កូរ៉េខាងជើង​៖​​ការបន្ដ​​កម្មវិធី​នុយក្លេអ៊ែរ​​ជា​ជម្រើស​​តែមួយគត់​​សម្រាប់​ការពារខ្លួន

24-09-2016 9:37 am 2681
លោក​Ri Yong-hoរដ្ឋមន្ដ្រីការបរទេសកូរ៉េខាងជើង

​រដ្ឋមន្ដ្រីការបរទេស​កូរ៉េ​ខាងជើង​បាន​ប្រាប់​ដល់​អង្គការ​សហប្រជាជាតិ​ថា ការបន្ដ​កម្មវិធី​នុយក្លេអ៊ែរ​ក្នុង​ប្រទេស​របស់​លោក ជា​វិធី​តែមួយគត់​អាច​ការពារ​ខ្លួន​បាន ហើយ​ប្ដេជ្ញា​បង្កើន​កម្លាំងយោធា​នុយក្លេអ៊ែរ​បន្ថែមទៀត​។​ថ្លែង​ក្នុង​មហាសន្និបាត​អង្គការសហប្រជាជាតិ​ក្នុង​ក្រុង​ញូវយ៉ក​កាលពី​ថ្ងៃ​ទី​២៣​កញ្ញា លោក​Ri Yong-ho​ថា​កូរ៉េ​ខាងជើង​នឹង​បន្ដ​ចាត់​វិធានការ​ពង្រឹង​កម្មវិធី​អាវុធ​នុយក្លេអ៊ែរ​តទៅ​ទៀត ទាំង​គុណភាព​និង​បរិមាណ​។​

​ការលើកឡើង​បែប​នេះ​ត្រឹមតែ​ពី​សប្ដាហ៍​ប៉ុណ្ណោះ បន្ទាប់​ពី​កូរ៉េខាងជើង​ធ្វើតេស្ដ​អាវុធ​នុយក្លេអ៊ែរ​លើក​ទី​០៥​របស់គេ ធ្វើឲ្យ​អន្ដរជាតិ​ថ្កោលប​ន្ដ​កន្ទុយគ្នា ពិសេស​ក្រុមប្រឹក្សាសន្ដិសុខ​អង្គការសហប្រជាជាតិ បានចាប់ផ្ដើម​ពិភាក្សា​ជាមួយ​សមាជិក​ដើម្បី​រក​ទណ្ឌកម្ម​ថ្មី​ដាក់​លើ​កូរ៉េខាងជើង​។​

​អ្វី​ដែល​សំខាន់​លោក​Ri Yong-ho​សង្កត់ធ្ងន់​ថា “​ការបន្ដ​កម្មវិធី​អាវុធ​នុយក្លេអ៊ែរ​ជា​គោលនយោបាយ​រដ្ឋាភិបាល​កូរ៉េខាងជើង​។​ដរាបណា​នៅតែ​មាន​ការគំរាមកំហែង​ដោយ​អាវុធ​នុយក្លេអ៊ែ​រលើ​ទំនាក់ទំនង​ជាមួយ​កូរ៉េខាងជើង ដូច្នេះ​ដើម្បី​ការពារ​សន្ដិសុខ​និង​សន្ដិភាព​លើ​ឧបទ្វីប​កូរ៉េ កូរ៉េ​ខាងជើង​មាន​តែ​ប្រើប្រាស់​អាវុធ​នុយក្លេអ៊ែរ​មក​ទប់ទល់​វិញ​។​”

លោក​Ri​បន្ដថា លោក​ទទួលស្គាល់​បច្ចុប្បន្ន​ពិបាក​ពន្យល់​ឲ្យ​អឺរ៉ុប​យល់​ណាស់​ពី​ការ​ធ្វើ​តេស្ដ​អាវុធ​នុយក្លេអ៊ែរ​កូរ៉េខាងជើង ស្រប​ពេល​កំពុង​មានកា​រ​បារម្ភ​ពី​បញ្ហា​សន្ដិសុខ​ក្រោយ​បញ្ចប់​សង្គ្រាមត្រជាក់​។​ប៉ុន្ដែ​យ៉ាងណាមិញ​លោក​បកស្រាយ​ថា ការ​ធ្វើ​តេស្ដ​នុយក្លេអ៊ែរ​ជា​វិធានការ​ជាក់ស្ដែង ប្រឆាំង​អាមេរិក​និង​ប្រឆាំង​ការតវ៉ា​ដែល​កើតមាន​កាន់តែ​ខ្លាំង​ឡើងៗ​ជាមួយ​គណបក្ស​កាន់​អំណាច​និង​ប្រជាជន​កូរ៉េ​ខាងជើង​៕

ព័ត៌មានផ្សេងទៀត