បង្គន់​​និង​បន្ទប់​​ងូតទឹក ​ចំនួន​៥០០​ ត្រូវ​ដាក់ឲ្យ​​កីឡាករ​​អុំទូក​​ប្រើប្រាស់​​

26-10-2017 11:04 am 1067
រូបភាពពីfbរដ្ឋបាលរាជធានីភ្នំពេញ

បើតាម​លោក ម៉េត មាស​ភក្កី អ្នកនាំពាក្យសាលារាជធានីភ្នំពេញ បាន​បញ្ជាក់ថា ក្រុម​កីឡាករ​ចំណុះ​ទូក​ដែល​ត្រូវ ចូលរួម​ប្រកួត​ក្នុង​ឆ្នាំនេះ ត្រូវបាន​រំពឹងថា​នឹងមាន​ចំនួន​ពី​១៨.០០០​នាក់ ទៅ​២០.០០០​នាក់​។ រដ្ឋបាល​រាជធានី​ភ្នំពេញ នឹង​រៀបចំ​ឱ្យ​ពួកគាត់​ស្នាក់នៅ​លើ​ទីតាំង​ដី​អភិវឌ្ឍន៍​ជ្រោយចង្វារ របស់​ក្រុមហ៊ុន​OCIC លើ​ទំហំ​ដី​ជាង​៣​ហិកតា ដោយមាន​ការរៀបចំ​ត​បណ្តាញទឹក ភ្លើង បង្គន់​អនាម័យ និង​ទីតាំង​ប្រគុំ​តន្ត្រី​ផងដែរ​។​

​លោក ម៉េត មាស​ភក្កី ថា អាជ្ញាធរ​រាជធានី​ភ្នំពេញ បានរៀបចំ​ដាក់​បន្ថែម​បង្គន់ និង​បន្ទប់​ងូតទឹក សម្រាប់​កីឡាករ​អុំទូក​ស្នាក់នៅ ដែល​ស្ថិតនៅ​តំបន់​អភិវឌ្ឍន៍ ជ្រោយចង្វារ​របស់ ក្រុមហ៊ុន​OCIC ក្នុង​ខណ្ឌ​ជ្រោយចង្វារ ចំនួន​៥០០​បន្ទប់​។ 

​លោក​បាន​បន្ដថា ចំពោះ​ទីតាំង​ចត​ទូក ត្រូវបាន​រៀបចំ​បែងចែក​ជា​៥​មណ្ឌល តាម​ដង​ទន្លេសាប ស្ថិតនៅ​ប៉ែក​ខាងជើង​ស្ពាន​ជ្រោយចង្វារ​ទាំងអស់ ដោយ​មិន​អនុញ្ញាតឱ្យ​ចត​នៅ​ខាងត្បូង​ស្ពាន​នោះទេ​។ ចំពោះ​បង្គន់​អនាម័យ​ទាំង​ចល័ត និង​នៅ​មួយកន្លែង ត្រូវបាន​រៀបចំឡើង​ចំនួន​៤៦៦​លើ​២៦​ទីតាំង ការតុបតែង​លំអរ​ភ្លើង​បំភ្លឺ​សាធារណៈ តាម​ដង​វិថី និង​តាម​សួនច្បារ​នានា​។​

​លោក​បាន​បន្ថែមថា ចំណែក​រថយន្ត​សង្គ្រោះ បាន​ត្រៀម​ចំនួន​៥៩​គ្រឿង ក្នុងនោះ​មាន​រថយន្ត​របស់ មន្ទីរ​សុខាភិបាល​រាជធានី​ភ្នំពេញ​ចំនួន​១៥​គ្រឿង​ត្រូវ​បានដាក់​ប្រចាំការ​២៤​ម៉ោង​លើ​២៤​ម៉ោង ក្នុង​រយៈពេល​៣​ថ្ងៃ នៃ​ព្រះរាជ​ពិធីបុណ្យ​រួមជាមួយ​ស្តង់ សង្គ្រោះ​ចំនួន​១២​គោលដៅ​ផ្សេងទៀត​។​ឯ​ការរៀបចំ​ទីតាំង​កម្សាន្ដ សប្បាយ ការប្រគំ​តន្ត្រី សិល្បៈ និង​ពិព័រណ៍​ផលិតផល ទំនិញ​គ្រប់​ប្រភេទ មាន​ជាង​១០​ទីតាំង​។​

អ្នកនាំពាក្យ​រូបនោះ​បាន​ឱ្យដឹងទៀតថា រដ្ឋបាល​រាជធានី​ភ្នំពេញ រួមសហការ​ជាមួយ​ក្រុមហ៊ុន​ស៊ីន​ទ្រី នឹង​ប្រើប្រាស់​កម្លាំង​កម្មករ​ចំនួន​៨៥០​នាក់ ដើម្បី​ប្រមូល និង​ដឹកជញ្ជូន​សំរាម​ចេញ​ក្រៅ​ក្រុង​ក្នុងអំឡុង​ព្រះរាជ​ពិធីបុណ្យ រួមទាំង​ការបញ្ចៀស​រថយន្ត​ធំ​មិនឱ្យ​ចូល​ក្រុង​តាម​ច្រកចូល​រាជធានី​ភ្នំពេញ ទាំង​៦​ផងដែរ​។ លើសពីនេះ​ទៀត ការងារ​សំខាន់ និង​ចាំបាច់​មួយទៀត​គឺ​ការរៀបចំ​សន្តិសុខ សណ្តាប់ធ្នាប់​ដោយ​រៀបចំ​កម្លាំង និង​មធ្យោបាយ​គ្រប់គ្រាន់​ក្នុង​ការការពារ ព្រះរាជ​ពិធីបុណ្យ និង​ធានាបាន​នូវ​ភាព​សប្បាយរីករាយ​ជូន ប្រជាពលរដ្ឋ​ដែល​នឹង​ចូលមក​រាជធានី​ភ្នំពេញ​រាប់លាន​នាក់ ក្នុង​រយៈពេល​៣​ថ្ងៃ​ខាងមុខនេះ​៕

ព័ត៌មានផ្សេងទៀត