ស្ពាន​អាកាស​ថ្មី​មួយ​ទៀត គ្រោង​​នឹង​លេច​​រូបរាង​ឡើង​​នាពេល​​ឆាប់​ៗ​​ខាង​មុខ​​

02-12-2017 2:02 pm 3457

​អភិបាល​រាជធានី​ភ្នំពេញ លោក​ឃួង ស្រេង កាលពី​ថ្ងៃ​ម្សិលមិញ បាន​បើក​កិច្ចប្រជុំ​បច្ចេកទេស​ជាមួយ​មន្ត្រី​ជំនាញ ក្នុង​ការសិក្សា​កែសម្រួល​ប្រព័ន្ធ​ចរាចរណ៍​នៅ​ចំណុចប្រសព្វ​ស្ពាន​អាកាស​ក្បាលថ្នល់ រវាង​មហាវិថី​ព្រះមុនីវង្ស (​ផ្លូវ​២៧១) និង​មហាវិថី​សម្ដេច ហ៊ុន សែន (​ផ្លូវ​៦០​ម៉ែត្រ​)​។​

​សាលា​រាជធានី​ភ្នំពេញ បាន​កត់សម្គាល់ថា កំណើន​ប្រជាពលរដ្ឋ​កាន់តែ​កើនឡើង មធ្យោបាយ​ធ្វើដំណើរ​ក៏​កាន់តែ​មាន​ភាព​មមាញឹក​ខ្លាំង ដែល​ធ្វើឲ្យ​ផ្លូវ​សំខាន់ៗ​មួយចំនួន​មាន​ការកកស្ទះ​ជាខ្លាំង ជាពិសេស នៅ​ចំណុចប្រសព្វ​ច្រមុះជ្រូក​ក្បាលថ្នល់ ក៏​ជា​ចំណុច​កកស្ទះ​ខ្លាំង ដែល​ត្រូវមាន​ដំណោះស្រាយ​ជាបន្ទាន់​។ លោក​ឃួន ស្រេង បានឱ្យដឹងថា តាម​គម្រោង​នឹងត្រូវ​សាងសង់​ស្ពាន​អាកាស​នៅ​តំបន់​នេះ នាពេល​ឆាប់ៗ​ខាងមុខ​។​

​អភិបាលក្រុង​រូបនេះ ក៏បាន​ណែនាំ​ដល់​មន្ត្រី​ពាក់ព័ន្ធ រួមជាមួយ​មន្ទីរជំនាញ ពិនិត្យ ពិភាក្សា​លើ​ការងារ​បច្ចេកទេស​បន្ថែ​ម​ទៀត ដោយ​ចុះ​ពិនិត្យ​ទីតាំង​ផ្ទាល់ ដើម្បី​ឲ្យដឹង​ច្បាស់​ពី​លំហូរ​ចរាចរ​នៅ​តំបន់​នោះ ដែល​កំពុងមាន​ការកកស្ទះ ហើយក៏​គិតគូរ​ផងដែរ​អំពី​លទ្ធភាព​ធ្វើ​ការរំដោះ​ចរាចរ​បណ្តោះអាសន្ន​មុនពេល​គម្រោង​នេះ ចាប់ផ្តើម​ដំណើរការ​។​

​គួរ​បញ្ជាក់ថា នៅ​រាជធានី​ភ្នំពេញ​បច្ចុប្បន្ន មាន​ស្ពាន​អាកាស​ចំនួន ៥​កន្លែង គឺ​ស្ពាន​អាកាស​ក្បាលថ្នល់ ស្ពាន​អាកាស​ស្ទឹងមានជ័យ ស្ពាន​អាកាស​៧​មករា ស្ពាន​អាកាស​៥​មករា ឬ​ស្ពាន​តិច​ណូ និង​ស្ពាន​អាកាសស្តុ​បផ្សារ​ដី​ហុយ ដែល​កំពុងដំណើរការ​សាងសង់ ហើយ​គ្រោង​នឹង​បញ្ចប់​នៅ​ចុងឆ្នាំ​២០១៧​នេះ​៕

ព័ត៌មានផ្សេងទៀត