ចិន​ចង់​មាន​​ទំនាក់ទំនង​ល្អ​​នឹង​អាមេរិក​​តែ​មិន​ចង់​បាត់បង់​​កូរ៉េខាងជើង​

01-08-2017 3:54 pm 891
ប្រធានាធិបតីចិន(ឆ្វេង)និងប្រធានាធិបតីអាមេរិក

​លោក​ត្រាំ​បាន​បង្ហោះ​សារ​លើ​ប្រព័ន្ឋ​Twitter ថា មាន​ការខកចិត្ត​យ៉ាង​ខ្លាំង ចំពោះ​ចិន ក្រោយ​កូរ៉េខាងជើង​ធ្វើតេស្ត​មី​ស៊ី​ល​ICBM​។ ខកចិត្ត ព្រោះ​ចិន​ហាក់​មិន​បាន​ចូលរួម​ឲ្យបាន​សកម្ម នៅ​ក្នុង​ការរារាំង​កូរ៉េខាងជើង កុំឲ្យ​ធ្វើ​តេ​ស្តមី​ស៊ី​ល​ដែល​អន្តរជាតិ​ហាមឃាត់​។ លោក​ត្រាំ​បាន​គំរាម​ចិន​ផង​ដែរ​ថា ការមិន​យកចិត្តទុកដាក់​ទប់ស្កាត់​សកម្មភាព​របស់​កូរ៉េខាងជើង អាច​នឹង​ធ្វើឲ្យប៉ះពាល់​ដល់​ពាណិជ្ជកម្ម​របស់​ប្រទេស​ទាំង​ពីរ​។​

​ឆ្លើយតប​នឹង​ការលើកឡើង​របស់​លោក​ត្រាំ ក្រសួងការបរទេស​ចិន​បានចេញ​សេចក្តីថ្លែងការណ៍​បញ្ជាក់​ថា បញ្ហា​កូរ៉េខាងជើង​មិនមែន​ជា​បញ្ហា​របស់​ប្រទេស​មួយ​ទេ ដូច្នេះ​ទាំងអស់គ្នា​ត្រូវ​ធ្វើការ​ជាមួយគ្នា​ក្នុង​ការស្វែងរក​ដំណោះស្រាយ​។ សេចក្តីថ្លែងការណ៍​ធ្វើឡើង​កាលពី​ថ្ងៃ​ទី​៣១​ខែកក្កដា បញ្ជាក់ទៀតថា ចិន​ចង់ឱ្យ​ពាណិជ្ជកម្ម​ជាមួយ​អាមេរិក​នៅ​តែ​ដំណើរការ​ល្អ ហើយ​សន្តិភាព​របស់​ចិន​ជាមួយ​ឧបទ្វីប​កូរ៉េ​នៅ​តែ​រឹងមាំ​។

​ស្ថិតក្រោម​រដ្ឋបាល​រប​ស់​លោក​ដូណាល់​ត្រាំ ទំនាក់ទំនង​ពាណិជ្ជកម្ម​រវាង​ចិន​និង​អា​មរិ​ក​ហាក់​មាន​សន្ទុះ​សន្សឹមៗ​ឡើងវិញ ពោល​ភាគី​ទាំង​ពីរ​កាលពី​ពេល​ថ្មីៗ​ទើបតែ​ព្រមព្រៀងគ្នា​លើ​ការនាំចេញ​និង​នាំចូល​ផលិតផល​មួយចំនួន​។ កិច្ចព្រមព្រៀង​ពាណិជ្ជកម្ម​ថ្មី គឺ​ចិន​នឹង​នាំ​អង្ករ​ចូល​ពី​អាមេរិក​លើក​ដំបូង ខណៈ​ចិន​ជួប​កង្វះខាត​អង្ករ​ដើម្បី​ផ្គត់ផ្គង់​ក្នុងស្រុក និង​មិន​អាច​ពឹងពាក់​ប្រទេស​មួយចំនួន​ក្នុង​តំបន់​អាស៊ី ដោយសារ​ភាព​ប្រទាំង​ប្រទើស​ពី​អតីតកាល​។ មុន​កិច្ចព្រមព្រៀង​មួយ​នេះ ក្រសួង​កសិកម្ម​អាមេរិក​បាន​ប្រកាស​កិច្ចព្រមព្រៀង​មួយ ដែល​អនុញ្ញាត​ឲ្យ​អាមេរិកអា​ចនាំ​សាច់គោ និង​ឧស្ម័ន​ធម្មជាតិ​ចូលក្នុង​ទីផ្សារ​នៅ​ចិន​ផង​ដែរ​។ ដូច្នេះ ចិន​ពិតណាស់​មិន​ចង់ឲ្យ​ទំនាក់ទំនង​ពាណិជ្ជកម្ម​ដែល​ទើប​ដុះ​ពន្លក​ត្រូវ​ខូចខាត​នោះ​ទេ​។​

​ងាក​មក​ទំនាក់ទំនង​ជាមួយ​កូរ៉េខាងជើង​វិញ ចិន​គឺ​ជា​សម្ព័ន្ធមិត្ត​ជិតស្និទ្ធ​តាំងពី​សម័យ​សង្គ្រាម​ឆ្នាំ​១៩៥០​មក​។ ជា​មូលហេតុ​មួយ​ដែល​ធ្វើឲ្យ​ចិន​ពិបាក​ក្នុង​ការលូកដៃ​ចូល​ឲ្យ​ជ្រៅ​ក្នុង​សំណុំរឿង​នុយក្លេអ៊ែរ​កូរ៉េខាងជើង​។ ប៉ុន្តែ​ដ្បិត​ចិន ជា​សម្ព័ន្ធមិត្ត​របស់​កូរ៉េខាងជើង​យ៉ាងណាក៏ដោយ ក៏​ចិន​នៅតែ​ខឹងសម្បារ ចំពោះ​ការសាកល្បង​នុយក្លេអ៊ែរ​និង​មី​ស៊ី​ល​របស់​កូរ៉េ​ខាងជើង​ដែរ​។ យ៉ាងណា ចិន​មិន​អាច​លេង​ដៃ​ធ្ងន់​លើ​កូរ៉េខាងជើង​ឡើយ ព្រោះ​មិត្តភាព​។​

សូមបញ្ជាក់​ថា កូរ៉េខាងជើង កាលពី​ថ្ងៃ​សៅរ៍​ទី​២៩ បាន​ធ្វើតេស្ត​មី​ស៊ី​ល​ICBM ហើយក៏​បាន​ប្រកាស​ពី​ភាពជោគជ័យ នៅ​ក្នុង​ការ​ធ្វើ​តេស្ត​មី​ស៊ី​ល ICBM​ជា​លើក​ទី​២​នេះ​ផង​ដែរ​។ កូរ៉េខាងជើង​បញ្ជាក់​ម្តង​ហើយ​ម្តងទៀត​ថា គ្រាប់​មី​ស៊ី​ល​ប្រភេទ​នេះ​អាច​បាញ់​ទៅ​ដល់​ដែនដី​របស់​អាមេរិក​។ យ៉ាងណា ក្រុម​អ្នកស្រាវជ្រាវ​បាន​រាយការណ៍​កាលពី​ថ្ងៃ​ចន្ទ ដោយ​ផ្អែក​លើ​វីដេអូ​នៃ​ការ​ធ្វើ​តេស្ត​មី​ស៊ី​ល ថា កូរ៉េខាងជើង​ប្រហែល​មិនទាន់​មាន​សមត្ថភាព​គ្រប់គ្រាន់ ក្នុងការ​ធ្វើ​មី​ស៊ី​ល​នុយក្លេអ៊ែរ​នៅឡើយ​ទេ ព្រោះ​មី​ស៊ី​ល​ដែល​បាន​ធ្វើ​តេស្ត​នោះ វា​បាន​ខូច​មុន​ដល់​គោលដៅ​៕ អត្ថបទ​ដោយ​៖ អ៊ុំ ចាន់​រក្សា​

 ពាក្យគន្លឹះ  ចិន-អាមេរិក

ព័ត៌មានផ្សេងទៀត