រដ្ឋាភិបាល​សម្រេច​បង្កើត​គណៈ​កម្ម​ការរៀបចំ​ពិធី​បុណ្យ​សព​លោក​សុខ អាន​

15-03-2017 9:04 pm 3523

​ភ្លាមៗ​ក្រោយ​ទទួលដំណឹង​មរណភាព រដ្ឋាភិបាល​កម្ពុជា បាន​សម្រេច​បង្កើត​គណៈ​ក​ម្មការ ដើម្បី​រៀបចំ​បុណ្យ​សព​លោក​សុខ អាន រដ្ឋមន្ត្រី​ទីស្តីការគណៈរដ្ឋមន្ត្រី​។​

​គណៈកម្មការ​រៀបចំ​បុណ្យ​សព​នេះ ដឹកនាំ​ដោយ លោក​ប៊ិន ឈន ជា​ប្រធាន និង សម្តេច​ព្រះ​ពោធិ​វង្ស អំ លឹម​ហេង ព្រះសង្ឃ​នាយករង​ទី​២ នៃ​ព្រះរាជា​ណាក​ចក្រ​កម្ពុជា ជា​អនុប្រធាន រួមទាំង​សមាជិក​ជាច្រើន​ទៀត​។

គណៈកម្មការ​នេះ ត្រូវបាន​បែងចែក​ជា​អនុគណកម្មការ​ជាច្រើន​ទៀត ដើម្បី​គ្រប់គ្រង​កម្មវិធី​បុណ្យ ដូចជា ខាង​ពិធី​សាសនា ពិធី​ផ្លូវការ​នៅ​គេហដ្ឋាន និង​ពិធី​ដង្ហែ​សព​ទៅ​ឈាបនដ្ឋាន ដឹកនាំ​ដោយ​លោក​ហ៊ឹម ឆែម រដ្ឋមន្ត្រីក្រសួង​ធម្មការ និង​សាសនា​។ អនុគណៈកម្មការ ពិធីការ បដិសណ្ឋារកិច្ច និង​ព័ត៌មាន ដឹកនាំ​ដោយ​លោកណូ សម្បុ​ក ទីប្រឹក្សា​អម​គណៈកម្មាធិការ​ជាតិ​រៀបចំ​បុណ្យជាតិ​-​អន្តរជាតិ​។ អនុគណៈកម្មការ សន្តិសុខ ដឹកនាំ​ដោយ​លោក​នេត សាវឿន អគ្គស្នងការ​នគរបាល​ជាតិ និង​អនុគណៈកម្មការ​ផ្គត់ផ្គង់ និង​ហិរញ្ញវត្ថុ ដឹកនាំ​ដោយ​លោក​ជូ គឹម​ឡេង រដ្ឋលេខាធិការ​ក្រសួង​សេដ្ឋកិច្ច​។​

​សូមបញ្ជាក់​ថា លោក​សុខ អាន រដ្ឋមន្ត្រី​ទទួលបន្ទុក ទីស្តីការគណៈរដ្ឋមន្ត្រី បាន​ទទួលមរណភាព នៅវេលា​ម៉ោង​១៨៖៣២​នាទី នា​ថ្ងៃ​ទី​១៥ ខែ​មីនា ឆ្នាំ​២០១៧​នេះ នៅ​មន្ទីរពេទ្យ ក្នុង​ក្រុង​ប៉េកាំង ប្រទេស​ចិន ក្នុង​ជន្មាយុ​៦៦​ឆ្នាំ ដោយ​រោគាពាធ​៕ ដោយៈ​សៅ វិសាល​

 ពាក្យគន្លឹះ  លោកសុខ អាន

ព័ត៌មានផ្សេងទៀត