ស្ថាបនិក​​បក្ស​មូលដ្ឋាន ​បណ្តុះ​គំនិត​​កសាង​​ប្រជាធិបតេយ្យ​​បន្ត​ ទោះ​អវត្តមាន​​បក្ស​សង្គ្រោះ​ជាតិ​​

04-02-2018 4:12 pm 4174
  ស្តាប់
ស្តាប់ជាសំឡេង

​អត្ថបទ​ខ្លី​មួយ មាន​ចំណងជើង​ថា​«​ទង់​ប្រជាធិបតេយ្យ​សេរី​ពហុបក្ស​នៅ​កម្ពុជា​»​ជា​សហ​វណ្ណ​កម្ម​នៃ​ស្ថាបនិក​គណបក្ស​ប្រជាធិបតេយ្យ​មូលដ្ឋាន គឺ​លោក​យ៉ង សាំង​កុមារ និង​លោក​សាម អ៊ី​ន បាន​លើកទឹកចិត្ត​ពលរដ្ឋ​ជាង​៣​លាន​នាក់ ដែល​មានបំណង​ចង់​ផ្លាស់ប្តូរ​តាមបែប​ប្រជាធិបតេយ្យ តាមរយៈ​ផ្តល់​ការគាំទ្រ​ទៅលើ​គណបក្ស​សង្គ្រោះ​ជាតិ​។ ប៉ុន្តែ ពេលនេះ អ្នក​ទាំងនោះ​បែរជា​អស់សង្ឃឹម ដោយសារតែ​ការរំលាយ​គណបក្ស​សង្គ្រោះ​ជាតិ កាលពី​ថ្ងៃទី​១៦ វិច្ឆិកា ឆ្នាំ​២០១៧ កន្លងទៅ​។​

​លោក​យ៉ង សាំង​កុមារ និង​លោក​សាម អ៊ី​ន បាន​លើក​ពី ប្រវត្តិ​នៃ​ការកសាង​លទ្ធិប្រជាធិបតេយ្យ ងាក​ចេញពី​របប​សក្តិភូមិ កុម្មុយនីស្ត​និយម ឬ​អំណាច​ផ្តាច់ការ តែង​ជួបប្រទះ​នូវ​បញ្ហា​ប្រឈម​ជាច្រើន ហើយ​រឿង​បែបនេះ​ក៏​គ្មាន​ករណី​លើកលែង​ដែរ សម្រាប់​ដំណើរការ​កសាង​ប្រជាធិបតេយ្យ​នៅ​កម្ពុជា​។ 

​ពួកលោក​និយាយថា ប្រជាពលរដ្ឋ​ខ្មែរ​ភាគច្រើន​ដែល​មានក្តី​ប្រាថ្នា​ចង់ឃើញ​ការផ្លាស់ប្តូរ​តាមបែប​ប្រជាធិបតេយ្យ​សេរី​ពហុបក្ស​មាន​ការខកចិត្ត និង​អស់សង្ឃឹម​ជាខ្លាំង​ចំពោះ​ការរំលាយ​គណបក្ស​សង្គ្រោះ​ជាតិ​។ ប៉ុន្តែ ពួកលោក​ចោទ​ជា​សំណួ​រថា តើ​នេះ​ជា​វគ្គ​ចុងក្រោយ​នៃ​ដំណើរការ​កសាង​របប​នយោបាយ​ប្រជាធិបតេយ្យ​សេរី​ពហុបក្ស​នៅ​កម្ពុជា​ឬ​?

​ពួកលោក​បាន​ទាញ​អារម្មណ៍ ម្ចាស់ឆ្នោត ឲ្យ​ត្រឡប់មើល​ដំណើរការ​កសាង​ប្រជាធិបតេយ្យ​ចាប់តាំងពី​មាន​កិច្ចព្រមព្រៀង​សន្តិភាព​ទី​ក្រុងប៉ារីស​ឆ្នាំ ១៩៩១​។ ក្នុង​រយៈ ៥ ឆ្នាំ​ម្តង ចាប់តាំងពី​ឆ្នាំ ១៩៩៣ ដល់​បច្ចុប្បន្ន ដោយមាន​ការចូលរួម​ប្រកួតប្រជែង​ពី​គណបក្សនយោបាយ​ជាច្រើន និង​មាន​អ្នកសង្កេតការណ៍​ជាតិ និង​អន្តរជាតិ​ចូលរួម​តាមដាន​សង្កេតការណ៍ ហើយ​បរិយាកាស​នយោបាយ​ប្រកួតប្រជែង និង​ដំណើរការ​បោះឆ្នោត​មាន​ភាពប្រសើរឡើង​ពី​១ អាណត្តិ ទៅ ១ អាណត្តិ​។ 

​ពលរដ្ឋ​កម្ពុជា មើលឃើញ​អ្នកដឹកនាំ​នយោបាយ​សំខាន់ៗ ដែល​នៅមាន​ឥទ្ធិពល លើ​សង្វៀន​នយោបាយ​ខ្មែរ​បច្ចុប្បន្ន គឺ​លោក​នាយករដ្ឋមន្ត្រី​ហ៊ុន សែន លោក​សម រង្ស៊ី និង​លោក​កឹម សុខា​។ លោក​សម រង្ស៊ី និង​លោក​កឹម សុខា ជា​អ្នកដឹកនាំ​គណបក្ស​សង្គ្រោះ​ជាតិ បាន​បំពេញភារកិច្ច​យ៉ាង​លំបាក​យូរ​ឆ្នាំ ប្រឈម​នឹង​ហានិភ័យ​ខ្ពស់ ក្នុងការ​បំផុស​ប្រជាពលរដ្ឋ​ឲ្យ​យល់ដឹង និង​ប្រើប្រាស់​សិទ្ធិសេរីភាព​ពលរដ្ឋ ក្នុង​ការសម្ដែង​មតិ ការជួបជុំ​តវ៉ា​ដោយ​សន្តិវិធី និង​ការបោះឆ្នោត​។ តែ​គួរឲ្យ​សោកស្តាយ អ្នកដឹកនាំ​នយោបាយ​ដែលមាន​ឥទ្ធិពល​ទាំង ៣ រូប​គ្មាន​សមត្ថភាព​ធ្វើការ​រួមគ្នា គ្មាន​ទំនុកចិត្ត​លើ​គ្នា​ទៅវិញទៅមក និង​ខកខាន​ក្នុង​ការកសាង​មរតក​នៃ​ការរៀបចំ​ប្រព័ន្ធ​ប្រជាធិបតេយ្យ​ដ៏​ល្អ​មួយ​សម្រាប់​អ្នកជំនាន់ក្រោយ​។ ពួកគាត់​ទាំង ៣ រូប​បាន​បង្កើត​នយោបាយ​ប្រឈមមុខគ្នា​បែប​អវិជ្ជមាន បង្កទំនាស់​ស្រួចស្រាវ ឈានទៅ​រំលាយ​គណបក្ស​សង្គ្រោះ​ជាតិ ធ្វើឲ្យ​ដំណើរកសាង​លទ្ធិប្រជាធិបតេយ្យ​ធាក់​ថយក្រោយ និង​ប្រជាពលរដ្ឋ​អស់សង្ឃឹម​។​

​ប៉ុន្តែ យ៉ាងនេះ ក៏ដោយ ស្ថាបនិក​គណបក្ស​ប្រជាធិបតេយ្យ​ទាំងពីរ​ខាងលើ ថា​ការរំលាយ​គណបក្ស​សង្គ្រោះ​ជាតិ​មិនគួរ និង​មិន​ត្រូវជា​វគ្គ​ចុងក្រោយ នៃ​ដំណើរ​កសាង​លទ្ធិប្រជាធិបតេយ្យសេរី​ពហុបក្ស​នៅ​កម្ពុជា​ទេ​។ លោក​ថា គ្រាប់ពូជ​ប្រជាធិបតេយ្យ​ត្រូវបាន​សាប​ព្រួស ហើយ​ពន្លក​ស្រូវ​ក៏​លូតលាស់​ចេញ​ពណ៌​ខៀវស្រងាត់​ជា​បណ្តើរៗ​ដែរ ស្រាប់តែ​មួយ​រំពេច​នោះ មាន​ព្យុះកំ​ណា​ចមួយ​បោកបក់​យ៉ាងខ្លាំង ហើយ​នាំ​ទឹកជំនន់​ដ៏​ធំ​មួយ​មក​បំផ្លាញ​សំណាប​ទាំងស្រុង​។ តើ​យើង​ត្រូវ​អស់សង្ឃឹម ហើយ​សម្រេចចិត្ត​ឈប់​ធ្វើស្រែ​បន្តទៀត​? ឬ​ត្រូវ​សម្រេចចិត្ត​ចាប់ផ្តើម​សា​បប្រស់​ឡើងវិញ​? 

​ចម្លើយ​យ៉ាងខ្លី លោក​ទាំងពីរ លើកឡើងថា​«​យើង​មិនត្រូវ​អស់សង្ឃឹម​ទេ​។ យើង​ត្រូវ​បន្តដំណើរ​ទៅមុខទៀត​។ យើង​ត្រូវ​ចាត់ទុកថា ការកសាង​របប​ប្រជាធិបតេយ្យ​សេរី​ពហុបក្ស​នៅ​កម្ពុជា​ប្រៀបដូចជា​កីឡា​រត់​បណ្តាក់​»៕ 

ព័ត៌មានផ្សេងទៀត