លោក​អូ​បា​ម៉ា​​ឆ្លើយតប​​នឹង​លោក​ត្រាំ​​ដែល​ចោទថា​​រៀប​ផែនការ​​បន្លំ​​សន្លឹកឆ្នោត​

19-10-2016 9:20 am 2841
ប្រធានាធិបតីអាមេរិក​លោកបារ៉ាក់ អូបាម៉ា

​បេក្ខជន​ប្រធានាធិបតី​គណបក្ស​សាធារណរដ្ឋ​លោក​ដូណាល់ ត្រាំ បាន​និយយ​ថា​ការបោះឆ្នោត​នៅ​អាមេរិក​នៅ​ថ្ងៃទី​០៨​ខែ​វិច្ឆិកា​ខាង​មុខ ត្រូវបាន​រៀបចំ​ការបន្លំ​សន្លឹកឆ្នោត​ទុក​មុន​ទៅ​ហើយ ដើម្បី​ប្រឆាំង​រូបលោក​។​លោក​បន្ដថា​មាន​ការរៀបចំ​បន្លំ​សន្លឹកឆ្នោត​ជា​ប្រព័ន្ធ ដើម្បី​បំពុល​ដល់​អារម្មណ៍​អ្នកបោះឆ្នោត​។​

​ឆ្លើយតប​នឹង​ការលើកឡើង​នេះ ប្រធានាធិបតី​អាមេរិក​លោក​បា​រ៉ាក់ អូ​បា​ម៉ា​ថា លោក​ត្រាំ​គួរ​ឈប់​ចោទប្រកាន់​បែបនេះ​ទៅ ព្រោះ​អ្វីដែល​សំខាន់​គឺ​ព្យាយាម​ធ្វើ​យ៉ាងណា​ស្វែងរក​ការគាំទ្រ​ឲ្យបាន​ច្រើន​។​លោក​អូ​បា​ម៉ា​បាន​សង្កត់ធ្ងន់ថា ការបោះឆ្នោត​នៅ​អាមេរិក​ត្រូវបាន​គ្រប់គ្រង​និង​តាមដាន​យ៉ាង​ហ្មត់ចត់​ដោយ​មន្ដ្រី​ក្នុង​តំបន់ ដែល​អាច​នឹង​ត្រូវ​តែង​តាំង​ដោយ​អភិបាលរដ្ឋ​នៃ​គណបក្ស​សាធារណរដ្ឋ​ផង​។​ដូច្នេះ​បើ​និយាយ​ពី​ការបន្លំ​សន្លឹកឆ្នោត​មិនអាច​កើត​មាន​ក្នុង​ការបោះឆ្នោត​នៅ​អាមេរិក​ឡើយ​។​

​ជា​ការកត់សម្គាល់ ខណៈ​មាន​ការស្ទង់មតិ​បង្ហាញ​ថា​លោក​ដូណាល់ ត្រាំ​ធ្លាក់​សំឡេង​គាំទ្រ​ធៀប​នឹង​លោក​ស្រីគ្លីន​តុ​ន លោក​ដូណាល់ ត្រាំ​បាន​បង្កើន​ការចោទប្រកាន់​ជា​បន្ដបន្ទាប់ ទោះបី​ការសិក្សា​បង្ហាញថា ការបន្លំ​សន្លឹកឆ្នោត​នៅ​អាមេរិក​ជា​រឿង​កម្រ​បំផុត​ក៏ដោយ​។​

សូម​បញ្ជាក់​ជា​ថ្មី​ថា ការបោះឆ្នោត​ជ្រើសរើស​ប្រធានាធិបតី​ថ្មី​អាមេរិក នឹង​ប្រារព្ធ​ធ្វើឡើង​នៅ​ថ្ងៃទី​០៨​ខែវិច្ឆិកា​ឆ្នាំ​២០១៦​នេះ​។​ការបោះឆ្នោត​មាន​វត្ដ​មាន​លោកស្រី​ហ៊ីល​ឡា​រី គ្លី​ន​តុ​ន និង​លោក​ដូណាល់ ត្រាំ​ជា​បេក្ខជន​ប្រធានាធិបតី​តំណាង​បក្ស​ទាំង​ពីរ​ចូលរួម ប៉ុន្ដែ​នរណា​ឈ្នះឆ្នោត​មិន​ទាន់​អាច​សន្និដ្ឋានបាន​១០០%​ទេ ទោះ​ការស្ទង់មតិ​លោក​ស្រីគ្លីន​តុន​មានប្រៀប​លើ​លោកត្រាំ​ក៏ដោយ​៕

ព័ត៌មានផ្សេងទៀត