សង្គម​ស៊ីវិល​ចំនួន​១២​ថា​ការ​យក​អាសនៈ​បក្សប្រឆាំង​ចែកគ្នា​ជា​ការ​មិន​គោរព​ឆន្ទៈ​រាស្ត្រ​

22-10-2017 1:31 pm 2363
សញ្ញាសម្គាល់របស់ សមាគម និងអង្គការក្រៅរដ្ឋាភិបាល មួយចំនួនដែលបានចេញសេចក្ដី ថ្លែងការណ៍រួមគ្នា កាលពីថ្ងៃទី១៩ ខែតុលា ឆ្នាំ២០១៧។

​បណ្ដុំ​អង្គការក្រៅរដ្ឋាភិបាល​នៅ​កម្ពុជា​ចំនួន​១២ បាន​សម្ដែង​ការព្រួយបារម្ភ​ជាខ្លាំង ចំពោះ​ការប្ដឹង​រំលាយ គណបក្ស​សង្គ្រោះ​ជាតិ និង​ការធ្វើវិសោធកម្ម​ច្បាប់​ចំនួន​៤ ក្នុង​បំណង​រំលែក​អាសនៈ​បក្ស​ដែល​ត្រូវ​រំលាយ ឲ្យទៅ​គណបក្ស​ផ្សេង​។ អង្គការ​សង្គម​ស៊ីវិល​ទាំងនោះ ចាត់ទុក​ការបែងចែក អាសនៈ​គណបក្ស​សង្គ្រោះ​ជាតិ ឲ្យទៅ​គណបក្ស​ដទៃ​ទៀត ជា​ការ​មិន​គោរព​សំឡេង​ឆន្ទៈ​ប្រជាពលរដ្ឋ​។

​ប្រតិកម្ម​របស់​ក្រុម​អង្គការ​សង្គម​ស៊ីវិល ត្រូវបាន​ធ្វើឡើង នៅក្នុង​សេចក្ដីថ្លែងការណ៍​រួមមួយ ចុះ​ថ្ងៃ​ទី​១៩ ខែតុលា ពាក់ព័ន្ធ​ទៅនឹង​ការរំលាយ គណបក្សប្រឆាំង​ធំជាងគេ​នៅ​កម្ពុជា ក៏ដូចជា ការកែប្រែ​រូ​មន្ត​ថ្មី នៃ​ការបែងចែក អាសនៈ​គណបក្ស​នយោបាយ​ដែល​ត្រូវ​រំលាយ​។​

​នៅក្នុង​សេចក្ដីថ្លែងការណ៍ សមាគម និង អង្គការ​សង្គម​ស៊ីវិល​ចំនួន​១២ នៅ​កម្ពុជា បាន​លើកឡើង​ថា​៖ «​ជាយថាហេតុ​ការរំលាយ​គណបក្ស​ប្រជែង រហូត​មិន​អាច​ចូលរួម​ប្រកួត​ការបោះឆ្នោត  នឹង​នាំឲ្យមាន​បញ្ហា នៃ​ភាពត្រឹមត្រូវ​តាម​ច្បាប់​ជាតិ និង​អន្តរជាតិ​នៅ​ឆ្នាំ​២០១៨ ខាងមុខនេះ​»​។
​សេចក្ដីថ្លែងការណ៍​បន្ថែ​ម​ថា ការអនុវត្តន៍​រូបមន្ត​ថ្មី ដើម្បី​បែងចែក​អាសនៈ គណបក្ស​ដែល​ត្រូ​រំលាយ នឹង​ធ្វើឲ្យ​ប៉ះពាល់​ជា​អវិជ្ជមាន និង​អយុត្តិធម៌​ធ្ងន់ធ្ងរ ចំពោះ​សំឡេង​ប្រជាពលរដ្ឋ ដែល​ជា​ម្ចាស់ឆ្នោត​។​

​ផ្អែកទៅលើ សេចក្ដីស្នើ​វិសោធនកម្ម​ច្បាប់​ចំនួន​៤​នៅ​ពេល​ថ្មីៗ​នេះ អាសនៈ​របស់ គណបក្ស​សង្គ្រោះ​ជាតិ​ចំនួន​៥៥ ដែល​បាន​ពី​ការគាំទ្រ របស់​ប្រជាពលរដ្ឋ ប្រមាណ​៣​លាន​នាក់ កាលពី​ឆ្នាំ​២០១៣ ព្រមទាំង អាសនៈ​ក្រុមប្រឹក្សាឃុំ​សង្កាត់​ទាំង​ជាង​៥,០០០  ដែល​ទើបបាន​ពី​ការបោះឆ្នោត​ថ្មីៗ​នេះ អាច​នឹង​ត្រូវ​គេ​ហែក​ចែកគ្នា ប្រសិនបើ​គណបក្ស​នេះ​ត្រូវ​រំលាយ​ចោល​មែន​នោះ​។
​ក្រុម​អង្គការ​សង្គម​ស៊ីវិល អះអាងថា ប្រសិនបើ​ដៃ​គូប្រជែង​ដ៏​សំខាន់ របស់​គណបក្ស​ប្រជាជន ត្រូវបាន​រំលាយ​ចោល នោះ​ការបោះឆ្នោត​ថ្នាក់ជាតិ ឆ្នាំ​២០១៨​ខាងមុខ នឹង​មិន​មាន​ភាពត្រឹមត្រូវ សេរីភាព និង​យុត្តិធម៌​នោះទេ​។​

​យ៉ាងណាក្ដី​រដ្ឋាភិបាល ជារឿយៗ​បាន​ការពារ​ចំណាត់ការ​របស់​ខ្លួន ចំពោះ​គណបក្ស​សង្គ្រោះ​ជាតិ និង​ថា​បើ​ទោះបី​គ្មាន គណបក្ស​សង្គ្រោះ​ជាតិ ចូលរួម​ការបោះឆ្នោត ក៏​កម្ពុជា​នៅតែ​មាន​លទ្ធិប្រជាធិបតេយ្យ សេរី​ពហុបក្ស​ដដែល​។​

​ថ្លែង​ប្រាប់​វិទ្យុ​វា​យោ នា​ពេល​ថ្មីៗ​នេះ លោក សុខ ឥសាន អ្នកនាំពាក្យ​គណបក្ស​ប្រជាជន​កម្ពុជា អះអាងថា គម្រោង​រំលាយ​គណបក្ស​សង្គ្រោះ​ជាតិ និង​ការយក​អាសនៈ​គណបក្ស​នេះ ទៅ​ចែក​ឲ្យ​គណបក្ស​ផ្សេង គឺជា​ការត្រឹមត្រូវ មិនមែន​ជា​ការ​ប្លន់​អំណាច​នោះ​ទេ​...

សំឡេង​លោក សុខ ឥសាន​៖

​គួរ​បញ្ជាក់​ជូន​ថា មកដល់ពេលនេះ សេចក្ដីស្នើ​កែប្រែ​ច្បាប់ ដើម្បី​បែងចែក​អាសនៈ  គណបក្ស​ដែល​ត្រូវ​រំលាយ នៅ​រង់ចាំ​តែ​ព្រះមហាក្សត្រ ឡាយព្រះហស្ថលេខា​ប៉ុណ្ណោះ នឹង​ចូល​ជា​ធរមាន​។
​ក្នុងដំណាក់កាល​នេះ គណបក្ស​សង្គ្រោះជាតិ​ ក៏​កំពុងតែ​មាន​គម្រោង ដាក់​លិខិត​ស្នើ​សុំ​ព្រះមហាក្សត្រ ឲ្យ​ទ្រង់​ជួយ​ដោះស្រាយ វិបត្តិ​នយោបាយ​ផងដែរ​៕

 ពាក្យគន្លឹះ  អង្គការសង្គមស៊ីវិល

ព័ត៌មានផ្សេងទៀត