រដ្ឋាភិបាល​ថៃ​​ចេញមុខ​បដិសេធ​​មិន​បាន​ជួយ​​អ្នកស្រី​យី​ង​ឡា​ក់​​ឲ្យគេ​ច​ខ្លួនទេ​

28-08-2017 11:39 am 3460
អ្នកស្រីយីងឡាក់ ស៊ីណាវ៉ាត្រាអតីតនាយករដ្ឋមន្ដ្រីថៃ

​ក្រុមប្រឹក្សា​ជាតិ​សម្រាប់​សន្ដិភាព​និង​សណ្ដាប់ធ្នាប់​(NCPO)​កាលពី​ថ្ងៃ​ទី​២៧​សីហា បាន​ចេញ​មុខ​បដិសេធ​ការចោទប្រកាន់ថា រដ្ឋាភិបាល​ជា​អ្នក​ជួយ​ឲ្យ​អ្នកស្រី​យី​ង​ឡាក់ ស៊ីណាវ៉ាត្រា​ចាកចេញ​ពី​ប្រទេស​ថៃ​ដោយ​សម្ងាត់​។​បន្ទាប់ពី​ទទួល​ដំណឹង​អ្នកស្រី​បាន​ចាកចេញ​ពី​ប្រទេស​ថៃ​ទៅ​ទីក្រុង​ឌូ​បៃ​នៃ​ប្រទេស​អារ៉ាប់​រួម ការរិះគន់​រដ្ឋាភិបាល​ថៃ​បាន​ផ្ទុះឡើង​នៅតាម​បណ្ដាញ​សង្គម និង​ប្រព័ន្ធ​ផ្សព្វផ្សាយ​។​ក្រុម​ប្រឆាំង​នឹង​អតីត​នាយករដ្ឋមន្ដ្រី​រូបនេះ​បាន​អះអាង​ថា ប្រសិនបើ​គ្មាន​ការ​លូកដៃ​ពី​អាជ្ញាធរ​ទេ អ្នកស្រី​យី​ង​ឡាក់​មិន​អាច​ចាកចេញ​ពី​ប្រទេស​បាន​ឡើយ​។​ពួកគេ​ទទូច​ឲ្យ​បើ​កការស៊ើបអង្កេត​។​

​អ្នកស្រី​យី​ង​ឡាក់ ស៊ីណាវ៉ាត្រា​មិន​បាន​បង្ហាញខ្លួន​នៅ​តុលាការ​ដើម្បី​ស្ដាប់​ការប្រកាស​សាលក្រម​ទេ​កាលពី​ថ្ងៃ​ទី​២៥​សីហា​។​សាលក្រម​ត្រូវ​លើក​ពេល​ទៅ​ប្រកាស​នៅ​ថ្ងៃ​ទី​២៧​កញ្ញា​វិញ​។​នៅ​ថ្ងៃ​ដដែល​តុលាការ​បាន​ចេញ​ដីកាចាប់ខ្លួន និង​បញ្ជា​ឲ្យ​រឹបអូស​ទ្រព្យសម្បត្ដិ​អ្នកស្រី​យី​ង​ឡាក់​ប្រមាណ​៣០​លាន​បាត​ផងដែរ​។​

​អ្នកស្រី​យី​ង​ឡាក់ ស៊ីណាវ៉ាត្រា​រង​ការចោទប្រកាន់​ពី​ការ​ធ្វេសប្រហែស​ក្នុង​កិច្ចការ​ទិញស្រូវ​អង្ករ​ប្រជាជន ធ្វើ​ឲ្យ​ខាតបង់​ថិ​វ​កា​ជាតិ​រាប់ពាន់​លាន​ដុល្លារ​អាមេរិក​។​ផែនការ​ទិញស្រូវ​អង្ករ​បាន​ផ្ដល់​តម្លៃ​ស្រូវ​អង្ករ​ប្រជាជន​ខ្ពស់​ជាង​តម្លៃ​ទីផ្សារ​ដល់​ទៅ​៥០​ភាគរយ​។​ប៉ុន្ដែ​នៅពេល​ការលក់​ចេញ​បាន​តម្លៃ​ថោក មាន​ស្រូវ​អង្ក​ស្ដុក​ទុក​ច្រើន ធ្វើឲ្យ​ខាត​ថវិកា​ជាតិប្រមាណ​៨​ពាន់​លាន​ដុល្លារ​អាមេរិក​។​អ្នកស្រី​ប្រឈម​នឹង​ការ​ជាប់ពន្ធនាគារ​១០​ឆ្នាំ និង​ពិន័យ​ជា​ប្រាក់​២​សែន​បាត​។​

​រដ្ឋាភិបាល​អ្នកស្រី​យី​ង​ឡាក់ ស៊ីណាវ៉ាត្រា ត្រូវ​យោធា​ធ្វើ​រដ្ឋប្រហារ​ទម្លាក់​កាលពី​ថ្ងៃ​ទី​២២​ឧសភា​ឆ្នាំ​២០១៤​។​ដ្បិតថា​ត្រូវ​ធ្លាក់​ពី​តំណែង និង​ជាប់​ជំពាក់ជំពិន​បណ្ដឹង​ករណី​ទិញស្រូវ​អង្ករ ប៉ុន្ដែ​អ្នកស្រី​យី​ង​ឡាក់​នៅតែ​ទទួលបាន​ការស្រឡាញ់​ពេញចិត្ដ​ក្នុង​ដួងចិត្ដ​កសិករ​។​អ្នកគាំទ្រ​បាន​អំពាវនាវ​រក​យុត្ដិធម៌​ជូន​អ្នកស្រី និង​ស្នើសុំ​ឲ្យ​ទម្លាក់បទ​ចោ​ទចោល​៕

 ពាក្យគន្លឹះ  អ្នកស្រីយីងឡាក់

ព័ត៌មានផ្សេងទៀត