គណបក្ស​ភឿ​ថៃ​​ថា​អ្នកស្រី​យី​ង​ឡាក់​​កំពុង​សុំ​សិទ្ធិ​​ជ្រកកោន​នយោបាយ​​នៅ​អង់គ្លេស​

29-09-2017 11:04 am 646
អ្នកស្រី​យីងឡាក់​កាលនៅ​ជានាយករដ្ឋមន្ដ្រីថៃ

​នាយករដ្ឋមន្ដ្រី​ថៃ​លោក​ប្រា​យុទ្ធ ចាន់​អូ​ចា​កាលពី​ថ្ងៃ​ព្រហស្បតិ៍​ម្សិលមិញ បាន​បញ្ជាក់ប្រាប់​អ្នកកាសែត​ថា លោក​បានដឹង​ពី​កន្លែង​លាក់ខ្លួន​របស់​អ្នកស្រី​យី​ង​ឡាក់ ស៊ីណាវ៉ាត្រា​ហើយ គឺ​អ្នកស្រី​កំពុងស្នាក់នៅ​ទីក្រុង​ឌូ​បៃ​ប្រទេស​អារ៉ាប់​រួម​។​លោក​ប្រា​យុទ្ធ​ថា​ប៉ូលិស​នឹង​ធ្វើការ​ជាមួយ​ក្រសួងការបរទេស រួមទាំង​ប៉ូលិស​អាំងទែ​ប៉ូល​តាម​ចាប់ខ្លួន​អ្នកស្រី​យី​ង​ឡាក់​។​

​ប៉ុន្ដែ​តាម​ប្រភពពី​គណបក្ស​ភឿ​ថៃ​របស់​អ្នកស្រី​វិញ បាន​បញ្ជាក់ថា​អតីត​នាយករដ្ឋមន្ដ្រី​ថៃ​រូបនេះ កំពុង​ស្ថិតនៅ​ទីក្រុង​ឡុង​ដ៍​ប្រទេស​អង់គ្លេស​ឯណោះ និង​កំពុង​ស្វែងរក​សិទ្ធិ​ជ្រកកោន​នយោបាយ​នៅ​ទីនោះ​។​

​អ្នកស្រី​យី​ង​ឡាក់ ស៊ីណាវ៉ាត្រា តុលាការ​កំពូល​ថៃ​ទើបតែ​ប្រកាស​កាត់ទោស​កំបាំងមុខ កាលពី​ថ្ងៃ​ពុធ ដាក់ពន្ធនាគារ​អ្នកស្រី​៥​ឆ្នាំ ពីបទ​ធ្វេសប្រហែស​ក្នុង​កិច្ចការ​គ្រប់គ្រង​គម្រោង​ទិញស្រូវ​អង្ករ​ប្រជាជន​គ្រា​អ្នកស្រី​នៅ​ជា​នាយករដ្ឋមន្ដ្រី ដែល​ធ្វើឲ្យ​ខាត​ថវិកាជាតិ​៨​ពាន់​លាន​ដុល្លារ​អាមេរិក​។​

​តាមពិត​សាលក្រម​ត្រូវ​ប្រកាស​តាំងពី​ថ្ងៃទី​២៥​សីហា​មកម្ល៉េះ ប៉ុន្ដែ​ដោយសារ​អ្នកស្រី​មិនបាន​បង្ហាញខ្លួន​នៅ​តុលាការ ទើបត្រូវ​ពន្យា​ពេល​ដល់​ថ្ងៃទី​២៧​កញ្ញា​។​កាលនោះ​មេធាវី​ការពារ​ក្ដី​របស់​អ្នកស្រី​បាន​បញ្ជាក់ថា អ្នកស្រី​មាន​ជំងឺ​ទើប​មិនអាច​ចូល​បង្ហាញខ្លួន​ក្នុង​សវនាការ​។​ប៉ុន្ដែ​ក្រោយមក​ក៏​លឺដំណឹង​ថា អ្នកស្រី​បាន​រត់​ភៀសខ្លួន​ចេញពី​ប្រទេស​ថៃ​ទៅហើយ​។​

​សូម​រម្លឹកថា អ្នកស្រី​យី​ង​ឡាក់ ស៊ីណាវ៉ាត្រា ត្រូវ​យោធា​ធ្វើ​រដ្ឋប្រហារ​ទម្លាក់​ចេញពី​តំណែង​កាលពី​ថ្ងៃទី​២២​ខែឧសភា​ឆ្នាំ​២០១៤ ក្រោយ​មាន​ការតវ៉ា​តាម​ដងផ្លូវ​ជាច្រើន​ខែ បង្ក​ជា​វិបត្ដិ​ជាប់គាំង​នយោបាយ​។​អ្នកស្រី​មិន​ខុសពី​បងប្រុស​បង្កើត​ឡើយ គឺ​លោក​ថាក់ស៊ីន ស៊ីណាវ៉ាត្រា ត្រូវ​យោធា​ធ្វើ​រដ្ឋប្រហារ​ទម្លាក់​ចេញពី​តំណែង​នាយករដ្ឋមន្ដ្រី​ដូចគ្នា​កាលពី​ឆ្នាំ​២០០៦៕

 ពាក្យគន្លឹះ  ថៃអ្នកស្រីយីងឡាក់

ព័ត៌មានផ្សេងទៀត