ក្រុម​ប្រឆាំង​បន្ទោស​​រដ្ឋាភិបាលថា​ជាអ្នក​​​បើកដៃ​ឲ្យ​អ្នកស្រី​យី​ង​ឡាក់​​​​​ចេញ​ពី​ប្រទេស​ថៃ

27-08-2017 11:15 am 6464
​អតីត​នាយករដ្ឋមន្ដ្រី​ថៃ​អ្នកស្រី​យី​ង​ឡាក់ ស៊ីណាវ៉ាត្រា

​ក្រុម​ប្រឆាំង​នឹង​អតីត​នាយករដ្ឋមន្ដ្រី​ថៃ​អ្នកស្រី​យី​ង​ឡាក់ ស៊ីណាវ៉ាត្រា បាន​បន្ទោស​ទៅលើ​រដ្ឋាភិបាលយោធា​ដែល​កំពុង​ដឹកនាំ​ប្រទេស​បច្ចុប្បន្ន​ថា ជា​អ្នក​ជួយ​ឲ្យ​អ្នកស្រី​យី​ង​ឡាក់​ភៀសខ្លួន​ចេញពី​ប្រទេស​ថៃ​។​នៅក្នុង​សេចក្ដីថ្លែងការណ៍​ចេញ​កាលពី​ថ្ងៃ​ទី​២៦​សីហា ក្រុមប្រឆាំង​ទាំងនោះ​បាន​អំពាវនាវ​ឲ្យ​បើ​កការស៊ើបអង្កេត​។​ពួក​គេ​អះអាង​ថា​វា​មិន​អាច​ទៅរួច​ទេ ដែល​អ្នកស្រី​យី​ង​ឡាក់​អាច​ចាកចេញ​ពី​ប្រទេស​ថៃ​បាន បើ​គ្មាន​មន្ដ្រី​អាជ្ញាធរ​ទៅ​ពាក់ព័ន្ធ​នោះ​។​

​អ្នកស្រី​យី​ង​ឡាក់ ស៊ីណាវ៉ាត្រា​បាន​ភៀសខ្លួន​ទៅ​កាន់​ទីក្រុង​ឌូ​បៃ នៃ​ប្រទេស​អារ៉ាប់​រួម​ហើយ​។​នេះ​បើ​តាម​ការបញ្ជាក់​ពី​មន្ដ្រីជាន់ខ្ពស់ គណបក្ស​ភឿ​ថៃ​របស់​អ្នកស្រី​កាលពី​ថ្ងៃ​ទី​២៦​សីហា​។​ការប្រកាស​ធ្វើឡើង​មួយ​ថ្ងៃ​ប៉ុណ្ណោះ​បន្ទាប់​ពី​តុលាការ​កំពូល​ថៃ ចេញ​ដីកា​ចាប់ខ្លួន​អ្នកស្រី ហើយ​អ្នកស្រី​ក៏​មិន​បាន​បង្ហាញខ្លួន​នៅ​តុលាការ​កំពូល ស្ដាប់​ការប្រកាស​សាលក្រម​ដែរ​កាលពី​ថ្ងៃ​ទី​២៥​សីហា​។​ការប្រកាស​សាលក្រម ត្រូវ​លើក​ពេល​ទៅ​ប្រកាស​នៅ​ថ្ងៃទី​២៧​កញ្ញា​វិញ​។​

​តាម​ប្រភព​ពី​គណបក្ស​ភឿ​ថៃ​បន្ដថា អ្នកស្រី​យី​ង​ឡា​ក់បាន​ចាកចេញ​ពី​ប្រទេស​ថៃ​កាលពី​សប្ដាហ៍​មុន ដោយ​ឆ្លងកាត់​តាម​ប្រទេស​សិង្ហ​បុរី​ទៅ​ទីក្រុង​ឌូ​បៃ​នៃ​ប្រទេស​អារ៉ាប់​រួម ជា​កន្លែង​បងប្រុស​អ្នកស្រី​លោក​ថាក់ស៊ីន ស៊ីណាវ៉ាត្រា​រស់នៅ ក្រោយ​និរទេស​ចេញពី​ប្រទេស​ថៃ​កាលពី​ឆ្នាំ​២០០៨​។​មន្ដ្រីជាន់ខ្ពស់​នៃ​គណបក្ស​ភឿ​ថៃ​ដដែល​ប្រាប់ថា ដំបូង​ឡើយ​លឺដំណឹង​អ្នកស្រី​ធ្វើដំណើរ​ទៅ​ប្រទេស​កម្ពុជា ក្រោយមក​បន្ដ​តាម​ប្រទេស​សិង្ហ​បុរី​រួច​ក៏​ចេញ​ទៅ​ឌូ​បៃតែ​ម្ដង​។​

​អតីត​នាយករដ្ឋមន្ដ្រី​ថៃ​រូប​នេះ​រង​ការចោទប្រកាន់ថា ធ្វេសប្រហែស​ក្នុង​កិច្ច​ការងារ​ទិញស្រូវ​អង្ករ​ប្រជាជន ដែល​ធ្វើ​ឲ្យ​ខាតបង់​ថវិកា​ជាតិប្រមាណ​៨​ពាន់​លាន​ដុល្លារ​អាមេរិក​។​អ្នកស្រី​ធ្លាប់​បាន​បកស្រាយ​ថា អ្នកស្រី​ជា​អ្នក​ទទួល​ភារៈកិច្ច​គ្រប់​គ្រង​គោលនយោបាយ​ទិញ​ស្រូវ​អង្ករ​ពី​ប្រជាជន​មែន ប៉ុន្ដែ​មិន​បាន​គ្រប់គ្រង​កិច្ចការ​ប្រចាំ​ថ្ងៃ​ទេ​។​

​តាមរយៈ​បទ​ចោទ​នេះ​អ្នកស្រី​ប្រឈម​ការ​ជាប់​ពន្ធនាគា​ររ​ហូ​តដល់​១០​ឆ្នាំ និង​ពិន័យ​ជា​ប្រាក់​២​សែន​បាត​។​តុលាការ​កំពូល​ថៃ​ក្រៅ​ពី​ចេញ​ដីកាចាប់ខ្លួន បាន​បញ្ជា​ឲ្យ​រឹបអូស​ទ្រព្យសម្បត្ដិ​ចំនួន​៣០​លាន​បាត​ផងដែរ​។​គួរ​ជម្រាបជូន​ថា រដ្ឋាភិបាល​របស់​អ្នកស្រី​ត្រូវ​យោធា​ធ្វើ​រដ្ឋប្រហារ​ទម្លាក់​កាលពី​ខែ​ឧសភា​ឆ្នាំ​២០១៤​។​ប៉ុន្ដែ​ទោះជា​យ៉ាងណាក្ដី អ្នកស្រី​នៅតែមាន​ប្រជាប្រិយភាព​ខ្លាំង​ក្នុង​ដួងចិត្ដ​ប្រជាកសិករ រហូត​មាន​អ្នកគាំទ្រ​តវ៉ា​ប្រឆាំង​ការចោទប្រកាន់​៕

 ពាក្យគន្លឹះ  អ្នកស្រីយីងឡាក់

ព័ត៌មានផ្សេងទៀត