អាមេរិក​បន្ទោស​​កូរ៉េខាងជើង​​រឿង​ប្រើ​​មេរោគ​​WannaCry​​វាយប្រហារ​​កុំព្យូទ័រ​

19-12-2017 11:26 am 510
កុំព្យូទ័រ​ដែលត្រូវមេរោគ​​WannaCryវាយប្រហារ

​សហរដ្ឋអាមេរិក​បាន​និយាយថា កូរ៉េខាងជើង​បានទទួល​ខុសត្រូវ​ដោយផ្ទាល់ សម្រាប់​ការវាយប្រហារ​តាម​ប្រព័ន្ធ​អ៊ី​ន​ធឺ​ណេត ដោយ​ប្រើប្រាស់​មេរោគ​WannaCry​។​ការវាយប្រហារ​នេះ​បាន​ធ្វើឲ្យប៉ះពាល់​ដល់​ទិន្នន័យ​មន្ទីរពេទ្យ ក្រុមហ៊ុន​ជំនួញ ធនាគារ និង​ក្រុមហ៊ុន​ផ្សេងៗ​ទៀត​ជាច្រើន​ទូទាំង​ពិភពលោក​កាលពីដើម​ឆ្នាំនេះ​។​មានការ​បញ្ជាក់ថា កូរ៉េខាងជើង​បាន​ប្រើ​មេរោគ​WannaCry វាយប្រហារ​កុំព្យូទ័រ​ជាង​៣០​ម៉ឺន​គ្រឿង​ក្នុងប្រទេស​១៥០ ធ្វើឲ្យ​ខាត​បង់ប្រាក់​រាប់ពាន់លាន​ដុល្លារ​។​

​លោក​Thomas Bossert ទីប្រឹក្សា​របស់លោក​ប្រធានាធិបតី​ដូណាល់ ត្រាំ បាន​ចោទប្រកាន់​ទៅលើ​កូរ៉េខាងជើង នៅក្នុង​កាសែត​Wall Street Journal​។​នេះ​ជា​លើកទីមួយ​ហើយ​ដែល​អាមេរិក​បាន​បន្ទោស​កូរ៉េខាងជើង​ជា​ផ្លូវការ ចំពោះ​ការចូល​ជ្រៀតជ្រែក​តាម​ប្រព័ន្ធ​អ៊ី​ន​ធឺ​ណេត​។​លោក​Bossert​និយាយថា ការចោទប្រកាន់​កូរ៉េខាងជើង​បាន ដោយ​ផ្អែកលើ​ភស្ដុតាង​គ្រប់គ្រាន់ ហើយ​ចក្រភព​អង់គ្លេស​និង​ក្រុមហ៊ុន​កុំព្យូទ័រ​Microsoft ក៏បាន​បន្ទោស​រដ្ឋាភិបាល​កូរ៉េខាងជើង​សម្រាប់​ការវាយប្រហារ​នេះដែរ​។​

​ក្នុង​ខែឧសភា​ឆ្នាំ​២០១៧ Windows​កុំព្យូទ័រ​ត្រូវ​រង​វាយប្រហារ​តាម​អ៊ី​ន​ធឺ​ណេត ដោយបាន​ចាក់សោ​មិនឲ្យ​ប្រើប្រាស់​បាន និង​ទាម​ទារឲ្យ​បង់​ប្រាក់​ជាថ្នូ​រនឹង​ការដោះដូរ​យក​ទិន្នន័យ​មកវិញ​។​អង្គភាព​ប៉ូលិស​អាំងទែ​ប៉ូល​សហភាព​អឺរ៉ុប បាន​ហៅ​ការវាយប្រហារ​នេះ​ថា​មិន​ធ្លាប់មាន​ទេ​ពីមុនមក​។​

​ក្នុងករណីនេះ លោក​Bossert​និយាយថា​កូរ៉េខាងជើង​ត្រូវតែមាន​ការទទួលខុសត្រូវ ហើយ​អាមេរិក​នឹង​បន្ដ​ប្រើ​យុទ្ធសាស្ដ្រ​ដាក់​សម្ពាធ​ជា​អតិបរមា ដើម្បី​រារាំង​សម្ថ​ភាព​របប​កូរ៉េខាងជើង ក្នុង​ការវាយប្រហារ​តាម​អ៊ី​ន​ធឺ​ណេត​។​ប៉ុន្ដែ​លោក​មិនបាន​បញ្ជាក់ថា​អាមេរិក​នឹង​ចាត់វិធានការ​អ្វី​ឆ្លើយតប​ទេ​។​

​សូមបញ្ជាក់ថា ប្រទេស​កូរ៉េខាងជើង​កំពុង​ប្រឈម​នឹង​ការដាក់​ទណ្ឌកម្មសេដ្ឋកិច្ច​រួចទៅហើយ បន្ទាប់ពី​ត្រូវបាន​ចាត់ទុកថា​ជា​ប្រទេស​ឧបត្ថម្ភ​ដល់​អំពើ​ភេរវកម្ម មុនពេល​មាន​ភាព​តានតឹង​កើតឡើង​ជាថ្មី ជុំវិញ​កម្មវិធី​នុយក្លេអ៊ែរ​និង​ការបាញ់​សាកល្បង​មី​ស៊ី​ល​ជា​បន្ដបន្ទាប់​៕

 ពាក្យគន្លឹះ  អាមេរិកកូរ៉េខាងជើង

ព័ត៌មានផ្សេងទៀត