ការហែលទឹក​ផ្តល់អត្ថប្រយោជន៍ដល់​សម្រស់​និងសុខភាព

ការហែលទឹកក៏ជាលំហាត់ប្រាណមួយ ផ្តល់អត្ថប្រយោជន៍ដល់សុខភាពនិងម្រស់ ដែលស្រដៀងនឹងលំហាត់ប្រាណ​ផ្សេងទៀត ដែលនិយមអនុវត្តន៍នៅលើគោក ដូចជាការការរត់ ការដើរញាប់ ការធាក់កង់ និងមានលំ ហាត់ប្រាណ ផ្សេងៗទៀតជាច្រើន។ លំហាត់ប្រាណទាំងអស់ ផ្តល់នូវអត្ថប្រយោជន៍ខុសគ្នា ប៉ុន្តែក៏មានអត្ថប្រយោជន៍ខ្លះស្រដៀងគ្នា​ដែរ។ ចុះ តើការហែលទឹកមានអត្ថប្រយោជន៍អ្វីខ្លះ?

គ្រប់គ្រងទម្ងន់ ៖ ចំណាយពេល៣០នាទី ដើម្បីហែលទឹក អាចជួយដុតកាឡូរីបានល្អជាងលំហាត់ប្រាណ​ផ្សេងៗមួយចំនួន។ បើធៀបនឹងលំហាត់ប្រាណផ្សេងទៀត ដូចជា ការជិះកង់ ឬរត់ជាដើម ការហែល​ទឹកអាច​គ្រប់គ្រង​ទម្ងន់​ប្រសើរជាង។

កាត់បន្ថភាពតានតឹង ៖ យោងតាមការសិក្សាលើអ្នកហែលទឹកចំនួន៤ពាន់នាក់ មាន៧៤ភាគរយនិយាយថា ការហែលទឹកជួយកាត់បន្ថយភាពតានតឹង ដោយឡែក៦៨ភាគរយនិយាយថា ការហែលទឹកធ្វើឲ្យពួកគេមានអារម្មណ៍ល្អ និង៧០ភាគរយនិយាយថា ពួកគេមានអារម្មណ៍ស្រស់ស្រាយ បន្ទាប់ពីហែលទឹក។

ធ្វើឲ្យគេងលក់ស្រួល ៖ អ្នកដែលនិយមការហែលទឹក កម្រលឺពួកគេនិយាយថា មានបញ្ហាក្នុងការគេងណាស់។

កាត់បន្ថយហានិភ័យជំងឺមួយចំនួន ៖ ការហែលទឹកជួយគ្រប់គ្រងកម្រិតជាតិស្ករនៅក្នុងឈាម បន្ថយសម្ពាធឈាម កាត់បន្ថយកម្រិតកូឡេស្តេរ៉ុលនៅក្នុងឈាម។ អ្នកដែលហែលទឹកជាប្រចាំ ហាក់មិនសូវកើតមានជំងឺទឹកនោមផ្អែម ជំងឺបេះដូង និងជំងឺដាច់សរសៃឈាមខួរក្បាល។

ជួយពង្រឹងសាច់ដុំ ៖ អ្នកអាចទទួលបានសាច់ដុំរឹងមាំ តាមរយៈការហែលទឹក ដោយមិនចាំបាច់​ចំណាយលុយ​ទិញឧបករណ៍ហាត់ប្រាណ​ដែលមានតម្លៃថ្លៃ។ ម្យ៉ាងការហែលទឹកក៏ផ្តល់អត្ថប្រយោជន៍ផ្សេងៗជាច្រើន ដូចដែលបានលើកឡើងខាងលើ៕