កម្ពុជា​-​វៀតណាម​​ចុះ​​MOU​ ​៤​​បន្ថែម​​ទៀត​​និង​​សន្យា​​បន្ត​​សហប្រតិបត្តិការ​​តាម​​ព្រំ​ដែន​​ឲ្យ​​ល្អ​

25-04-2017 3:54 pm 1230

ថ្នាក់ដឹកនាំ​កំពូល​កម្ពុជា វៀតណាម នៅ​ថ្ងៃ​នេះ​ភាគី​ទាំងពីរ​បាន​សម្រេច​ចុះហត្ថលេខា​រួមគ្នា​លើ​អនុស្សារណៈ នៃ​ការយោគយល់ (MOU) ចំនួន​៤ ដែល​ក្នុងនោះ​រួមមាន ទី​១ អនុស្សារណៈ​នៃ​ការយោគយល់​គ្នា​អំពី​ការ​សិក្សា​រួម ស្តី​ពី​ការសាងសង់​ផ្លូវ​ល្បឿន​លឿន​ភ្នំពេញ​-​បាវិត និង​ផ្លូវ​ល្បឿន​លឿន ហូ​ជី​មី​ញ​-​ម៉ក់​បៃ​។​

​ទី​២ អនុស្សារណៈ​នៃ​ការយោគយល់​គ្នា​ស្តីអំពី គម្រោង​សាងសង់​មជ្ឍមណ្ឌល​ផ្តល់​សេវា​ដោយ​ស្ម័គ្រចិត្ត ដល់​អ្នកញៀន​គ្រឿងញៀន​នៅ​ខេត្ត​ព្រះសីហនុ​។​
​ទី​៣ អនុស្សារណៈ​បន្ត​សុពលភាព​នៃ​អនុស្សារណៈ កិច្ចសហប្រតិបត្តិការ​ទ្វេភាគី លើ​វិស័យ​ជលផល និង​ទី​៤ អនុស្សារណៈ​នៃ​ការយោគយល់​គ្នា​ស្តី​អំពី​ការគាំទ្រ​ការសាងសង់ មហាវិថី​មិត្តភាព ភ្នំពេញ ហាណូយ​។​

ដោយឡែក​ពាក់ព័ន្ធ​នឹង​បញ្ហា​ព្រំដែន​វិញ រដ្ឋាភិបាល​ទាំង​ពីរ​បាន​ឯកភាពគ្នា ដោយ​អនុញ្ញាត​ឱ្យ​គណៈកម្មការ​ព្រំដែន បន្ត​ធ្វើការ​ជាមួយគ្នា ក្នុង​នោះ​រដ្ឋាភិបាល​នៃ​ប្រទេស​ទាំង​ពីរ នឹង​បន្ត​កសាង​ស្ពាន​នៅ​តំបន់​ផ្សេងទៀត​។ ប្រទេស​វៀតណាម ក៏បាន​ផ្តល់​ថវិកា​២​លាន​ដុល្លា​ដល់​កម្ពុជា​សម្រាប់​សាងសង់​ផ្សារ នៅ ខេត្ត​ត្បូងឃ្មុំ​ជាប់​ព្រំប្រទល់​ប្រទេស​វៀតណាម​។

ក្នុង​ជំនួប​ពិភាក្សា​នេះដែរ លោក​ហ៊ុន សែន​ក៏​បាន​ជំរុញ​ឱ្យ​នាយក​រដ្ឋមន្ត្រី​វៀតណាម ធ្វើយ៉ាងណា​ឱ្យ​ពាណិជ្ជកម្ម​តាម​ព្រំដែន​មាន​ភាពរលូន និង​ធ្វើឱ្យ​តំបន់​ព្រំដែន​នៃ​ប្រទេស​ទាំង​ពីរ​មាន​សុខសន្តិភាព និង​រីកចម្រើន​។

​សូម​បញ្ជាក់​ផង​ដែរ​ថា ការចុះ​អនុស្សារណៈ​យោគយល់​រវាង​ប្រទេស​កម្ពុជា និង​ប្រទេស​វៀតណាម​នេះ​ធ្វើឡើង​នៅក្នុង​ជំនួប​ពិភាក្សា​ការងារ​រវាង​លោក​ហ៊ុន សែន និង​លោក​ង្វៀង សួន​ហ្វ៊ុក នាយករដ្ឋមន្ត្រី​វៀតណាម​នា​វិមាន​សន្តិភាព នៅ​ថ្ងៃ​ទី​២៥ មេសា នេះ​៕


 ពាក្យគន្លឹះ  កម្ពុជា វៀតណាម

ព័ត៌មានផ្សេងទៀត