លោក​ហ៊ុន ម៉ា​នី​៖ គ្រឿង​ឥស្សរិយយស Padma Shri មិនមែន​សម្រាប់​ខ្ញុំ​ម្នាក់ឯង​ទេ​

04-04-2018 10:35 am 1080

ក្រោយ​ត្រឡប់​ពី​ទទួល​គ្រឿង​ឥស្សរិយយស Padma Shri ពី​ប្រទេស​ឥណ្ឌា លោក​ហ៊ុន ម៉ា​នី តំណាងរាស្ត្រ​វ័យក្មេង និង​ជា​ប្រធាន​សហភាព​សហព័ន្ធ​យុវជន​កម្ពុជា បាន​មានប្រសាសន៍ថា គ្រឿង​ឥស្សរិយយស​នេះ មិនមែន​តែ​សម្រាប់​រូប​លោក​ម្នាក់ឯង​នោះទេ ប៉ុន្តែ​គឺ​សម្រាប់​ប្រជាជន​កម្ពុជា​ទាំងមូល​។​

​ថ្លែង​នៅ​លើ​បណ្តាញ​សង្គម​ហ្វេ​សប៊ុក លោក​ហ៊ុន ម៉ា​នី បាន​សរសេរ​រៀបរាប់ យ៉ាង​ដូច្នេះ​ថា 

​គ្រឿងឥស្សរយស PADMA SHRI៖ គឺជា​គ្រឿងឥស្សរយស ដែល​ខ្ញុំ​មាន​កិត្តិយស​ទទួលបាន តាង​នាម​ឲ្យ​កម្ពុជា គឺជា​គ្រឿងឥស្សរយស ដែល​មិន​មាន​ផ្តល់ឲ្យ ហ៊ុន ម៉ា​នី តែ​ម្នាក់​ឯង​នោះ​ទេ ប៉ុន្តែ​គឺជា​គ្រឿងឥស្សរយស ដែល​តំណាងឲ្យ​ការបូជា​លះបង់​, ការ​តាំងចិត្ត​, ការខិតខំ​មិន​ខ្លាច​នឿយហត់​រាប់មិនអស់​របស់​ប្រជាជន​កម្ពុជា​ជាច្រើន​នាក់​ពី​ជំនាន់​មុន​, របស់​ថ្នាក់ដឹកនាំ​នាពេល​បច្ចុប្បន្ន និង​កិច្ចប្រឹងប្រែង​មិន​អាច​គណនា​បាន​របស់​ជនកម្ពុជា​ទាំងឡាយណា ដែល​បាន​នាំ និង​ប្រែក្លាយ​កម្ពុជា​ជាទី​ស្រឡាញ់រ​បស់​យើងទាំងអស់គ្នា ពី​ឋានៈ​ជា​ប្រទេស​ដែល​ធ្លាប់​ហែកហួរ​ដោយ​សង្គ្រាម ពី​អំពើ​ប្រល័យ​ពូជសាសន៍ និង​ការលំបាក​ផងទាំងពួង​, ពី​គំនរ​ផេះផង់ (​ពិសេស​នៅ​ទសវត្សរ៍​ឆ្នាំ ១៩៧០ ដល់ ឆ្នាំ ១៩៩០) ទៅ​ជា​ប្រទេស​មួយ​ដែល​មាន​ឯកភាព​ជាតិ​, សន្តិភាព​, ស្ថេរភាព​, វិបុលភាព ដ៏​រស់​រវើក និង​ប្រកបដោយ​ថាមភាព នៅ​ក្នុង​ក្រសែភ្នែក​របស់​ពិភពលោក​។ 

​ព្រះរាជាណាចក្រ​ជាទី​ស្រឡាញ់រ​បស់​យើងទាំងអស់គ្នា លែង​ជា​ប្រទេស​កម្ពុជា ដែល​អន្តរជាតិ​បាន​ស្គាល់​ត្រឹមតែ​អំពី​អំពើ​យង់ឃ្នង​ទៀតហើយ​។ កម្ពុជា​បច្ចុប្បន្ន​មាន​ជំហរ​ស្មើមុខស្មើមាត់ ប្រកបដោយ​សេចក្តីថ្លៃថ្នូរ របស់ខ្លួន ទន្ទឹមគ្នា​នឹង​ពិភពលោក​ទាំងមូល ក្នុងនាម​ជា​សមាជិក​មួយ​រូប​ប្រកបដោយ​ការទទួលខុសត្រូវ​នៃ​សហគមន៍​អន្តរជាតិ​។ 

​ជា​ប្រទេស​កម្ពុជា ដែល​យើង​ស្រឡាញ់​!

​ជា​ប្រទេស​កម្ពុជា ដែល​យើង​មាន​មោទនភាព​!

​កម្ពុជា​គឺជា​ផ្ទះ​ជម្រក​របស់​យើង​ជា​ដរាប​!

​ខ្ញុំ​ជឿជាក់​លើ​ជាតិ និង​ប្រជាជន​របស់​យើង​!

​ហើយ​យើង​ជឿជាក់ និង​វិនិយោគ​បន្ថែម​ក្នុង​ការធ្វើ​ឲ្យ​អនាគត កាន់តែ​ប្រសើរ​ជាង​បច្ចុប្បន្ន​ថែមទៀត សម្រាប់​អ្នក​ជំនាន់​ក្រោយ​របស់​យើងទាំងអស់គ្នា​” Padma Shri ​គឺជា​គ្រឿងឥស្សរយស​ខ្ពស់​បំផុត​ ដែល​ផ្តល់ជូន​ជន​ស៊ីវិល ពី​សំណាក់​ប្រធានាធិបតី​នៃ​សាធារណរដ្ឋ​ឥណ្ឌា​៕ ​

ព័ត៌មានផ្សេងទៀត