មជ្ឈមណ្ឌល​សិទ្ធិមនុស្ស​កម្ពុជា​បដិសេធ​ការចោទប្រកាន់​ពី​នាយករដ្ឋមន្ត្រី​

26-11-2017 6:08 pm 3400
អ្នកស្រី ចក់ សុភាព នាយិកា​មជ្ឈមណ្ឌល​សិទ្ធមនុស្ស​កម្ពុជា។ រូបថត៖ ម​.​ស​.​ម​.​ក

​លោកនាយក​ក​រដ្ឋមន្ត្រី ហ៊ុន សែន បាន​ព្រមាន​បិទ​មជ្ឈមណ្ឌល​សិទ្ធិមនុស្ស និង​ចោទ​មជ្ឈមណ្ឌល​នេះ​ថា ត្រូវបាន​បង្កើតឡើង​ក្រោម​បញ្ជា​ពី​បរទេស​។ ភ្លាមៗ​ក្រោយ​ការព្រមាន និង​ចោទប្រកាន់​បែបនេះ មជ្ឈមណ្ឌល​សិទ្ធមនុស្ស​កម្ពុជា បានចេញ​សេចក្ដីថ្លែងការណ៍​បញ្ជាក់​ពី​ឯករាជ្យភាព​របស់​ខ្លួន និង​ច្រាន​ចោល​ការចោទប្រកាន់​។

​មជ្ឈមណ្ឌល​សិទ្ធមនុស្ស​កម្ពុជា (​ម​.​ស​.​ម​.​ក​) ដែល​មាន​លោក កឹម សុខា ជា​អតីត​ស្ថានិក បាន​ឆ្លើយតប ទៅ​ការចោទប្រកាន់​របស់​លោក​នាយករដ្ឋមន្ត្រី ហ៊ុន សែន នៅ​ថ្ងៃ​ទី​២៦ ខែ​វិច្ឆិកា​នេះ​ថា ខ្លួន​ជា​ស្ថាប័ន​ឯករាជ្យ មិន​មាន​ជាប់​ពាក់ព័ន្ធ ជាមួយ​គណបក្ស​នយោបាយ​ណាមួយ​នោះ​ទេ ព្រោះ​លោក កឹម សុខា បាន​លាលែង ពី​មជ្ឈមណ្ឌល​តាំងពី​ឆ្នាំ​២០០៧​។​

​ចាប់តាំងពី​ការកកើត​ឡើង​ក្នុង​ឆ្នាំ​២០០២ ម​.​ស​.​ម​.​ក អះអាងថា បានធ្វើការ ដើម្បី​លើកកម្ពស់​សិទ្ធមនុស្ស ដោយ​ឈរ​លើ​គោលការណ៍​ច្បាស់លាស់​។ ស្ថាប័ន​នេះ​បន្ថែមទៀតថា ខ្លួន​បាន​ធ្វើ​ការអប់រំ​អំពី​សិទ្ធិមនុស្ស ការផ្តល់​អំណាច​ដល់​ស​ហគ​មន៍​ជនបទ ដែល​រង​ផលប៉ះពាល់​ដោយ​វិវាទ​ដីធ្លី រហូតដល់​ការលើកកម្ពស់​ភាពស្មើគ្នា របស់​អ្នក​ស្រឡាញ់​ភេទ​ដូច​គ្នា​ជាដើម​។​

​ម​.​ស​.​ម​.​ក បច្ចុប្បន្ន​មាន​អ្នកស្រី ចក់ សុភាព ជា​នាយិការ បញ្ជាក់ថា មជ្ឈមណ្ឌល​នេះ បាន​ផ្លាស់ប្តូរ​ថ្នាក់ដឹកនាំ​ចំនួន​២​លើក​រួចមកហើយ បន្ទាប់ពី​លោក កឹម សុខា បាន​លាឈប់​។

​សេចក្ដីថ្លែងការណ៍​សរ​សេរ​ដូច្នេះ​ថា​៖ «​គោល​ជំហរ​ឯករាជ្យ​ដ៏​តឹងរ៉ឹង គឺជា​តម្លៃ​ស្នូល​របស់ ម​.​ស​.​ម​.​ក ដែល​ខិតខំ​ប្រឹងប្រែង ក្នុង​ការផ្ដល់​ការវិភាគ​លើ​កិច្ចការ​សាធារណៈ ដោយ​ឈរ​លើ​គោលការណ៍​តុល្យភាព និង​សិទ្ធមនុស្ស​ច្បាស់លាស់ ពុំ​គាំទ្រ​គណបក្សនយោបាយ​ណាមួយ​នោះឡើយ​»​។

មជ្ឈមណ្ឌល​សិទ្ធមនុស្ស​កម្ពុជា បាន​អំពាវនាវ​ឲ្យ​រដ្ឋាភិបាល​មាន​កិច្ចស​ន្ទនា ជាមួយ​តំណាង​របស់​ខ្លូន ដើម្បី​ដោះស្រាយ​ការចោទប្រកាន់ និង​មន្ទិលសង្ស័យ​ដោយ​ការយោគយល់​គ្នា​។​

គួរបញ្ជាក់​ថា នៅ​ព្រឹក​ថ្ងៃទី​២៦ ខែ​វិច្ឆិកា​នេះ លោកនាយក​រដ្ឋមន្ត្រី ហ៊ុន សែន បាន​ស្នើ​ទៅ​កាន់​ក្រសួងមហាផ្ទៃ ឲ្យ​ពិនិត្យ​ផ្លូវច្បាប់ ដើម្បី​បិទ​មជ្ឈមណ្ឌល​សិទ្ធិមនុស្ស​កម្ពុជា​។ លោក​ចោទ​មជ្ឈមណ្ឌល​នេះ​ថា បង្កើតឡើង​ក្រោម​ការបង្គាប់​ពី​បរទេស​។​

​យ៉ាងណាក្ដី ម​.​ស​.​ម​.​ក រំពឹង​ថា​ខ្លួន​នឹង​ទទួលបាន​នូវ​ភាពត្រឹមត្រូវ នឹង​ស្អាតស្អំ ប្រសិនបើ​មាន​ការ​ស៊ើប​អង្គេត​ណាមួយពី​រដ្ឋាភិបាល​។​
 

ព័ត៌មានផ្សេងទៀត