នគរបាល​​កម្ពុជា ស្នើ​​វៀតណាម​​ស្រាវជ្រាវ​​មេរៀន​ថ្មីៗ​​ដើម្បី​​បង្រៀន​​​នគរបាល​​ជាតិ​​

10-11-2016 9:35 am 78538

​លោក​នេត សាវឿន អគ្គស្នងការ​នគរបាល​ជាតិ បាន​ស្នើ​ឱ្យ​បណ្ឌិត្យសភា តម្រួត​ប្រជាជន​វៀតណាម បន្ត​ជួយ​បណ្តុះបណ្តាល​នគរបាល​កម្ពុជា ពិសេស ស្រាវជ្រាវ​មេរៀន និង​បទពិសោធន៍​ថ្មីៗ ឱ្យទាន់​សភាពការណ៍​បច្ចុប្បន្ន ដើម្បី​បណ្តុះបណ្តាល​ដល់​សិក្ខាកាម នគរបាល​កម្ពុជា​។​ការស្នើ​លោក​នេត សាវឿន បែបនេះ​គឺធ្វើឡើង​នៅក្នុង​ជំនួប​ពិភាក្សា​ការងារ​ជាមួយ​ង្វៀង ស៊ុន​អៀម ប្រធាន​បណ្ឌិត្យសភា​តម្រួត​ប្រជាជន​វៀតណាម កាលពី ថ្ងៃទី​៧ ខែវិច្ឆិកា​។​

​មូលហេតុ​ដែល​នគរបាល​កម្ពុជា ស្នើ​ឱ្យ​វៀតណាម​ស្រាវជ្រាវ​មេរៀន​ថ្មី ដើម្បី​បង្រៀន​នគរបាល​កម្ពុជា ត្រូវបាន​លោក​នេត សាវឿន បានបញ្ជាក់​ថា ការបណ្តុះបណ្តាល​មាន​សា​រៈ សំខាន់​ណាស់ សម្រាប់​​នគរបាល​កម្ពុ​ជា​ទាំង​នៅក្នុង​ស្រុក និង​ក្រៅ​ស្រុក​។ លោក​ថា ការបណ្តុះបណ្តាល នៅ​ក្រៅ​ស្រុក​គឺ​ដើម្បី ពង្រឹង​សមត្ថិភាព និង​ដក​បទពិសោធន៍​ថ្មីៗ​។​

​លោក​នេត សាវឿន គូសបញ្ជាក់ថា បច្ចុប្បន្ននេះ នគរបាល កម្ពុជា​មាន​សមត្ថភាព​គ្រប់គ្រាន់​ក្នុង​ការរក្សា​ការពារ​សុវត្ថិភាព សន្តិសុខ សណ្តាប់​សង្គម តែ​ក៏​ត្រូវ​ផ្សារ​ភ្ជាប់​នឹង ការបណ្តុះបណ្តាល ពិសេស​​ការបណ្តុះបណ្តាល​ដែល​ទទួលបាន ពី​កិច្ចសហប្រតិបត្តិការ​ជាមួយ បណ្ឌិត្យ​សភា តម្រួត​ប្រជាជន​វៀតណាម​។​នេះ​បើ​តាម​ការចុះផ្សាយ​របស់​ទីភ្នាក់ងារ​សារព័ត៌មាន​កម្ពុជា​។​

​អគ្គស្នងការ​នគរបាល​ជាតិ​កម្ពុជា បាន​ស្នើ​ឱ្យ​បណ្ឌិត្យសភា​តម្រួត​ប្រជាជន​វៀតណាម សហការ ជាមួយ​នាយកដ្ឋាន​បុគ្គលិក នៃ​អគ្គស្នងការដ្ឋាន​នគរ​បាល​ជាតិ ដើម្បី​ពង្រឹង​បទបញ្ជា ផ្ទៃក្នុង និង​វិន័យ​​ឱ្យបាន ល្អ​។ ក្នុងករណី​សិក្ខាកាម​នគរបាល​កម្ពុ​ជា ប្រព្រឹត្ដល្មើស ទៅនឹង​បទ​បញ្ជា និង​វិន័យ សូម​ជួយ​ផ្តល់​ព័ត៌មាន ឱ្យ​នាយកដ្ឋាន​បុគ្គលិក ដើម្បី​មាន​វិធានការ​។

​ចំពោះ​សំណើ​របស់​កម្ពុជា​នេះ លោក​ង្វៀង ស៊ុន​អៀម ប្រធាន​បណ្ឌិត្យសភា​តម្រួត​ប្រជាជន​វៀតណាម ត្រូវបាន​ប្រភព​ដដែល​បញ្ជាក់​ថា បាន​ទទួលយក និង​អរគុណ​ដល់​អគ្គស្នងកា​រដ្ឋា​ន​នគរបាល​ជាតិ ដែល​ជានិច្ចកាល​តែងតែ​សហការ​គ្នា​ល្អ ហើយ​ភាគី​វៀតណាម​ក៏​បាន អញ្ជើញ​គណៈប្រតិភូ​អគ្គស្នងការដ្ឋាន​នគរ​បាល​ជាតិ ទៅ​ទស្សនៈកិច្ច​បណ្ឌិត្យ សភា​តម្រួត​ប្រជាជន​វៀតណាម ផងដែរ​៕

 ពាក្យគន្លឹះ  កម្ពុជា វៀតណាម

ព័ត៌មានផ្សេងទៀត