លោក​ខៀវ សុភ័គ​​៖ ករណី​ឃាតកម្ម​​លើ​ស្ត្រី​​ចេវ សុ​វឌ្ឍនា​ អាចពាក់ព័ន្ធ​​នឹង​​លោក​ឡាយ វណ្ណៈ ​

01-04-2018 9:33 am 5035
ស្ត្រីរងគ្រោះ ចេវ សុវឌ្ឍនា និងលោកឡាយ វណ្ណៈ អតីតអភិបាលខេត្តតាកែវ

​តាម​ការបញ្ជាក់​ពី​លោក ខៀវ សុភ័គ មន្ត្រីជាន់ខ្ពស់ និងជាអ្នកនាំពាក្យក្រសួងមហាផ្ទៃ ប្រាប់​ដល់​បណ្តាញ​ព័ត៌មាន​Fresh News កាលពី​យប់​ថ្ងៃទី​៣១ មីនា ថា ករណី​ឃាតកម្ម​លើ​ស្ត្រីរូប​ស្រស់​នៅ​ក្រុង​ដូន​កែវ ឈ្មោះ ចេវ សុ​វឌ្ឍនា អាច​ជាប់​ពាក់ព័ន្ធ​នឹង​លោក ឡាយ វណ្ណៈ អតីត​អភិបាលខេត្ត​តាកែវ​។ ប៉ុន្តែ​យ៉ាងណា នៅ​រង់ចាំ​លទ្ធផល​ពី​ស្ថាប័ន​តុលាការ​សិន​។​

​នៅ​យប់​ថ្ងៃទី​៣១ មីនា នេះ អតីត​អភិបាលខេត្ត​តាកែវ លោក​ឡាយ វណ្ណៈ តាមរយៈ​បណ្តាញ​សង្គម Facebook បាន​សារភាពថា លោក​ពិតជា​មាន​ទំនាក់ទំនង​ស្នេហា​ជាមួយ​អ្នកស្រី ចេវ សុ​វឌ្ឍនា នារី​ដែល​គេ​ប្រទះឃើញ​ស្លាប់​ក្នុង​រូបភាព​ចងក​ក្នុង​គេហដ្ឋាន​នៅ​ក្រុង​ដូន​កែវ​កាលពី​ខែមករា ឆ្នាំ​២០១៨​កន្លងទៅ ប្រាកដ​មែន​។ តែក្រោយមក ​លោក​បាន​សុំ​កាត់ផ្តាច់​ទំនាក់ទំនង​ជា​មួយ​គ្នា ជាហេតុធ្វើឲ្យ​អ្នកស្រី ចេវ សុ​វឌ្ឍនា គិត​ខ្លី​ធ្វើអត្តឃាដ​ខ្លួនឯង​។ លោក​ឡាយ វណ្ណៈ បដិសេដ​ទាំងស្រុង​នូវ​រាល់​ការចោទប្រកាន់​ដែលថា ​រូបលោក និង​បងប្រុស​លោក គឺ​លោក​ឡាយ ណា​រិទ្ធ ជាស្នងការរងនគរបាលខេត្តតាកែវ បានសម្លាប់​ស្ត្រីរងគ្រោះ ចេវ សុ​វឌ្ឍនា​។​

​តាម​របាយការណ៍​កម្លាំង​សមត្ថកិច្ច​បានឲ្យដឹងថា ជនសង្ស័យ​ពាក់ព័ន្ធ​ករណី​ឃាតកម្ម​ខាងលើ មាន ឈ្មោះ ចាន់ រី ភេទ ស្រី និង ប្តី ឈ្មោះ ជឹម វុ​ធ ជា​អ្នកបំរើ នៅផ្ទះ នាង​ចេវ សុ​ឌ្ឍ​នា , ឈ្មោះ មេន សម័យ អ្នកបើក ឡាន​ឲ្យ លោក​ឡាយ វណ្ណៈ និង ឈ្មោះ តាក់ រតនា ជា អ្នកបើក ឡាន ឲ្យ លោក ឡាយ ណា​រិទ្ធ គឺ របាយការណ៍ បាន​ចោទប្រកាន់ ពីបទ លាក់បាំង បទល្មើស មិន​រាយ​កាណ៍ឲ្យសមត្ថកិច្ច​៕

ព័ត៌មានផ្សេងទៀត