វៀតណាម​​នៅតែ​​តាំង​ខ្លួន​ជា​​បងធំ​​លើ​​កម្ពុជា​​

24-08-2016 1:15 pm 34485
ប្រធានាធិបតីវៀតណាមថ្មី លោក ត្រាន់ ដាយខ្វាង បានបើកជំនួបកំពូលជាផ្លូវការមួយសេរីជាមួយមេដឹកនាំកម្ពុជា ដែលរួមទាំងបង្គំគាល់ព្រះមហាក្សត្រកម្ពុជា នៅថ្ងៃទី១៥ ខែមិថុនា ឆ្នាំ២០១៦។

ប្រទេស​វៀតណាម​នៅ​ប៉ុន្មាន​ឆ្នាំ​ចុងក្រោយ​នេះ តែងតែ​បង្ហាញ​ចរិត​ដ៏​អាក្រក់​របស់​ខ្លួន​ក្នុង​ការរំលោភ​មកលើ​ដែន​អធិបតេយ្យ​កម្ពុជា បើទោះបី​កម្ពុជា​បាន​ធ្វើ​កំណត់​ទូត​ជា​បន្តបន្ទាប់​ស្នើ​ឲ្យ​ប្រទេស​មួយ​នេះ​បញ្ជប់​សកម្មភាព ដែល​រំលោភ​ទៅលើ​តំបន់​ហាមឃាត់​យ៉ាងណាក្តី​។ សកម្មភាព​របស់​រដ្ឋាភិបាល​ក្រុង​ហាណូយ​នេះ គឺជា​ការ​មើលងាយ​ដល់​រាជរដ្ឋាភិបាល​កម្ពុជា​ក៏​ដូច​ពលរដ្ឋ​កម្ពុជា និង​មិន​គោរព​អធិបតេយ្យភាព​ប្រទេសជិតខាង​ជាដើម​។ មួយវិញទៀត ប្រទេស​វៀតណាម​ខ្លួនឯង​ចង់​ផ្ញើ​សារ​ប្រាប់​កម្ពុជា​ថា ខ្លួន​នៅតែ​ជា​បង​ធំ​លើ​កម្ពុជា​ផងដែរ​។ សូម​ស្តាប់​បទ​វិភាគ​ដោយ គួន សំបូរ​៖

 

​រាជរដ្ឋាភិបាល​កម្ពុជា​នៅ​ប៉ុន្មាន​ឆ្នាំ​ចុងក្រោយ​នេះ បាន​ធ្វើ​កំណត់​ទូត​ជា​បន្តបន្ទាប់ ស្នើសុំ​ឲ្យ​រដ្ឋាភិបាល​នៃ​សាធារណរដ្ឋ​សង្គមនិយម​វៀតណាម បញ្ឈប់​ការ​ជីកដី​ធ្វើ​គ្រឹះ​សម្រាប់​ការសាងសង់​ប៉ុស្តិ៍​យោធា នៅ​ត្រង់​តំបន់​ហាមឃាត់​តាម​ព្រំដែន ដែល​ប្រទេស​ទាំង​ពីរ​ធ្លាប់បាន​ធ្វើ​កិច្ចព្រមព្រៀង​គ្នា​កាលពី​ថ្ងៃ​ទី​១៧ មករា ឆ្នាំ​១៩៩៥​។

 

​កំណត់​ទូត​របស់​កម្ពុជា​នេះ បាន​ធ្វើឡើង​ក្រោយ​ពី​វៀតណាម​តែងតែ​ធ្វើ​សកម្មភាព រំលោភ​មកលើ​ដែន​អធិបតេយ្យ​កម្ពុជា ជា​ពិសេស​រំលោភ​មកលើ​តំបន់ ស ដែល​ជា​តំបន់​ហាមឃាត់​។ កម្ពុជា​ធ្វើ​កំណត់​ទូត​ផ្ញើ​ទៅ​វៀតណាម ប៉ុន្តែ​ជា​ការកត់សម្គាល់ ប្រទេស​កុម្មុយនីស្ត​មួយ​នេះ មិនដែល​ឃើញ​ឆ្លើយ​តប​មក​កម្ពុជា​វិញ​នោះទេ​។ ផ្ទុយទៅវិញ​ប្រទេស​នេះ នៅតែ​បន្ត​សកម្មភាព​រំលោភ​បំពាន មកលើ​ដែន​អធិបតេយ្យ​កម្ពុជា​ថែមទៀត​។

 

​ជាក់ស្តែង​កាលពី​ចុងខែ​កក្កដា ឆ្នាំ​២០១៦​ថ្មីៗ​នេះ ទាហាន​វៀតណាម បាន​រំលោភ​សង់​ប៉ុស្តិ៍​មួយ​កន្លែង​នៅក្នុង​តំបន់ស​ហាមឃាត់ ចំណុច​អូរ​កុមារ ជិត​ប៉ុស្តិ៍​ការពារ​ព្រំដែន​ខ្មែរ​ភូមិ​ឡំ ឃុំ​ប៉ក់​ញ៉ៃ ស្រុក​អូរយ៉ាដាវ​។ ចំណែក​រាជរដ្ឋាភិបាល ក៏​បាន​ផ្ញើ​កំណត់​ទូ​តទៅ​ភាគី​វៀតណាម ភ្លាមៗ​បន្ទាប់​ពី​អាជ្ញាធរ​ខេត្ត​រតនគិរី ផ្តល់​របាយការណ៍​ថា វៀតណាម​រំលោភ​សង់​ប៉ុស្តិ៍​បន្ត​។ រហូតមក​ទល់​នឹង​បច្ចុប្បន្ន ភាគី​វៀតណាម មិន​ទាន់​ឆ្លើយតប​កំណត់​ទូត​របស់​ភាគី​កម្ពុជា​នៅឡើយ​។ ផ្ទុយទៅវិញ តម្រួត​ព្រំដែន​ខ្មែរ​នៅ​តំបន់​នោះ​អះអាងថា វៀតណាម នៅតែ​បន្ត​សង់​ប៉ុស្តិ៍ បើទោះបី​តម្រួត​ព្រំដែន​ស្នើសុំ​ឲ្យ​វៀតណាម គោរព​កិច្ចព្រមព្រៀង​បោះបង្គោល​ព្រំដែន​ដែល​ប្រទេស​ទាំង​ពីរ​បាន​ចុះ ហត្ថលេខា​ក៏ដោយ​។​

 

​សកម្មភាព​របស់​រដ្ឋាភិបាល​ក្រុង​ហាណូយ​នេះ ត្រូវបាន​អ្នកជំនាញ​មួយចំនួន​ចាត់ទុកថា ជា​ការបង្ហាញ​នូវ​ចរិត​អាក្រក់​របស់​ខ្លួន និង​បង្ហាញ​ភាព​មិន​ស្មោះត្រង់​ជាមួយ​អ្នកជិតខាង ជាពិសេស​កម្ពុជា​។ សកម្មភាព​វៀតណាម គឺជា​ការ​មិន​គោរព​អធិបតេយ្យភាព​ប្រទេស​កម្ពុជា និង​មើលងាយ​ដល់​រាជរដ្ឋាភិបាល​ក្រុងភ្នំពេញ ក៏​ដូច​ពលរដ្ឋ​កម្ពុជា​ទាំងមូល ហើយ​ចង់​ផ្ញើ​សារ​ប្រាប់ថា ខ្លួន​នៅតែ​ជា​បង​ធំ​លើ​កម្ពុជា​។ ទាក់ទង​នឹង​ច្បាប់​អន្តរជាតិ​វិញ យើង​កត់សម្គាល់​ថា វៀតណាម​កំពុង​តែ​រំលោភ​លើ​ច្បាប់​អន្តរជាតិ និង​កិច្ចព្រមព្រៀង​នៃ​ប្រទេស​កម្ពុជា វៀតណាម ឆ្នាំ​១៩៩៥ ។​

 

​គួ​រម្លឹកថា ប្រទេស​វៀតណាម​ធ្លាប់​គ្រប់គ្រង​កម្ពុជា​ចាប់ពី​ឆ្នាំ​១៩៧៩ ដល់​១៩៨៩ បន្ទាប់​ពី​ប្រទេស​មួយ​នេះ​បាន​ឈ្លានពាន​កម្ពុជា​។ វៀតណាម​ធ្លាប់​ប្រកាសថា ខ្លួន​ជា​អ្នកមានគុណ​មកលើ​កម្ពុជា ដោយ​អះអាង​ថា ខ្លួន​បាន​ជួយ​ផ្តួលរំលំ​របប​ខ្មែរ​ក្រហម​របស់​ប៉ុល​ពត​។ ប៉ុន្តែ​សម្រាប់​កម្ពុជា​វិញ ប្រទេស​វៀតណាម​ទៅវិញ​ទេ ដែល​ជំពាក់​គុណ​កម្ពុជា ពីព្រោះ​កម្ពុជា​បាន​ផ្តល់​ជម្រក​ដល់​ទាហាន​វៀតណាម ដើម្បី​ធ្វើ​សង្គ្រាម​មុន​ពេល​ការបង្រួបបង្រួម​វៀតណាម​ទាំង​ពីរ​នៅ​ថ្ងៃ​ទី​៣០ ខែ មេសា ឆ្នាំ ១៩៧៥​។

 

​ត្រឡប់មកវិញ ដើម្បី​ដោះស្រាយ​ទង្វើ​អាក្រក់​របស់​ប្រទេស​វៀតណាម​បាន ភាគី​កម្ពុជា គួរតែ​ពិចារណា​ស្នើសុំ​ប្រទេស​បារាំង ដើម្បី​ជួយ​អន្តរាគមន៍​ជុំវិញ​ការបំពាន​របស់​វៀតណាម​នេះ ពីព្រោះ​ប្រទេស​បារាំង​ធ្លាប់ធ្វើ​ជា​អាណានិគម​លើ​ទឹកដី​ប្រទេស​ទាំង​ពីរ​ហើយ​បារាំង​ជា​អ្នក​ចងក្រង​គូស​ផែនទី​កូសាំងស៊ីន​ដល់​ប្រទេស​ទាំង​ពីរ​ផងដែរ​។

 

​មួយវិញទៀត ក្រសួងការបរទេស​កម្ពុជា ត្រូវតែ​អញ្ជើញ​ប្រមុខ​ការទូត​វៀតណាម​មក​បំភ្លឺ ជុំវិញ​ការរំលោភ​មកលើ​ដែន​អធិបតេយ្យ​កម្ពុជា​។ បើ​វៀតណាម​មិន​គោរព ដំណាក់កាល​បន្ទាប់​កម្ពុ​ជា​ត្រូវ​អញ្ជើញ​ប្រមុខ​ការទូត​ទាំងអស់ ប្រចាំ​ប្រទេស​កម្ពុជា​ដោយ​បូក​ភាគី​វៀតណាម​ផង​មក​ធ្វើ​សាក្សី​ក្នុង​បទ​បង្ហាញ​ពី​ការរំលោភ​បំពាន​នេះ​។​

 

​ជា​ការកត់សម្គាល់ ការបំពាន​របស់​ប្រទេស​វៀតណាម​នេះ ត្រូវបាន​អ្នកវិភាគ និង​អ្នកតាមដាន​សង្គម បាន​កត់សម្គាល់​ថា ដោយសារ​តែ​នយោបាយ​ការទូត​កម្ពុជា​ចុង​ក្រោយ​នេះ បាន​ដើរចេញ​ពី​វៀតណាម ព្រោះ​ថា​កម្ពុជា​ងាក​ទៅរក​ចិន​។ ក្រៅ​ពី​អ្នកផ្តល់​ជំនួយ ចិន​គឺ​ជា​ដៃគូ​យុទ្ធសាស្ត្រ​គ្រប់​ជ្រុងជ្រោយ​របស់​កម្ពុជា ពីព្រោះ​ចិន​មាន​ទំនាក់ទំនង​ជា​ប្រពៃណី​ជាមួយ​កម្ពុជា​ដែរ តាំងពី​សម័យ​អតីត​ព្រះមហាក្សត្រ​ព្រះ​បរម​កោដ្ឋ​។ អ្វី​ដែល​មើលឃើញ​កាន់តែច្បាស់​អំពី​គម្លាត​រវាង​ទីក្រុង​ភ្នំពេញ និង​ហាណូយ គឺ​បញ្ហា​សមុទ្រ​ចិន​ខាងត្បូង ហើយ​បញ្ហា​នេះ កម្ពុជា​ប្រកាន់​ជំហរ​មួយ ដែល​មិន​គាំទ្រ​ក្រុង​ហាណូយ ទល់​នឹង​មហា​យក្ស​ចិន​៕

 

(ដោយ៖គួន សំបូរ)

 

 

 

 

 

 

 ពាក្យគន្លឹះ  កម្ពុជា វៀតណាម

ព័ត៌មានផ្សេងទៀត