លោក​ត្រាំ​បង្ហាញ​​បញ្ហា​អាទិភាព​​មួយ​ចំនួន​​ត្រូវ​ដោះស្រាយ​​ពេល​ចូល​កាន់​តំណែង​

13-11-2016 3:31 pm 6196
លោកដូណាល់ ត្រាំ

ក្នុងពេល​ផ្ដល់​បទសម្ភាសន៍​ដល់​សារព័ត៌មាន​Wall Street Journal លោក​ដូណាល់ ត្រាំ​បាន​លើកឡើង​ថា បញ្ហា​គ្រប់គ្រង​ព្រំដែន បញ្ហា​សុខភាព បញ្ហា​ហិរញ្ញវត្ថុ និង​បញ្ហា​ការងារ គឺជា​រឿង​អាទិភាព​ត្រូវដោះស្រាយ នៅ​ពេល​លោក​ចូលកាន់​តំណែង​។​

​លោក​បាន​បកស្រាយ​បន្ដថា ទាក់ទង​នឹង​ការគ្រប់គ្រង​តំបន់​ព្រំដែន គឺ​ដើម្បី​បញ្ឈប់​បញ្ហា​ជន​ចំណាកស្រុក​ខុសច្បាប់​និង​បញ្ហា​ចរាចរ​គ្រឿងញៀន​តាម​ព្រំដែន ដែល​នេះ​ជា​រឿង​ដំបូង​គេ​ត្រូវ​ដោះស្រាយ​ជាបន្ទាន់ ពេល​លោក​ចូលកាន់​តំណែង​ប្រធានាធិបតី​អាមេរិក​។​ក្រៅពីនេះ​លោក​ត្រាំ​បានលើកឡើង​ពី​បញ្ហា​អាទិភាព​ផ្សេង​ទៀត​គឺ​ការធ្វើ​កំណែទម្រង់​បញ្ហា​ថែទាំ​សុខភាព ការដោះស្រាយ​ផ្នែក​ហិរញ្ញវត្ថុ និង​ការបង្កើត​ការងារ ក៏​ជា​រឿង​មិន​អាច​មើល​រំលង​បាន​ដែរ​។​

​នៅពេល​មាន​សំណួរ​សួរ​ទាក់ទង​នឹង​ការប្រើប្រាស់​អ៊ីមែល​ផ្ទាល់ខ្លួន​របស់​លោក​ស្រីគ្លីន​តុន​វិញ លោក​ត្រាំ​បាន​ឆ្លើយតប​ថា លោក​មិន​បាន​គិត​ពី​បញ្ហា​នេះ​ច្រើន​ពេក​ទេ​។​ប៉ុន្ដែ​ក្នុង​ពេល​ធ្វើ​យុទ្ធនាការ​ឃោសនា​បោះឆ្នោត លោក​បញ្ជាក់ថា​ការប្រើប្រាស់​អ៊ីមែល​របស់​លោក​ស្រីគ្លីន​តុ​ន  ត្រូវតែ​ស្នើ​ឲ្យមាន​ការចាត់តាំង​ក្រុម​រាជអា​ជ្ញាពិសេស​ស៊ើបអង្កេត​ករណីនេះ​។​

​ការធ្វើ​បទសម្ភាសន៍​របស់​លោក​ត្រាំ​តាម​ប្រព័ន្ធ​ផ្សព្វផ្សាយ គឺជា​លើក​ទី​មួយ​ហើយ​បន្ទាប់​ពី​ជាប់ឆ្នោត​ជា​ប្រធានាធិបតី​អាមេរិក​។​ដោយឡែក​ការចូល​កាន់តំណែង លោក​នឹង​ត្រូវ​ចូលកាន់​តំណែង​នៅ​ថ្ងៃទី​២០​ខែ​មករា​ឆ្នាំ​២០១៧ បន្ទាប់ពី​លោក​បា​រ៉ាក់ អូ​បា​ម៉ា​ផុត​អាណត្ដិ​។​លោក​ដូណាល់ ត្រាំ​គឺជា​ប្រធានាធិបតី​ទី​៤៥​របស់​អាមេរិក មកពី​គណបក្ស​សាធារណរដ្ឋ​៕

 ពាក្យគន្លឹះ  លោកDonald Trump

ព័ត៌មានផ្សេងទៀត