ថ្នាក់ដឹកនាំ​កំពូលៗ​រដ្ឋាភិបាល​ផ្ញើ​សារ​រំលែក​ទុក្ខ​គ្រួសារ​សព​លោក​សុខ អាន​

16-03-2017 11:41 am 3353

​ក្រោយ​ទទួលដំណឹង​មរណភាព​របស់​សុខ អាន រដ្ឋមន្ត្រី​ទីស្តីការគណៈរដ្ឋមន្ត្រី ថ្នាក់ដឹកនាំ​កំពូលៗ​រដ្ឋាភិបាល បាន​ផ្ញើ​លិខិត​រំលែក​មរណទុក្ខ ដល់​លោក​ស្រី អា​ន្នី សុខ អាន និង​ក្រុមគ្រួសារ​នៃ​សព​។ លោក​សាយ ឈុំ ប្រមុខរដ្ឋស្តីទី បាន​សម្តែង​ការសោកស្តាយ អាឡោះអាល័យ​ជាទី​បំផុត ជាមួយ​លោកស្រី​ជា​ភរិយា និង​ក្រុមគ្រួសារ​ចំពោះ​ការបាត់បង់ លោក​សុខ អាន ដែល​ជា​អ្នកដឹកនាំ​ដ៏​ឆ្នើម​មួយរូប របស់​ប្រជាជាតិ​ខ្មែរ​។

​ប្រមុខ​រដ្ឋាភិបាល លោកនាយក​រដ្ឋមន្ត្រី​ហ៊ុន សែន ក៏​បាន​ផ្ញើ​សារ​រំលែក​ទុក្ខ ដោយ​បាន​សរសេរ​រៀបរាប់ថា មរណភាព​របស់ លោក​សុខ អាន គឺជា​ការ​បាត់​បង់​ឧត្តម​ស្វាមី ប្រកប​ដោយ​ភក្តីភាព​បំផុត ចំពោះ​ភរិយា ហើយក៏​ជា​ការបាត់បង់​លោកឪពុក និង​ជីតា​ពោរពេញ ដោយ​ព្រហ្ម​វិហារធម៌ មិនចេះ​រីងស្ងួត​ចំពោះ បុត្រាបុត្រី បុត្រាបុត្រី​ប្រសា និង​ចៅៗ​ទាំងអស់​ជា​ស្រឡាញ់​។ លើសពីនេះ​ទៀត នេះ​ក៏​ជា​ការបាត់បង់​ដ៏​ធំធេង​នូវ​ឥស្សរជន​ដ៏​ឆ្នើម របស់​ជាតិ​មួយរូប ដែល​បាន​បំរើ​ឧត្តមប្រយោជន៍ ជាតិ សាសនា ព្រះមហាក្សត្រ ព្រមទាំង​បាន​ធ្វើ​ពលិកម្ម​សព្វបែបយ៉ាង​។ ជាមួយគ្នានេះ លោក​ស ខេង រដ្ឋមន្ត្រីក្រសួង​មហាផ្ទៃ ចូលរួម​រំលែក​ទុក្ខ​ផងដែរ​។ ក្រៅពីនេះ ក៏​មាន​ថ្នាក់ដឹកនាំ​សំខាន់ៗ​ជាច្រើន​រូប​ផ្សេងទៀត សុទ្ធតែ​បាន​បង្ហាញ​នូវ​ការសោកស្តាយ និង​ចូលរួម​រំលែក​ទុក្ខ​យ៉ាង​ក្រៀមក្រំ ចំពោះ​ក្រុម​គ្រួសារ​នៃ​សព​។

​សព​លោក​សុខ អាន រដ្ឋមន្ត្រី​ទីស្តីការគណៈរដ្ឋមន្ត្រី​កំពុង​តម្កល់ នៅ​គេហដ្ឋាន​របស់​លោក បន្ទាប់ពី​ត្រូវ​បាន​ដឹកនាំ​យន្តហោះ មកដល់​កម្ពុជា​នៅ​វេលា​ម៉ោង​៥​ព្រឹក​ថ្ងៃ​ទី​១៦ មីនា​នេះ​។ សព ត្រូវបាន​ក្រុមគ្រួសារ​រៀបចំ​ធ្វើបុណ្យ​តាម​ប្រពៃណី ស្ថិតនៅ​ផ្ទះ​លេខ​៧០ ផ្លូវ​២១៤ សង្កាត់​បឹងរាំង ខណ្ឌដូនពេញ​។ ពិធី​បុណ្យ​ធ្វើ​ឡើង ក្រោម​ការគ្រប់គ្រង​ដោយ​គណៈកម្មការ​រៀបចំ​បុណ្យសព ដែល​រដ្ឋាភិបាល​បាន​សម្រេច​បង្កើត ដឹកនាំ​ដោយ​លោក​ប៊ិន ឈិន​។​

​គួរបញ្ជាក់​ថា លោក​សុខ អាន រដ្ឋមន្ត្រី​ទទួលបន្ទុក ទីស្តីការគណៈរដ្ឋមន្ត្រី បាន​ទទួលមរណភាព​នៅវេលា​ម៉ោង ៦៖៣២​នាទី​ល្ងាច នា​ថ្ងៃ​ទី​១៥ ខែ​មីនា នៅ​មន្ទីរពេទ្យក្រុង​ប៉េកាំង ប្រទេស​ចិន ក្នុង​ជន្មាយុ​៦៦​ឆ្នាំ ដោយ​រោគាពាធ​។ ដោយៈ​សៅ វិសាល​

 ពាក្យគន្លឹះ  លោកសុខ អាន

ព័ត៌មានផ្សេងទៀត