លោកឃួ​ង ស្រេង បង្គាប់​ឱ្យ​មន្ត្រី​រក​ព្រែក​ដែល​បាត់​មកវិញ​

07-09-2017 4:35 pm 4735
អភិបាលរាជធានីភ្នំពេញ លោក ឃួង ស្រេង ក្នុងសកម្មភាពត្រួតពិនិត្យការកាយលូនាពេលកន្លងមក ។ រូបថតពី fn ។

​អភិបាល​រាជធានី​ភ្នំពេញ​បាន​ឱ្យដឹងថា ព្រែក​ធម្មជាតិ​ដែល​ជា​ប្រឡាយ​មាន​តួនាទី​រំដោះ​ទឹក​ចេញ​យ៉ាង​សំខាន់​មួយ​កន្លែង នៅ​សង្កាត់​ព្រែក​ឯង​និង​សង្កាត់​ព្រែក​ថ្មី​ត្រូវបាន​ឈ្មួញ​ឃុបឃិត​គ្នា​ចាក់​លុប​បំបាត់​ធ្វើជា​កម្មសិទ្ធិ​ឯកជន ។ លោក ឃួ​ង ស្រេង ថា មន្ត្រី​ពាក់ព័ន្ធ​ដូចជា មន្ត្រី​សុរិយោដី មន្ត្រី​ធនធានទឹក​ជាដើម ត្រូវ​រក​ព្រែក​នេះ​ឱ្យ​ឃើញ​វិញ បើ​មិនឃើញ​ទេ គួរ​លាឈប់​ពី​ការងារ​របស់​ខ្លួន ព្រោះ​មិន​ដឹង​ថា​ធ្វើ​ការងារ​អី​កើត​ទៀត​ទេ ។​

​តាម​មន្ត្រី​មូលដ្ឋាន​បញ្ជាក់ថា ព្រែក​ធម្មជាតិ​នេះ​ស្ថិតក្នុង​សង្កាត់​ព្រែក​ថ្មី និង​សង្កាត់​ព្រែក​ឯង ខណ្ឌ​ច្បារអំពៅ ។ ព្រែក​នេះ​ត្រូវបាន​ឈ្មួញ ពិសេស​អ្នកស្រី ស៊ុយ សុផាន រំលោភ​ដោយ​ចាក់ដី​បំពេញ​យក​ជា​ដី​កម្មសិទ្ធិ​ផ្ទាល់ខ្លួន​ជាច្រើន​ឆ្នាំ​មកហើយ ពោល​គឺ​តាំងពី​សង្កាត់​នេះ​កាត់​ចូល​ទឹកដី​រាជធានី​ភ្នំពេញ​មកម្ល៉េះ ។ មន្ត្រី​ដដែល​បញ្ជាក់​បន្តថា ព្រែក​នេះ​ពិតជា​បាន​ដើរតួនាទី​យ៉ាង​សំខាន់ ដើម្បី​រំដោះ​ទឹក​ចេញ​ពី​សង្កាត់​ព្រែក​ថ្មី ពិសេស​សង្កាត់​ព្រែក​ឯង​ដោយ​ហូរ​ចូល​ទៅ​ទន្លេបាសាក់ ។​

​ដោយឡែក ព្រឹក​ថ្ងៃ​ទី​៧​កញ្ញា អភិបាល​ខណ្ឌ​ច្បារអំពៅ លោក ចេង មុនី​រ៉ា បាន​ចុះ​ទៅ​ត្រួតពិនិត្យ​ទីតាំង​ព្រែក​នោះ ដោយ​មាន​ការចូលរួម​ពី​មន្ត្រី​រដ្ឋាភិបាល​ផ្សេង​ទៀត ក្រោយ​មាន​ការបញ្ជា​ពី​លោក ឃួ​ង ស្រេង អភិបាល​រាជធានី​ភ្នំពេញ ។ ក្នុង​កិច្ចការ​ចុះ​ស្រាវជ្រាវ​នេះ គឺ​ធ្វើឡើង​ដើម្បី​កំណត់ និង​កាយ​ដី​ដាក់​ប្រព័ន្ធ​លូ​រំដោះ​ទឹក​ទូទាំង​សង្កាត់​ព្រែក​ថ្មី និង​សង្កាត់​ព្រែក​ឯង ៕

(​រាយការណ៍​ដោយ​៖ គង់ ឧត្តម​)

 ពាក្យគន្លឹះ  លោកឃួងស្រេង

ព័ត៌មានផ្សេងទៀត