គណបក្ស​​ប្រជាធិបតេយ្យ​​មូលដ្ឋាន ​អាចជា​ជម្រើស​​ជំនួស​​សង្គ្រោះ​ជាតិ​?​

17-11-2017 5:07 pm 23246
លោក យ៉េង វីរៈ ប្រធានគណបក្ស​​ប្រជាធិបតេយ្យ​​មូលដ្ឋាន ​

​គណបក្ស​សង្គ្រោះ​ជាតិ​ត្រូវបាន​គេ​ផាត់​ចេញពី​សង្វៀន​នយោបាយ ជា​ផ្លូវកា​រហើយ បើទោះជា​គណបក្ស​នេះ នៅតែ​អះអាងថា​ខ្លួន​នៅតែ​ជា​គណបក្សនយោបាយ​ស្របច្បាប់​នៅឡើយ​ក៏ដោយ​។​ជាងនេះទៀត មនុស្ស​សំខាន់​របស់​គណបក្ស​នេះ ជាង​១០០​នាក់ ក៏ត្រូវ​អស់សិទ្ធិ​ធ្វើ​នយោបាយ​ទៅទៀត​។​

ទឹកចិត្ត​អ្នកគាំទ្រ​គណបក្សប្រឆាំង​ដ៏​ធំ​មួយ​នេះ ហាក់​ធ្លាក់​ស្រុត ម្នាក់ៗ​ដក​ដង្ហើមធំ អស់សង្ឃឹម រហូត​ប្រកាសថា​នឹង​លែង​ចេញទៅ​បោះឆ្នោត​។ តែ​អ្នកវិភាគ​មើលឃើញថា ការមិន​ចេញទៅ​បោះឆ្នោត ដោយសារ​បាត់បង់​គណ​បក្ស ដែល​ខ្លួន​ពេញចិត្ត ជា​ការគិត​មិនបាន​វែងឆ្ងាយ​មួយ​ដែរ​។ ជា​ទស្សនៈ មួយ​ផ្សេង ពលរដ្ឋ​ម្ចាស់ឆ្នោត គួរ​បន្ត​រក​ជម្រើស​ថ្មី ប្រសិនបើ​ពិតជា​ចង់ឲ្យមាន​ការផ្លាស់ប្តូ​រមែន ជាជាង​ការបោះបង់​សិទ្ធិ ហើយ​ទ្រាំ​ស្ថិតនៅក្នុង​ស្ថានភាព​ដ៏​តឹងតែង​បែបនេះ​។​

​លោក​បណ្ឌិត​ មាស នី អ្នកតាមដាន​ស្ថានការណ៍​នយោបាយ​មួយរូប​យល់ថា ប្រសិនបើ​គណបក្ស​ភ្លើងទៀន របស់លោក​សម រង្ស៊ី និង​គណបក្ស​សិទ្ធិមនុស្ស របស់លោក​កឹម សុខា ត្រូវបាន​អនុញ្ញាត្ត និង​យល់ព្រម​ចូលរួម​ការបោះឆ្នោត​នៅ​ឆ្នាំ​២០១៨​ខាងមុខ នោះ​ម្ចាស់ឆ្នោត​ជាង​៣​លាន​នាក់ នឹង​នៅតែ​បន្ត​គាំទ្រ ដដែល គ្រាន់តែ​សំឡេង​បែក​គ្នា និង​បូករួម​គណបក្ស​ថ្មី​មួយទៀត​គឺ​គណបក្ស​ប្រជាធិបតេយ្យ​មូលដ្ឋាន ហើយ​ឈរ​ឲ្យ​ហ្នឹង​រៀងខ្លួន ឃោសនា​ឲ្យបាន​ខ្លាំងក្លា ប្រាកដជា​ទាញ​ទម្លាក់​គណបក្សកាន់អំណាច មិន​ឲ្យបាន​សំឡេង​លើសពី​៥០%+១ បាន​ទៀត​ទេ ហើយ​បើ​បែបនេះ ស្ថានភាព​នឹង​ល្អជា​ងបច្ចុប្បន្ន​......

​សំឡេង​លោក​ មាស នី​៖

​អ្នកវិភាគ​វ័យក្មេង លោក​ហង្ស ពិ​ទូ យល់ថា គណបក្ស​ថ្មី​ពីរ គឺ​គណបក្ស​ប្រជាធិបតេយ្យ​មូលដ្ឋាន និង​គណបក្ស​សម្ព័ន្ធ​ដើម្បី​ប្រជាធិបតេយ្យ អាចនឹងទទួល​បាន​អាសនៈ​។​តែ​លោក​មើលឃើញថា គណបក្ស​សម្ព័ន្ធ​ដើម្បី​ប្រជាធិបតេយ្យ អាចជា​សេណារីយោ​របស់​គណបក្ស​កាន់អំណាច ឯ​គណបក្ស​គណបក្ស​ប្រជាធិបតេយ្យ​មូលដ្ឋាន មិន​ស្ថិតក្នុង​សេណារីយោ​នៃ​គណបក្សកាន់អំណាច​ទេ ហើយ​កំពុងមាន​ការចាប់អារម្មណ៍​ពី​ពលរដ្ឋ​ជា​បណ្តើរៗ​ហើយ តែ​យ៉ាងណា ​លោក​ថា គណបក្ស​នេះ នៅ​ខ្វះ​ធនធាន​ច្រើន ទាំង​ធនធានមនុស្ស និង​ហិរញ្ញវត្ថុ​.....

​សំឡេង​លោក​ហង្ស ពិ​ទូ​៖

​មកដល់ពេលនេះ គណបក្ស​ភ្លើងទៀន និង​គណបក្ស​សិទ្ធិមនុស្ស នៅ​មិនទាន់​បញ្ចេញ​ជំហរ​យ៉ាងណា​ក្នុង​ការចូលរួម​បោះឆ្នោត​ខាងមុខ​នៅឡើយ​ទេ ខណៈ​មន្ត្រី​សំខានៗ​នៃ​គណបក្ស​ទាំងពីរ​នេះ ក៏​មានឈ្មោះ​ក្នុង​ការហាមឃាត់​ធ្វើ​នយោបាយ​ដែរនោះ​។​ចំណែក​គណបក្ស​ប្រជាធិបតេយ្យ​មូលដ្ឋាន ត្រូវបាន​គេ​ដឹងថា ជា​បណ្តុំ​បញ្ញាវន្ត ដែល​ធ្លាប់​ដឹកនាំ​អង្គការ​សង្គម​ស៊ីវិល ក្នុងនោះ​ក៏មាន​ការចូលរួម​ពី​លោក​បណ្ឌិត​កែម ឡី ជា​ស្ថាបនិក​មួយរូប​ផងដែរ​។ ប៉ុន្តែ​ជា​អកុសល លោក​មិនទាន់បាន​ប្រឡូក​ក្នុង​គណបក្ស​នេះ​ផង ក៏ត្រូវ​ឃាតក​បាញសម្លាប់​នៅ​កណ្តាល​ទីក្រុង​កាលពី​ថ្ងៃទី​១០ កក្កដា ឆ្នាំ​២០១៦ បាត់ទៅ​៕

ព័ត៌មានផ្សេងទៀត