លោក​ឃួង ស្រេង​ប្រកាស​ចាត់វិធានការ​ចំពោះ​ការចាក់ដី​លុប​ប្រឡាយ​និង​អាង​ស្តុក​ទឹក​

06-08-2017 3:46 pm 3031
សកម្មភាពលោកឃួងស្រេងចុះពិនិត្យ​ទីតាំង​ប្រឡាយ​បង្ហូរទឹក និង​ស្ថានីយ៍​បូមទឹក​បឹងត្របែក

​លោក​ឃួង ស្រេង អភិបាល​រាជធានី​ភ្នំពេញ​នៅ​ថ្ងៃទី​៥ ខែ​សីហា បាន​ដឹកនាំ​ក្រុមន្ត្រី​ជំនាញ ចុះ​ទៅ​ត្រួតពិនិត្យ​ទីតាំង​ប្រឡាយ​បង្ហូរទឹក និង​ស្ថានីយ៍​បូមទឹក​បឹងត្របែក ដើម្បី​ពន្លឿន​ការរៀបចំ​ប្រឡាយ​នេះ​ឱ្យបាន​ស្អាត ងាយស្រួល​ស្ដារ​រំដោះ​ទឹក​។​

​ក្នុង​ការចុះ​ទៅ​ត្រួតពិនិត្យ​នោះ​លោក​ឃួង ស្រេង ក៏បាន​លើកឡើង​ផងដែរ​ថា សាលា​រាជធានី​ភ្នំពេញ មាន​វិធានការ​ដ៏​តឹងរឹង និង​គ្មាន​ការយោគយល់​ឡើយ ក្នុង​គោលបំណង​ទប់ស្កាត់ ការសង់​សំណង់​ខុសច្បាប់ ការចាក់​ដី​លុប​ប្រឡាយ លុប​អាង​ស្តុក​ទឹក ព្រោះតែ​កត្តា​ទាំងអស់នេះ​ហើយ ដែល​បាន​ចូលរួមចំណែក នាំ​ឲ្យ​ទឹកជន់​លិច នៅក្នុង​រាជធានី​ភ្នំពេញ​នោះ​...

​សំឡេង​លោក​ឃួង ស្រេង​៖

​លោក​អភិបាល​រាជធានី​ភ្នំពេញ​ក៏​បាន​បញ្ជាក់បន្ថែម​ថា ជា​រៀង​រាល់​សប្តាហ៍​លោក​តែងតែ​ចុះ​ត្រួតពិនិត្យ​តំបន់​មួយចំនួន​ដែល​ងាយ​រងគ្រោះ​ដោយ​ទឹកជំនន់ ព្រោះ​លោក​យល់ថា​បើ​មិន​ចុះ​ត្រួតពិនិត្យ​ដោយ​ផ្ទាល់​ទេ​ប្រាកដជា​មាន​ជន​ឆ្លៀត​ឳ​កាស​រៀបចំ​សាងសង់ និង​ចាក់ដី​លើ​អាងទឹក និង​ប្រឡាយ​ទឹក​ជាក់​ជាមិនខាន​។​

​លោក​បាន​បន្ថែមថា​ដើម្បី​អោយ​ការគ្រប់គ្រង​បញ្ហា​នេះ​កាន់តែ​មាន​ប្រសិទ្ធភាព​លោក​បាន​ចាត់​ឲ្យ​អភិបាលរង និង​មន្ត្រី​ជំនាញ ចុះ​ថត​នៅ​តាម​ប្រឡាយ ដើម្បី​ប្រគល់​ឲ្យ​អភិបាលខណ្ឌ និង​ចៅសង្កាត់ គ្រប់គ្រង ធ្វើយ៉ាងណា​កុំឲ្យ​មាន​សំណង់​ថ្មី​កើតឡើង​។​

​គួរបញ្ជាក់​ថា​ការចាក់​ដី​លុប​បឹង ប្រឡាយ និង​ការសាងសង់​សំណង់​ខុសច្បាប់​ផ្សេងៗ ក៏​ជា​ផលប៉ះពាល់​ផងដែរ ព្រោះ​វា​អាច​បណ្តាលអោយ​មាន​ការ​ជន់​លិច​តាម​ដងផ្លូវ​មួយចំនួន​នៅពេល​មាន​ភ្លៀង​ធ្លាក់​ខ្លាំង​ម្តងៗ ហើយ​បញ្ហា​ជន់​លិច​នេះ​ក៏​មាន​ការរិះគន់​ពី​សំណាក់​ប្រជាពលរដ្ឋ​ផងដែរ​៕​

 ពាក្យគន្លឹះ  សាលារាជធានីភ្នំពេញ

ព័ត៌មានផ្សេងទៀត