អាមេរិក ជប៉ុន កូរ៉េខាងត្បូង​​ស្នើឲ្យ​UN​​បើក​កិច្ចប្រជុំ​​ក្រោយ​កូរ៉េខាងជើង​​ធ្វើតេស្ដ​មី​ស៊ី​ល​

13-02-2017 10:19 am 1395
ទូរទស្សន៍កូរ៉េខាងត្បូងដែលចុះផ្សាយពីការធ្វើតេស្ដមីស៊ីលរបស់កូរ៉េខាងជើង

​អាមេរិក ជប៉ុន និង​កូរ៉េខាងត្បូង​កាលពី​ថ្ងៃ​ទី​១២​កុម្ភៈ បាន​ស្នើ​ឲ្យ​ក្រុមប្រឹក្សាសន្ដិសុខ​អង្គការ​សហប្រជាជាតិ បើ​កិច្ចប្រជុំ​ពិភាក្សា​បន្ទាន់​ក្រោយ​ការ​ធ្វើ​តេស្ដ​មី​ស៊ី​ល​របស់​កូរ៉េ​ខាងជើង​ជាថ្មី​។​ជា​ការ​ធ្វើ​តេស្ដ​លើកដំបូង​ចាប់តាំងពី​លោក​ដូណាល់ ត្រាំ​ស្បថ​ចូលកាន់​តំណែង​ប្រធានាធិបតី​អាមេរិក​។​ក្រុមប្រឹក្សាសន្ដិសុខ​អង្គការសហប្រជាជាតិ​ត្រូវ​ជួប​ពិភាក្សា​នៅ​ថ្ងៃទី​១៣​កុម្ភៈ​នេះ​ហើយ​។​

​កូរ៉េ​ខាងជើង​បាន​ប្រកាស​ថា បាន​ធ្វើតេស្ដ​មី​ស៊ី​ល​ដោយ​ជោគជ័យ តាម​ការបញ្ជា​របស់​លោក​គីម ជុង​អ៊ុន​។​មី​ស៊ី​ល​បាន​បាញ់​កាលពី​ម៉ោង​ប្រមាណ​៧.៥៥​នាទី​ព្រឹក​ថ្ងៃអាទិត្យ​ទី​១២​កុម្ភៈ ពី​មូលដ្ឋាន​ទ័ពអាកាស​Banghyon​ស្ថិត​ក្នុង​ខេត្ដ​ភាគ​ខាងលិច​ទីក្រុង​ព្យុងយ៉ាង ឆ្ពោះទៅ​តំបន់​ភាគ​ខាងកើត​ប្រទេស​គឺ​សំដៅ​ទៅ​សមុទ្រ​ជប៉ុន​។​មី​ស៊ី​ល​បាន​ហោះ​ចម្ងាយ​ប្រមាណ​ជា​៥០០​គីឡូម៉ែត្រ​មុន​ធ្លាក់​ចូល​ក្នុង​សមុទ្រ​។​

ការ​ធ្វើ​តេស្ដ​មី​ស៊ី​ល​របស់​កូរ៉េខាងជើង​ពេលនេះ បន្ទាប់​ពី​ជប៉ុន​ប្រតិកម្ម​យ៉ាងខ្លាំង​ពី​ការ​ធ្វើ​តេស្ដ​មុនៗ ហើយ​លោក​អាបេ​នាយករដ្ឋមន្ដ្រីជ​ប៉ុន បាន​និយាយ​ពេល​ធ្វើ​សន្និសីទកាសែត​នៅ​រដ្ឋ​Florida​សហរដ្ឋអាមេរិក​ជាមួយ​លោក​ដូណាល់ ត្រាំ​ថា សកម្មភាព​កូរ៉េខាងជើង​ពិតជា​ទង្វើ​មិន​អាច​អត់​ទ្រាំ​បាន​។​លោក​ដូណាល់ ត្រាំ​ក៏​គាំទ្រ​១០០​ភាគរយ​ដល់​នាយករដ្ឋមន្ដ្រី​ជប៉ុន​។​

កូរ៉េខាងត្បូង​វិញ​ក៏​ប្រតិកម្ម​នឹង​កូរ៉េខាងជើង​ដូចគ្នា ហើយ​បញ្ជាក់ថា​ការ​ធ្វើ​តេស្ដ​មី​ស៊ី​ល​នៅពេលនេះ ក្នុង​គោលបំណង​ចង់​ទាក់ទាញ​ឲ្យ​ពិភពលោក ចាប់អារម្មណ៍​ពី​សមត្ថភាព​នុយក្លេអ៊ែរ​និង​មី​ស៊ី​ល​របស់គេ​។​បើ​តាម​ការសន្និដ្ឋានរ​បស់​កូរ៉េខាងត្បូង ទង្វើ​របស់​កូរ៉េ​ខាងជើង​គឺ​ជា​ផ្នែក​មួយ​ឆ្លើយតប​នឹង​រដ្ឋបាល​ថ្មី​របស់​អាមេរិក ដែល​នៅតែ​មាន​ជំហរ​រឹងមាំ​ប្រឆាំង​នឹង​កូរ៉េខាងជើង​ដូច​រដ្ឋបាល​មុន​៕

ព័ត៌មានផ្សេងទៀត