រថយន្តក្រុង​ថ្មី​នឹង​ដាក់​អោយ​ដំណើរការ​ក្នុង​ពេល​ឆាប់ៗ​នេះ​

18-07-2017 4:54 pm 2354
រថយន្តក្រុង១០០គ្រឿងដែលរដ្ឋាភិបាលចិនផ្តល់ជូនសាលារាជធានីភ្នំពេញ កាលពីថ្ងៃទី១៣ ខែកក្កដា

​រថយន្តក្រុង​ថ្មី ដែល​សាលា​រាជធានី​ភ្នំពេញ ទើបតែ​ទទួលបាន​ពី​ចិន​ចំនួន​១០០​គ្រឿង នឹង​ដាក់​អោយ​ប្រើប្រាស់ ក្នុង​ការដឹកជញ្ជូន​ប្រជាពលរដ្ឋ ក្នុង​ពេល​ឆាប់ៗ​ខាងមុខនេះ​។​ការដាក់អោយ​ដំណើរការ​នេះ​ដែរ ក្នុង​ដំណាក់កាល​ទី​១ ខាង​សាលាក្រុង​ក៏​គ្រោង​នឹង រៀបចំ​ខ្សែ​រត់​ចំនួន​បី​ខ្សែ​បន្ថែមទៀត លើ​ខ្សែ​រត់​ចាស់ ដែល​មាន​បី​ខ្សែ​រួចមកហើយ ។​

​បើ​តាម​លោក​ម៉េត មាស​ភក្តី អ្នកនាំពាក្យ​សាលា​រាជធានី​ភ្នំពេញ បាន​អោយ​វិទ្យុ​វាយោ​ដឹង​នៅ​ថ្ងៃ​ទី​១៨ ខែកក្កដា​នេះ​ថា រថយន្តក្រុង​ថ្មី​ចំនួន ៥៧​គ្រឿង នឹង​យកមក​ជំនួស​រថយន្តក្រុង​ចាស់​ទាំង ៥៧​គ្រឿង​ដែល​កំពុងតែ​ប្រើប្រាស់​សព្វថ្ងៃ ហើយ​រថយន្ត​ចាស់ៗ​ទាំងនោះ នឹង​ត្រូវ​យក​ទៅ​ជួសជុល កែលម្អ​ឡើងវិញ​។​

លោក​ម៉េត មាស​ភក្តី បានអោយ​ដឹង​បន្ថែម​ថា រថយន្តក្រុង​ថ្មី​នេះ​នឹង​ដាក់​អោយ​ដំណើរការ​បន្ថែមទៀត ប្រសិនបើ​មាន​តម្រូវការ​ពី​ប្រជាពលរដ្ឋ ។​ប៉ុន្តែ​លោក​នៅតែ​មាន​គំនិត​សុទិដ្ឋិនិយម​ថា អ្នកជិះរថយន្ត​ក្រុង​នេះ​នឹង​មាន​ការកើនឡើង ព្រោះ​បច្ចុប្បន្ន​អ្នក​ដែល​ជិះ​រថយន្តក្រុង​សាធារណៈ​មាន​ចំនួន​ជា​មធ្យម​ជិត​៧,០០០​នាក់ ក្នុង​មួយ​ថ្ងៃៗ​...

​សំឡេង​លោក​ម៉េត មាស​ភក្តី​៖

​ចំណែក​នៅក្នុង​កិច្ចប្រជុំ​នា​ព្រឹក​ថ្ងៃ​ទី​១៨ ខែកក្កដា​នេះដែរ លោក​ឃួង ស្រេង អភិបាល​រាជធានី​ភ្នំពេញ​បាន​ណែនាំ​ឲ្យ​អ្នកបើកប​ររថយន្តក្រុ​ង​សាធារណៈ​ទាំងអស់​អោយ ចេះ​ស្រឡាញ់ រថយន្ត​ក្រុង​អោយ​ដូច​រថយន្ត​ផ្ទាល់ខ្លួន ត្រូវមាន​ក្រមសីលធម៌ គោរព​ច្បាប់​ចរាចរណ៍​និង​មាន​ការយោគយល់ ឲ្យបាន​ច្រើន​ដើម្បី​កាត់បន្ថយ ការ​ថ្នាំងថ្នាក់​ពី​ប្រជាពលរដ្ឋ និង​កាត់បន្ថយគ្រោះថ្នាក់​ចរាចរណ៍​ផង​ដែរ​។​

សូម​បញ្ជាក់​ផង​ដែរ​ថា​ក្រៅ​ពី​ជំនួយ​ជា​រថយន្តក្រុង ១០០​គ្រឿង ពី​រដ្ឋាភិបាល​ចិន នៅ​ដើមឆ្នាំ​២០១៨ រាជរដ្ឋាភិបាល ជប៉ុន នឹង​ប្រគល់​ជូន​រថយន្តក្រុង ចំនួន​៨០​គ្រឿង​ទៀត ដល់​រដ្ឋបាល​រាជធានី​ភ្នំពេញ ក្នុង​ចំណោម​រថយន្ត ចំនួន​១៤០​គ្រឿង​ដែល​នឹង​ត្រូវ​ប្រគល់ ជូន​ជា​បន្តបន្ទាប់ នៅពេល ខាងមុខនេះ​៕

 

 

 

 

 

 

 

 


 ពាក្យគន្លឹះ  សាលារាជធានីភ្នំពេញ

ព័ត៌មានផ្សេងទៀត