ចិន​ចាប់ផ្តើម​​រឹតបន្តឹង​​ការផ្គត់ផ្គង់​ប្រេង​​ឲ្យ​កូរ៉េខាងជើងនៅ​ថ្ងៃទី​​១​តុលា​

24-09-2017 2:14 pm 2034
តម្លៃ​ប្រេងឥន្ធនៈនៅក្នុង​ទីក្រុង​ព្យុងយ៉ាងបាន​កើនឡើង​

​យោងតាម​សេចក្តីថ្លែងការណ៍​របស់​ក្រសួង​ពាណិជ្ជកម្ម​ចិន​បញ្ជាក់ថា ការ​រឹតបន្តឹង​លើ​ការផ្គត់ផ្គង់​ប្រេង​ឆៅ ឲ្យ​កូរ៉េខាងជើង​នឹង​ចាប់ផ្តើម​អនុវត្ត​នៅ​ថ្ងៃទី​១​ខែតុលា​ឆ្នាំ​២០១៧​។ ស្ថិតក្រោម​សេចក្តីសម្រេច​របស់​អង្គការសហប្រជាជាតិ ទីក្រុង​ប៉េកាំង​អាច​បន្ត​លក់​ប្រេង​ឆៅ​ឲ្យ​ប្រទេស​កូរ៉េខាងជើង ក្នុង​បរិមាណ​ច្រើន​បំផុត ២​លាន​បារ៉ែល​រៀងរាល់ឆ្នាំ ចាប់ពី​ឆ្នាំក្រោយ​ទៅ​។ បើតាម​ការសន្និដ្ឋាន កូរ៉េខាងជើង បាន​នាំចូល​ប្រេង​ឆៅ​ពី​ចិន ប្រហែល​ចំនួន​២,២​លាន​បារ៉ែល​នៅក្នុង​ឆ្នាំ​២០១៦​។ បើ​ប្រៀបធៀប​នឹង​ចំនួន​ប្រេង​ដែល​ចិន​អាច​បន្ត​នាំចូល​ប្រទេស​កូរ៉េខាងជើង​បាន និង​ចំនួន​ប្រេង​ដែល​បាន​នាំចូល​កាលពី​ឆ្នាំទៅ ប្រហែល​មិន​ប៉ះពាល់​ធ្ងន់ធ្ងរ ដល់​ចំណូល​របស់​ចិន​នោះទេ​។​

​តាមពិតទៅ​ដំបូង ចិន​និង​រុស្ស៊ី​ដែលជា​សម្ព័ន្ធមិត្ត​ជិតស្និទ្ធ​ជាមួយ​កូរ៉េខាងជើង បាន​ជំទាស់​នឹង​សំណើ​របស់​អាមេរិក លើ​ការហាមឃាត់​នាំ​ប្រេង​ឲ្យ​កូរ៉េខាងជើង ប៉ុន្តែ​ក្រោយមក​ក៏បាន​ព្រមព្រៀងគ្នា​លើ​វិធានការ​កាត់បន្ថយ​នេះ​វិញ​។ និយាយ​ពី​តម្លៃ​ប្រេង នៅ​ប្រទេស​កូរ៉េខាងជើង​ ប្រេង​បានចាប់ផ្តើម​ប្រែប្រួល​ទៅតាម​រលក​នៃ​វិធានការ​ថ្មី​នេះដែរ​។ បើតាម​ទីភ្នាក់ងារ​សារព័ត៌មាន AFP​ឲ្យដឹងថា តម្លៃ​ប្រេងឥន្ធនៈ នៅក្នុង​ទីក្រុង​ព្យុងយ៉ាង បាន​កើនឡើង​ប្រហែល​២០​ភាគរយ នៅក្នុង​រយៈពេល​២​ខែ​ចុងក្រោយ​នេះ​។​

​ពាក់ព័ន្ធ​នឹង​បម្រាម​មិនឲ្យ​នាំចូ​ល​វាយនភណ្ឌ​ពី​ប្រទេស​កូរ៉េ​ខាង​ជើង​វិញ នឹង​ប៉ះពាល់​ដល់​ប្រភព​ចំណូល​របស់​កូរ៉េខាងជើង​។ ចំណូល​លើ​ការនាំចេញ​វាយ​ន​ភណ្ឌ​ទៅកាន់​ប្រទេស​ចិន កូរ៉េខាងជើង​ទទួលបាន​ប្រមាណ​៧០០​រយ​លាន​ដុល្លារ​ក្នុង​មួយឆ្នាំ​។ តាម​ធម្មតា សម្លៀកបំពាក់​ផលិត​នៅក្នុង​ប្រទេស​កូរ៉េខាងជើង ប៉ុន្តែ​ដើម្បី​ទទួលបាន​ផលិតផល​សម្រេច ត្រូវ​បញ្ជូនទៅ​ប្រទេស​ចិន រួមមាន​ការដាក់​ស្លា​យីហោ​របស់​ចិន​ផងដែរ មុននឹង​ក្លាយជា​ផលិតផល​សម្រេច​អាចដាក់​លក់ដូ​រលើ​ទីផ្សារ​បាន​។ នេះ​បើតាម​ការចុះផ្សាយ​របស់​សារព័ត៌មាន​BBC​។​

​គួរ​ជម្រាបជូន​ដែរថា ក្រៅពី​វិធានការ​រឹតបន្តឹង​លើ​ការនាំ​ប្រេង​ឲ្យ​កូរ៉េខាងជើង និង​ការបញ្ឈប់​ការបញ្ជាទិញ​វាយ​ន​ភណ្ឌ​ពី​កូរ៉េខាងជើង ចិន​ក៏បាន​ដាក់​កម្រិត​យ៉ាង​តឹងរឹង លើ​ការ​នាំចូល​ធ្យូងថ្ម​ពី​ប្រទេស​កូរ៉េខាងជើង​ផងដែរ​កាលពីដើម​ឆ្នាំនេះ​។ ចំណូល​ទទួលបាន​ពី​ការនាំចេញ​ធ្យូងថ្ម យកទៅលក់​ឲ្យ​ចិន កូរ៉េខាងជើង​ទទួលបាន​ចំនួន​ប្រមាណ​១,២​ពាន់​លាន​ដុល្លារ កាលពី​ឆ្នាំ​២០១៦​កន្លងទៅ​។​

​សូមបញ្ជាក់ថា សមាជិក​ក្រុម​ប្រឹក្សា​សន្តិសុខ​អង្គការសហប្រជាជាតិ កាលពីពេល​ថ្មី​នេះ បានសម្រេច​អនុម័ត​ទណ្ឌកម្ម​ថ្មី​បន្ថែម លើ​ប្រទេស​កូរ៉េខាងជើង បន្ទាប់ពី​ប្រទេស​នេះ បាន​បាញ់​សាកល្បង​នុយក្លេអ៊ែរ​លើក​ទី​៦​នៅ​ខែកញ្ញា​នេះ​។ នៅ​ក្នុងនោះ ចិន​និង​រុស្ស៊ី​ដែលជា​មិត្ត​ជិតស្និទ្ធ​ជាមួយ​កូរ៉េខាងជើង ក៏បាន​បោះឆ្នោត​គាំទ្រ​ដែរ​៕

 ពាក្យគន្លឹះ  ចិន-កូរ៉េខាងជើង

ព័ត៌មានផ្សេងទៀត