២​សប្ដាហ៍​ទៀត​​ការចុះឈ្មោះ​បោះឆ្នោត​នឹងត្រូវ​បញ្ចប់​ ខណៈ​អ្នក​ចុះ​​ឈ្មោះ​រួច​​មាន​ត្រឹម​​៧៣%​

15-11-2016 1:28 pm 1379

​ថ្ងៃទី​១៥ ខែវិច្ឆិកា ឆ្នាំ​២០១៦​នេះ ត្រូវ​ជា​ថ្ងៃ​ទី​៧៤ នៃ​ការចុះឈ្មោះ​បោះឆ្នោត ពោល​គឺ​សល់​តែ ១៤​ថ្ងៃ​ទៀត​ប៉ុណ្ណោះ ដំណើរការ​ចុះ​ឈ្មោះ​បោះឆ្នោត នឹងត្រូវ​បញ្ចប់​។  គិត​ត្រឹម​ម៉ោង​៦​ល្ងាច ថ្ងៃទី​១៤ ខែវិច្ឆិកា ឆ្នាំ​២០១៦ មាន​ប្រជាពលរដ្ឋ​ខ្មែរ​ចំនួន​ត្រឹមតែ ៧ លាន​នាក់ ប៉ុណ្ណោះ​បាន​ទៅ​ចុះ​ឈ្មោះ​បោះឆ្នោត ដោយ​នៅ​សល់​ប្រមាណ​ជិត ២,៧ លាន​នាក់​ទៀត ដែល​មិន​ទាន់​បាន​ចុះឈ្មោះ​។ នេះ​បើ​តាម​សេចក្តីប្រកាស ព័ត៌មាន លទ្ធផល​បណ្តោះអាសន្ន នៃ​ការចុះឈ្មោះ​បោះឆ្នោត​របស់ គ​.​ជ​.​ប​។​

​ជាមួយគ្នា​នេះ​ផង​ដែរ ទាំង​គណបក្ស​នយោបាយ​មួយចំនួន ព្រមទាំង​គ​.​ជ​.​ប និង​អង្គការ​សង្គម​ស៊ីវិល ធ្វើ​ការពា​ក់ព​ន្ធ័​នឹង​ការបោះឆ្នោត បាន​អំពាវនាវ និង​ផ្សព្វផ្សាយ​ឲ្យ​ពលរដ្ឋ​ទៅ​ចុះ​ឈ្មោះ​បោះឆ្នោត ខណៈពេល​ដែល​ពេលវេលា​បិទ​បញ្ចប់​បញ្ជី​ចុះ​ឈ្មោះ​កាន់តែ​កៀក​មកដល់​។ គួរ​បញ្ជាក់ដែរថា រហូតមកដល់​ពេលនេះ ពលរដ្ឋ​ដែល​បាន​ទៅ​ចុះ​ឈ្មោះ​បោះឆ្នោត​រួច​មាន​ត្រឹមតែ​ជាង​៧៣% ប៉ុណ្ណោះ​។

ទោះជា​យ៉ាងនេះ​ក្ដី គ​.​ជ​.​ប ក៏​បាន​បង្ហាញ​ពី​កិច្ចខិតខំ​ប្រឹងប្រែង​ក្នុង​ការជួយ​ស្រោចស្រង់​ស្ថានការណ៍​ដែល​កំពុង​យ៉ាប់យ៉ឺន​នេះ តាមរយៈ​ការសហការ​ជាមួយ​ដៃគូ​ពាក់ព័ន្ធ​នានា ផ្សព្វផ្សាយ​ឲ្យ​ពលរដ្ឋ​ទៅ​ចុះ​ឈ្មោះ​បោះឆ្នោត​គ្រប់​គ្នា​នៅ​ដំណាក់កាល​ចុងក្រោយ​នេះ​ផងដែរ​។​

សូមជម្រាបថា ដំណើរការ​ចុះ​ឈ្មោះ​បោះឆ្នោត​ថ្មី ចាប់ផ្តើម​ពី​ថ្ងៃ​ទី​០១ ខែ​កញ្ញា ដល់​ថ្ងៃ​ទី​២៩ ខែវិច្ឆិកា ឆ្នាំ​២០១៦​។ គ​.​ជ​.​ប បញ្ជាក់ថា ប្រជាពលរដ្ឋ​ដែល​មាន​អាយុ​១៨​ឆ្នាំ​ឡើង ហើយ​មាន​សិទ្ធិ ចុះ​ឈ្មោះ​បោះឆ្នោត មាន​ចំនួន​ជាង​៩.៦​លាន​នាក់​៕

(​ដោយ​៖ ចេ​ន សុជាតា​)

 ពាក្យគន្លឹះ  គ.ជ.ប

ព័ត៌មានផ្សេងទៀត