អាមេរិក ជប៉ុន និង​កូរ៉េខាងត្បូង​ ពិភាក្សា​គ្នា​ពី​ការ​ធ្វើ​តេស្ត​នុយក្លេអ៊ែរ​កូរ៉េខាងជើង​

19-09-2016 5:14 pm 1276

រដ្ឋមន្ត្រីការបរទេស សហរដ្ឋអាមេរិក ជប៉ុន និង​កូរ៉េខាងត្បូង បាន​ជួបប្រជុំ​គ្នា​នៅ​ទីក្រុង New York កាលពី​ថ្ងៃអាទិត្យ នៅមុន​កិច្ច​ជំនួប​ជាមួយ​អង្គការ​សហប្រជាជាតិ​។ ការជួបប្រជុំគ្នា​នេះ​ធ្វើឡើង ដើម្បី​ពិភាក្សា​ពី​វិធានការ នៃ​ការប្រឆាំង​ទៅ​នឹង​កូរ៉េខាងជើង និង​កិច្ចសហការ​គ្នា​ផ្សេងទៀត ដើម្បី​ប្រឆាំង​ការ​ធ្វើ​តេស្ត​នុយក្លេអ៊ែរ​លើក​ទី​៥​នៅ​ទីក្រុង​ព្យុង​យ៉ាង​។

នៅ​ក្នុង​កិច្ចពិភាក្សា​នោះ សហរដ្ឋអាមេរិក​បាន​បង្ហាញ​ពី​ឆន្ទៈ ចរចារ​ជាមួយ​កូរ៉េខាងជើង ប្រសិនបើ​កូរ៉េខាងជើង​យល់ព្រម​ដកហូត​អាវុធ​នុយ​ក្លេរ​អ៊ែរ​របស់ខ្លួន​។ ទីក្រុង​វ៉ាស៊ីនតោន​បាន​ជម្រុញ​ទីក្រុង​ប៉េកាំង ដែល​ជា​ដៃគូ​ពាណិជ្ជកម្ម​សំខាន់​បំផុត​របស់​ទីក្រុង​ព្យុងយ៉ាង ជួយ​ទប់ស្កាត់​សកម្មភាព​ធ្វើតេស្ត​នុយក្លេអ៊ែរ​របស់​កូរ៉េខាងជើង​ផងដែរ​។ ចិន​ជា​សម​ភាគី​របស់​កូរ៉េ​ខាងជើង​ក៏​មិន​ពេញចិត្ត ការ​ធ្វើ​តេស្ត​នុយក្លេអ៊ែរ​របស់​កូរ៉េខាងជើង​ដែរ​។ យ៉ាងណាក៏ដោយ ចិន​អះអាងថា ទណ្ឌកម្ម​មិនមែន​ជា​មធ្យោបាយ​ល្អ ដើម្បីឲ្យ​កូរ៉េខាងជើង​ត្រឡប់​ចូលតុ​ចរចារ​នោះ​ទេ​។​

 

​ពាក់ព័ន្ធ​បញ្ហា​នេះ កូរ៉េខាងជើង​ឲ្យដឹង​នៅក្នុង​សេចក្តីថ្លែងការ​ណ៍​រួមមួយ​ថា កូរ៉េខាងជើង​មិន​គោរព​តាម​ការសម្រេច​របស់​អង្គការសហប្រជាជាតិ ដែល​ហាមឃាត់​ការ​ធ្វើ​តេស្ត​នុយក្លែរអ៊ែ​រ រួម​ទាំង​ការ​ដាក់​សម្ពាធ​ពី​អន្តរជាតិ​នោះឡើយ​។

 

​គួរ​ជម្រាបជូន​ថា ជំនួប​ត្រីភាគីរ​វា​ង​លោក John Kerry ជាមួយ​លោក Fumio Kishida និង​សម​ភាគី​កូរ៉េខាងត្បូង​លោក Yun Byung-se គឺជា​ការប្រជុំ​លើក​ដំបូង ចាប់តាំងពី​កូរ៉េ​ខាងជើង​ធ្វើតេស្ត​នុយ​ក្លេរ​អ៊ែរ​ជា​លើក​ចុងក្រោយ​នៅ​ខែ​កញ្ញា​នេះ​។ ការ​ធ្វើ​តេស្ត​នុយក្លេអ៊ែរ​របស់​កូរ៉េខាងជើង គឺជា​បញ្ហា​ចម្បង ដែល​ត្រូវ​លើកយក​មក​ពិភាក្សា នៅ​ឯ​មហាសន្និបាត​អង្គការ​សហប្រជាជាតិ​នៅ​សប្តាហ៍​នេះ ដោយ​មាន​ការចូលរួម​ពី​មេដឹកនាំ​មួយចំនួន​នៅលើ​ពិភពលោក​៕

ព័ត៌មានផ្សេងទៀត