រដ្ឋាភិបាល​​ចិន​​ថា​ ​ឧបសគ្គ​​របស់​​កម្ពុជា​ ​គឺ​ជា​​ឧបសគ្គ​​របស់​​ចិន

08-09-2017 5:27 pm 889

ប្រមុខ​រដ្ឋាភិបាល​កម្ពុ​ជា​លោកនាយក​រដ្ឋមន្ត្រី​ហ៊ុន សែន ក្នុង​ឱកាស​ជួបពិភាក្សា​ជាមួយ​លោក Wang Jiarui អនុប្រធាន​សភា​ក្រុមប្រឹក្សា​នយោបាយ​ប្រជាជន​ចិន បានលើកឡើង​ពី​ទំនាក់ទំនង​គ្រប់​ជ្រុង ជ្រោយ​រវាង​ប្រទេស​ទាំង​ពីរ​។ ជាមួយគ្នានេះ លោកនាយក​រដ្ឋមន្ត្រី​កម្ពុជា​ក៏​សង្ឃឹមថា លោក​ប្រធានាធិបតី​ចិន នឹង​បន្ត​ជាប់ឆ្នោត​ជា​អគ្គលេខាធិការ​បក្ស​កុម្មុយនីស្ត​ចិន​តទៅទៀត នៅ​ក្នុង​មហាសន្និបាត​បក្ស​ខាងមុខនេះ​។​

​ដោយឡែក​លោក Wang Jiarui អនុប្រធាន​សភា​ប្រឹក្សា​នយោបាយ​ប្រជាជន​ចិន ក៏​បាន​បញ្ជាក់​សារជាថ្មី​អំពី​ទំនាក់ទំនង​កម្ពុជា​-​ចិន ក្នុង​ក្របខណ្ឌ​យុទ្ធសាស្ត្រ​គ្រប់​ជ្រុងជ្រោយ ដែល​លោក​ហៅ​ថា​ជា​សម្ព័ន្ឋមិត្ត​បងប្អូន​កាន់តែ​រឹងមាំ និង​រីកចម្រើន​យ៉ាងខ្លាំង​ផង​ដែរ​។ លោក​ថា ប្រទេស​ចិន​បាន​រៀបចំ​ទទួល​លោក​ហ៊ុន សែន នៅក្នុង​ដំណើរ​ទស្សនកិច្ច​អញ្ជើញ​ចូលរួម​ពិធី​តាំង​ពិ​ព័​រណ៌​ចិន​-​អាស៊ាន​ដ៏​ធំ​មួយ រួមជាមួយ​នឹង​កិច្ចប្រជុំ​កំពូល​អំពី​ការវិនិយោគ ពាណិជ្ជកម្ម ចិន​-​អាស៊ាន នៅ​ទីក្រុង​ណាន​នី​ង ប្រទេស​ចិន​សប្តាហ៍​ក្រោយ​។​

ក្នុង​ជំនួប​ពិភាក្សា​គ្នា​នេះដែរ លោក​អនុប្រធាន​សភា​ប្រឹក្សា​នយោបាយ​ប្រជាជន​ចិន បាន​សង្កត់ធ្ងន់ថា ទំនាក់ទំនង​កម្ពុជា​-​ចិន គឺជា​បងប្អូន និង​ជា​មហា​គ្រួសារ ដោយ​លោក​អះអាងថា ឧបសគ្គ​របស់​កម្ពុជា គឺជា​ឧបសគ្គ​របស់​ចិន ហើយ​ជោគជ័យ​របស់​កម្ពុជា គឺជា​ជោគជ័យ​របស់​ចិន និង​ថា​ប្រទេស​ទាំង​ពីរ គឺ​មិន​អាច​មាន​អ្នកណា​មក​បំបែកបំបាក់​បានឡើយ​។​

ជា​ការកត់សម្គាល់ ទំនាក់ទំនង​កម្ពុជា​-​ចិន​ត្រូវ​បាន​គេ​មើលឃើញ​ថា កាន់តែ​ស្អិតរ​មួ​ត​បន្ថែមទៀត ក្រោយ​រដ្ឋាភិបាល នៃ​សាធារណរដ្ឋ​ប្រជាមានិត​ចិន ចេញ​សេចក្ដីថ្លែងការណ៍​គាំទ្រ​ចំពោះ​ចំណាត់ការ លើ​លោក​កឹម សុខ ប្រធាន​គណបក្ស​ប្រឆាំង​ដ៏​ធំ​មួយ​នៅ​កម្ពុជា​។ ចិន​ក៏​ជា​ប្រទេស​តែមួយគត់ ដែល​បាន​ចេញ​សេចក្ដីថ្លែងការណ៍​គាំទ្រ​រដ្ឋាភិបាល​កម្ពុជា ក្នុង​ការចាប់​ឃុំខ្លួន​ប្រធាន​គណបក្ស​សង្គ្រោះ​ជាតិ ខណៈ​ដែល​ប្រទេស​ជាច្រើន មាន​សហគមន៍​អឺរ៉ុប សហរដ្ឋអាមេរិក ក៏ដូចជា​អង្គការ​អន្តរជាតិ​មួយចំនួន​ទៀត​បាន​ថ្កោលទោស​រដ្ឋាភិបាល និង​ទាមទារ​ឲ្យមាន​ការដោះលែង​ប្រធាន​គណ​បក្ស​ប្រឆាំង​វិញ ដើម្បី​ធានា​ដល់​ការបោះឆ្នោតជាតិ​ឆ្នាំ​ក្រោយ​។​

ក្រៅ​តែ​ជា​ដៃគូ​យុទ្ធសាស្ត្រ​ភូមិសាស្ត្រ​នយោបាយ​ដ៏​សំខាន់ ប្រទេស​ទាំង​ពីរ​ក៏​បាន​សន្យា​បង្កើន​ទំហំ​ពាណិជ្ជកម្ម​ទ្វេភាគី​ឲ្យដល់​៥​ពាន់​លាន់​ដុល្លារ​នៅក្នុង​អំឡុង​ឆ្នាំ​២០១៧​នេះ ខណៈ​ដែល​ឆ្នាំ​២០១៦​កន្លងទៅ​មាន​ជាង​៤​ពាន់​លាន​ដុល្លា​អាមេរិក​៕ដោយ៖ ធុច ធារ៉ា

 ពាក្យគន្លឹះ  កម្ពុជា ចិន

ព័ត៌មានផ្សេងទៀត