ការស្ទង់មតិ​ថ្មី​​បង្ហាញ​ថា​​លោក​ស្រីគ្លីន​តុន​​នាំ​មុខ​លោកត្រាំ​​មុន​ការតស៊ូ​មតិ​​ជុំ​ចុងក្រោយ​

18-10-2016 9:03 am 1425
ក្មេងស្រីម្នាក់កំពុង​ឈរចន្លោះរូប​លោកស្រីគ្លីនតុន​និងលោកត្រាំ

​បេក្ខជន​ប្រធានាធិបតី​អាមេរិក​តំណាង​បក្ស​ប្រជាធិបតេយ្យ​លោកស្រី ហ៊ីល​ឡា​រី គ្លី​ន​តុ​ន បច្ចុប្បន្ន​ទ​ទូល​បាន​១២​ពិន្ទុ នាំមុខ​លោក​ដូណាល់ ត្រាំ​បេក្ខជន​ប្រធានាធិបតី​បក្ស​សាធារណរដ្ឋ​។​នេះ​បើ​តាម​ការស្ទង់មតិ​ថ្មី​បង្ហាញ​កាលពី​ថ្ងៃ​ចន្ទ​។​ការស្ទង់មតិ​បង្ហាញ​ពីរ​ថ្ងៃ​មុនពេល​ធ្វើ​វេទិកា​តស៊ូ​មតិ​(Debate)​ជុំ​ទី​បី​របស់​បេក្ខជន​ប្រធានាធិបតី​តំណាង​បក្ស​ទាំងពីរ​។​

​លោក​ស្រីគ្លីន​តុន​ទទួលបាន​ការគាំ​ទ្រ​៥០​ភាគរយ ខណៈ​លោក​ត្រាំ​ទទួលបាន​៣៨​ភាគរយ​។​នេះ​ជា​ការស្ទង់មតិ​បង្ហាញ​ដោយ​សាកលវិទ្យាល័យ​Monmouth​។​លោក​ស្រីគ្លីន​តុន​នាំ​មុខត្រឹម​០៤​ពិន្ទុ​ប៉ុណ្ណោះ​ក្នុង​ការស្ទង់មតិ​ដូចគ្នា​កាលពី​ខែ​មុន ដោយ​នាំមុខ​លោក​ត្រាំ​៤៦​ទល់នឹង​៤២​ភាគរយ​។​យ៉ាងណា​ក៏​ដោយ​បេក្ខភាព​ទាំង​ពីរ​លោក​ស្រីគ្លីន​តុន​និង​លោក​ដូណាល់ ត្រាំ កំពុង​ស្ថិត​ក្នុង​ការសម្រេចចិត្ដ​គាំទ្រ​ពី​ប្រជាជន​អាមេរិក​។​

​សូមបញ្ជាក់​ថា បេក្ខជន​ប្រធានាធិបតី​អាមេរិក​ទាំង​ពីរ​រូប បាន​ចូលរួម​វេទិកា​តស៊ូ​មតិ​ពីរ​លើក​មក​ហើយ កាលពី​ថ្ងៃ​ទី​២៦​កញ្ញា និង​កាលពី​ថ្ងៃ​ទី​០៩​តុលា​ឆ្នាំ​២០១៦​។​ដោយឡែក​វេទិកា​តស៊ូ​មតិ​លើក​ទី​បី​នឹង​ធ្វើឡើង​នៅ​ថ្ងៃ​ទី​១៩​តុលា​នេះ​។​រីឯ​ការបោះឆ្នោត​ជ្រើសរើស​ប្រធានាធិបតី​នឹង​ប្រារព្ធ​ឡើង​នៅ​ថ្ងៃ​ទី​០៨​ខែវិច្ឆិកា​ឆ្នាំ​២០១៦៕

ព័ត៌មានផ្សេងទៀត