ប្រទេស​ចិន​ចាត់ទុក​កម្ពុជា ជា​បងប្អូន​នឹង​គ្នា​

12-09-2017 11:48 am 2346

​លោកនាយក​រដ្ឋមន្ត្រី​ហ៊ុន សែន បាន​ដឹកនាំ​គណៈប្រតិភូ​កម្ពុជា ទៅកាន់​ប្រទេស​ចិន ដើម្បី​ចូលរួម​ពិព័រណ៍​ចិន​-​អាស៊ាន លើក​ទី​១៤ នៅ​ទីក្រុង​ណាន​នី​ង ខេត្ត​ក្វាង​ស៊ី ដែល​ប្រព្រឹត្ត​ទៅ រយៈពេល​៣​ថ្ងៃ​គឺ​ចាប់ពី​ថ្ងៃ​ទី​១១ ដល់​១៣ ខែ​កញ្ញា ឆ្នាំ​២០១៧​។​

នៅក្នុង​ឳ​កាស​នោះ​ដែរ​លោក​នាយករដ្ឋមន្ត្រី​ហ៊ុន សែន ក៏​បាន​អញ្ជើញ​ជួបពិភាក្សា​ការងារ​ទ្វេភាគី​ជាមួយ​លោក​ចាង កា​វលី ឧបនាយក​រដ្ឋមន្ត្រី​ចិន នៅ​មជ្ឈមណ្ឌល​សន្និសីទ និង​ពិព័រណ៍​អន្តរជាតិ​ណាន​នី​ង បន្ទាប់ពី​បាន​ជួបពិភាក្សា​ការងារ​ជាមួយ​លោក​សុង ថាវ រដ្ឋមន្ត្រីក្រសួង​ទំនាក់ទំនង អន្តរជាតិ​មជ្ឈឹមបក្ស កុម្មុយនីស្ត​ចិន​រួចមក​។​

​នៅក្នុង​ជំនួប​ពិភាក្សា​ទ្វេភាគី រវាង​ប្រមុខ​រាជរដ្ឋាភិបាល​កម្ពុជា និង​ឧបនាយករដ្ឋមន្ត្រី​ចិន នា​រសៀល​ថ្ងៃ​ទី​១១ ខែកញ្ញា​នោះ លោក​ចាង កា​វលី បាន​លើកឡើង​ថា​លោកនាយក​រដ្ឋមន្ត្រី​ហ៊ុន សែន គឺជា​មិត្ត​ដ៏​ល្អ​របស់​ចិន ហើយ​កម្ពុជា​និង​ចិន​គឺ​ជា​បងប្អូន​នឹង​គ្នា​។​លោក​ក៏​បាន​អរគុណ​ដល់ លោកនាយក​រដ្ឋមន្ត្រី ដែល​បាន​អញ្ជើញ មក​ចូលរួម​ពិព័រណ៍​ចិន - អាស៊ាន​ចំនួន​ជាង​១០ លើក​រួច មក ហើយ រួម​ទាំង​ពិព័រណ៍ ទី​១៤ នៅ​ទីក្រុង​ណាន​នី​ង នាពេលនេះ​។​

​លោក​ចាង កា​វលី បាន​លើកឡើង​បន្ត​ថា មិត្ត​ចិន នឹង​បន្ត​ចូលរួម​ពង្រឹង​ការអភិវឌ្ឍ​ប្រទេស​កម្ពុជា ដោយ​ពង្រីក​កិច្ចសហប្រតិបត្តិការ​លើ​គ្រប់​វិស័យ ហើយ​នៅ​ឆ្នាំ​២០១៨​នេះ​កម្ពុជា​អាច​នាំ​អង្ករ​ចេញមក​ចិន​បន្ថែម​ទៀត​ទៅ​តាម​កូតា​ថ្មី ដែល​បាន​សម្រេច​ផ្តល់​បន្ថែម​រួច​ហើយ​កាលពី​ពេល​ថ្មីៗ​។ ទន្ទឹមនឹងនោះ​ដែរ ភាគី​ចិន​នឹង​ខិតខំ​ជំរុញ​គម្រោង​សាងសង់​ព្រលាន​យន្តហោះ​ថ្មី​នៅ សៀមរាប គម្រោង​រថភ្លើង​ល្បឿន​លឿន និង​គម្រោង​ផ្សេងៗ អោយ​បាន​ដំណើរការ​ឆាប់ រួម​ទាំង​គម្រោង អភិវឌ្ឍន៍​កសិកម្ម ដើម្បី​ជួយ​ពលរដ្ឋ​តាម​ជនបទ ព្រម​ជាមួយនឹង​គម្រោង​ជំនួយឥតសំណង​នានា​ដែល ចិន​បាន​សម្រេច​ជួយ​កម្ពុជា​។​

​ឧបនាយករដ្ឋមន្ត្រី​ចិន​រូបនេះ​ក៏​បាន​បញ្ជាក់​ដែរ​ថា បើ​កម្ពុជា​ត្រូវការ​អ្វី​អោយ​មិត្ត​ចិន​ជួយ គឺ​សូម​ប្រាប់ មក​ភ្លាម នូវ​គម្រោង​អាទិភាព​នានា​ដែល​ត្រូវការ​ជំនួយ​ទាំងនោះ​។ នៅ​ឆ្នាំ​២០១៨ កម្ពុជា​គឺជា​ប្រទេស​កិត្តិយស​ក្នុង​ការរៀបចំ​ពិព័រណ៍​ចិន​អាស៊ាន ដែល​ប្រទេស​ចិន​នឹង​ត្រៀម​លក្ខណៈ​រៀបចំ​អោយបាន​ល្អ​បំផុត ព្រោះ​កម្ពុជា​ជា​មិត្ត ដ៏​ល្អ​និង​ជា​បងប្អូន​ដ៏​ល្អ ហើយ​ប្រទេស​ចិន​គឺ​ជា​ខ្នងបង្អែក​ដ៏​រឹងមាំ​សម្រាប់​ជួយ​កម្ពុជា គ្រប់​កាលៈទេសៈ​ទាំងអស់​។​

​នៅក្នុង​ជំនួប​នោះ​ដែរ​ប្រមុខ​រាជរដ្ឋាភិបាល​កម្ពុជា​ក៏បាន ជម្រាប​ភាគី​ចិន​ផង​ដែរ​អំពី​ការខិតខំ​ពង្រីក​ទីផ្សារ កសិផល​ដើម្បី​ជួយ​កសិករ ក្នុងនោះ លោកនាយក​រដ្ឋមន្ត្រី​ក៏​បាន​ជម្រាប​អំពី​គម្រោង​ពហុកីឡាដ្ឋាន​មរតក​តេជោ ដែល​កំពុង​សាងសង់ ព្រមទាំង​ការត្រៀម​រៀបចំ​ការបោះឆ្នោត​សម្រាប់​ឆ្នាំ ២០១៨ និង​កាលបរិច្ឆេទ​នៃ​ការប្រជុំ LANCANG-Mekong ដែល​គ្រោង​នឹង​ធ្វើ​នៅ​ថ្ងៃទី ១០-១១ ខែ​មករា ឆ្នាំ​២០១៨​។​លោកនាយក​រដ្ឋមន្ត្រី​ក៏​បាន​អរគុណ​មិត្ត​ចិន​ដែល​បាន​យកចិត្តទុកដាក់​ខ្ពស់​ចំពោះ​ព្រះរាជសុខភាព​របស់​ព្រះមហាក្សត្រ​នៃ​ព្រះរាជាណាចក្រ​កម្ពុជា ព្រមទាំង​សម្តេចម៉ែ​នៅក្នុង​ប្រទេស​ចិន ព្រម​ទាំង​ជំនួយ​ជាច្រើន​ទៀត​ដែល​មិត្ត​ចិន​ផ្តល់ ដល់​កម្ពុជា​ផង​ដែរ​៕

 

 

 


 ពាក្យគន្លឹះ  លោកហ៊ុន សែន

ព័ត៌មានផ្សេងទៀត