀរ​របស់​គណបក្ស​ប្រជាជន​កម្ពុជា ដែលជា​គណបក្សកាន់អំណាច សម្រាប់​លេង ក្នុងន័យ​សំដៅលើ​ការប្រកួតប្រជែង ការបោះឆ្នោត​ថ្នាក់ជាតិ នៅ​ចុង​ខាង កក្កដា ឆ្នាំ​២០១៨​នេះ​។​

​អ្នកនាំពាក្យ​គណបក្ស​ប្រជាធិបតេយ្យ​មូលដ្ឋាន លោក សាម អ៊ី​ន បាន​លើកឡើងថា​«​គណបក្ស​ប្រជាជន​កម្ពុជា អាចមាន​សន្លឹក​បៀរ​ច្រើន​សន្លឹក សម្រាប់​លេង ហើយ​យើង​ពិបាក​ទស្សន៍ទាយ​ថា គាត់​នឹង​ប្រើ​សន្លឹក​បៀរ​ណាមួយ នៅពេលណា សម្រាប់​លេង​»​។

​តែ​យ៉ាងណាក្តី លោក សាម អ៊ី​ន បញ្ជាក់ថា គណបក្ស​ប្រជាធិបតេយ្យ​មូលដ្ឋាន មាន​សន្លឹក​បៀរ​តែ​៤​ទេ សម្រាប់​លេង  ឬ​សម្រាប់​ប្រកួត​គឺ សន្លឹក​ទី​១៖ គុណ​តម្លៃ​ខ្ពស់ សំដៅលើ​សាមគ្គីភាព យុត្តិធម៌ អហិង្សា​។​សន្លឹក​ទី​២៖ គោលបំណង​ល្អ​គឺ ប្រជាពលរដ្ឋ​រស់នៅ​ថ្លៃថ្នូរ និង​ប្រទេសជាតិ មាន​អធិបតេយ្យ​ពេល​លេញ​។ សន្លឹក​ទី​៣៖ គោលការណ៍​ប្រជាធិបតេយ្យ​ផ្ទៃក្នុង និង សន្លឹក​ទី​៤៖ គោលនយោបាយ​សមស្រប​(​ស​៥) មាន​៖ សេដ្ឋកិច្ច សុខាភិបាល សិក្សាធិការ យុវជន និង សង្គមកិច្ច​។​

​អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥសាន បាន​អះអាងថា គណបក្ស​ប្រជាជន​កម្ពុជា ពិតជា​មាន​សន្លឹក​បៀរ សម្រាប់​លេង​ច្រើន​មែន​។ សន្លឹក​បៀរ​នេះ គឺ​លោក​សំដៅ​ទៅលើ​ស្នាដៃ និង សមិទ្ធផល​នានា ក្រោម​ការដឹកនាំ​របស់​បក្ស​ប្រជាជន អស់​រយៈពេល​ជាច្រើន​ឆ្នាំ​មក​។​បើតាម​លោក សុខ ឥសាន សង្កត់ធ្ងន់ថា ក្រោម​ការដឹកនាំ​របស់​បក្ស​ប្រជាជន ប្រទេសជាតិ មាន​សុខសន្តិភាព​ពេញលេញ បាន​ផ្តល់ឱកាស​ដល់​ការអភិវឌ្ឍ និង រីកចំរើន​ដូច​សព្វថ្ងៃ​។​

​សំឡេង​៖

​គួរ​បញ្ជាក់ថា រដ្ឋាភិបាល​កម្ពុជា បាន​សម្រេចយក​ថ្ងៃអាទិត្យ​ទី ២៩ ខែកក្កដា ឆ្នាំ​២០១៨ ជា​កាលបរិច្ឆេទ​នៃ​ការបោះឆ្នោត ជ្រើសតាំង​តំណាងរាស្ត្រ សម្រាប់​នីតិកាល​ទី​៦​នៃ​រដ្ឋសភា ស្របតាម​ច្បាប់​ស្តីពី​ការរៀបចំ​បោះឆ្នោត​។ នៅ​ថ្ងៃទី​៣០​មេសា គ​.​ជ​.​ប​. បានចាប់ផ្តើម​ទទួល​ចុះឈ្មោះ​គណបក្សនយោបាយ និង បញ្ជី​បេក្ខជន​ឈរឈ្មោះ​បោះឆ្នោត​តំណាងរាស្ត្រ​នីតិកាល​ទី​៦​។ នៅ​ថ្ងៃ​ផ្តើមដំបូង​នេះ គណបក្ស​ប្រជាជន​កម្ពុជា ដែល​កំពុង​ដឹកនាំ​រដ្ឋាភិបាល​បច្ចុប្បន្ន និង​គណបក្ស​យុវជន​កម្ពុជា បាន​ទៅ​ចុះឈ្មោះ​មុនគេ​។​

​រីឯ​គណបក្ស​ប្រជាធិបតេយ្យ​មូលដ្ឋាន បានបញ្ជាក់​ជំហ​រថា នឹងចូលរួម​ការបោះឆ្នោត​ជ្រើសតាំង​តំណាងរាស្ត្រ​នាពេល​ខាងមុខនេះ​។ ក៏ប៉ុន្តែ​គណបក្ស​មួយ​នេះ​ថា អាច​នឹង​ដកខ្លួន​វិញ​ក្នុងករណី មិនមាន​ការសម្រួល​ដល់ ការលើក​ស្លាក​គណ​កប្ស ការរំខាន​ក្នុង​ការធ្វើសកម្មភាព​ជួបជុំ​អ្នកគាំទ្រ​ជាដើម​៕

 


ព័ត៌មានផ្សេងទៀត