គំនិត​​ស្អប់​​វៀតណាម​​កំពុង​តែ​​សំងំ​នៅ​ក្នុង​ខ្លួន​​ពលរដ្ឋ​ខ្មែរ​​

03-08-2016 5:02 pm 20691

​ប្រវត្តិសាស្ត្រ​ខ្មែរ​បាន​បញ្ជាក់​យ៉ាងច្បាស់​ថា ប្រទេស​វៀតណាម​ធ្លាប់​មាន​ឥទ្ធិពល​យ៉ាង​ខ្លាំង​មក​លើ​នយោបាយ​ខ្មែរ បន្ទាប់​ពី​ស្តេច​ខ្មែរ យក​បុត្រី​វៀតណាម​ធ្វើ​ជា​អគ្គមហេសី​។ ប៉ុន្តែ​ឥទ្ធិពល​នេះ ត្រូវបាន​បញ្ចប់​ជា​បណ្តើរៗ ក្រោយពី​មាន​កិច្ច​ព្រម​ព្រៀង​ក្រុងប៉ារីស ២៣ តុលា ឆ្នាំ​១៩៩១​។ យ៉ាងណាក្តី បើទោះបីជា​ត្រូវបាន​បញ្ចប់​ក៏ដោយ ក៏​គំនិត របស់​ពលរដ្ឋ​ខ្មែរ​មួយចំនួន នៅតែ​ស្អប់​ប្រទេស​ជិត​ខាង​កម្ពុជា​មួយ​នេះ​។ តើ​មាន​មូលហេតុ​អ្វី​ខ្លះ បាន​បង្ក​ឲ្យ​ពលរដ្ឋ​ខ្មែរ​គិត​យ៉ាង​នេះ​? ជា​បន្ត​សួ​ម​ស្តាប់​បទ​​វិភាគ​ដោយ គួន សំបូរ​៖

 

​គំនិត​ស្អប់​វៀតណាម​របស់​ប្រជា​ពលរដ្ឋ​ខ្មែរ​មួយចំនួន នៅតែ​បន្ត​រហូត​មកដល់​ពេល​បច្ចុប្បន្ន បើទោះបីជា​ប្រទេស​ជិត​ខាង​កម្ពុជា​មួយ​នេះ បាន​ឈប់​ត្រួតត្រា​មក​លើ​កម្ពុជា​ជាង​២០ ឆ្នាំ​ហើយ​ក្តី​។ ជា​ការកត់សម្គាល់ រឿងរ៉ាវ​ទាំងឡាយណា​ដែល​ជាប់​ពាក់ព័ន្ធ​នឹង​ប្រទេស​វៀតណាម គឺ​មាន​ការចាប់អារម្មណ៍​យ៉ាងខ្លាំង​ពី​សំណាក់​ពលរដ្ឋ​ខ្មែរ​។​

 

​ពលរដ្ឋ​ខ្មែរ​ខ្លះទៀត​បាន​ចំអក​ដាក់​វៀតណាម​ថា ជា​សត្វ​ក្រពើ​ដែល​ភ្លេចគុណ​កម្ពុជា ពីព្រោះ​កម្ពុជា​ធ្លាប់​ជួយ​ឲ្យ​វៀតណាម​បាន​បង្រួបបង្រួម​ជា​ប្រទេស​តែ​មួយ​នៅក្នុង​ទស្សវត្ស​ឆ្នាំ​១៩៧០​។ ខ្លះ​ទៀត​ហៅ​វៀតណាម​ថា ចោរលួច​ទឹកដី​កម្ពុជា​ជាដើម​។​បន្ថែម​ពី​នេះ​ចំពោះ​នយោបាយ​នៅ​កម្ពុជា​វិញ​ឲ្យតែ​គណបក្ស​ណា​មាន​គោល​នយោបាយ​ប្រឆាំង​នឹង​វៀតណាម​គឺ​មាន​ការគាំទ្រ​ច្រើន​ពី​ពលរដ្ឋ​ខ្មែរ ហើយ​ចំពោះ​អ្នកនយោបាយ​ខ្មែ​រណា ដែល​ប៉ិនប្រសប់ វាយប្រហារ​គូប្រកួត​ដោយ​លាប​ពណ៌​ជា​កូនអុក​វៀតណាម​ទៀត​នោះ ត្រូវបាន​គេ​ឲ្យឈ្មោះ​ថា ជា​អ្នកស្នេហាជាតិ​។​

 

​មាន​មូលហេតុ​មួយចំនួន​ដែល​ធ្វើឲ្យ​ពលរដ្ឋ​ខ្មែរ​ស្អប់​វៀតណាម​យ៉ាងនេះ គឺ​ទី​១ វៀតណាម​បាន​យក​ទឹកដី​កម្ពុជា​អស់​២២​ខេត្ត ក្នុងនោះ​ក៏​មាន​កោះ​ត្រល់​ផងដែរ ហើយ​គំនិត​របស់​ថ្នាក់ដឹកនាំ​វៀតណាម​វិញ គឺ​មាន​បំណង​ចង់​បាន​ទឹកដី​កម្ពុជា​ដែល​គេ​ហៅថា «​ដំណើរ​ឆ្ពោះ​ទៅ​ទិស​ខាងលិច​»​។ ទី​២ វៀតណាម ជា​ប្រទេស​ដែល​ធ្លាប់​ជិះជាន់​មកលើ​កម្ពុជា​ទាំង​នយោបាយ​ខាងក្នុង និង​ខាង​ក្រៅ​ប្រទេស​។ ប្រទេស​វៀតណាម ធ្លាប់ធ្វើ​ជា​អាណាព្យាបាល​កម្ពុជា ចាប់ពី​ចុង​សតវត្ស​ទី ១៧​។ កម្ពុជា ក្រោម​អាណា​ព្យាបាល​វៀតណាម ធ្វើឲ្យ​ប្រទេស​វៀតណាម កេងចំណេញ​មកលើ​កម្ពុជា ជា​បន្តបន្ទាប់​។ ប្រជា​ពលរដ្ឋ​ខ្មែរ ត្រូវបាន​ប្រទេស​នេះ​ជិះជាន់ និង​សម្លាប់​ដោយ​ប្រើប្រាស់​ល្បិច​ជា​ច្រើន ដើម្បី​លេប​យក​ទឹកដី​កម្ពុជា​។ មួយវិញទៀត ប្រទេស​វៀតណាម ធ្លាប់​យក​កម្ពុជា​ធ្វើជា​កូន​អុក​ក្នុង​ការដណ្ដើម​អំណាច​គ្នា​ជាមួយ​ប្រទេស​ថៃ និង​មាន​រឿងរ៉ាវ​ជាច្រើន​ទៀត​។​

 

​ប្រវត្តិសាស្ត្រ​ទាំងអស់នេះ​ហើយ នៅតែ​បន្ត​លង​អារម្មណ៍​របស់​ប្រជា​ពលរដ្ឋ​ខ្មែរ ដែល​តែងតែ​ស្អប់​វៀតណាម និង មាន​ការរើសអើង​ពូជសាសន៍​លើ​ជនជាតិ​វៀតណាម​។ គំនិត​ជាតិ​និយម​របស់​ប្រជា​ពលរដ្ឋ​ខ្មែរ​នេះ គឺជា​រឿង​មួយ​ដែល​យើង​ទាំងអស់​គ្នា​គួរតែ​លើកទឹកចិត្ត​។ ប៉ុន្តែ​បើ​គំនិត​ជាតិនិយម​នេះ វា​មាន​លក្ខណៈ​ជ្រុល​ហួសហេតុ​ពេក ដែល​មិន​គិត​រក​ដំណោះស្រាយ វា​ក៏​អាច​ធ្វើ​កម្ពុជា​ខ្លួនឯង​ដើរ​ជាន់​ប្រវត្តិសាស្ត្រ​វិញ​ផងដែរ​។​

 

​យើង​នៅ​ចាំបាន​ថា នៅពេល​ដែល​ប្រទេស​វៀតណាម យក​ទឹកដី​កម្ពុជា និង​រំលោភ​មកលើ​ដែន​អធិបតេយ្យ​កម្ពុជា គឺ​ស្របពេល​ដែល​កម្ពុជា​កំពុង​មាន​ជម្លោះ​ផ្ទៃក្នុង​ខ្លួនឯង​។ សតវត្ស​ទី​១៥ ដល់ ទី​១៩ គឺជា​សម័យកាល​នៃ​ការធ្លាក់ចុះ និង បាត់បង់​ទឹកដី​ជា​បន្តបន្ទាប់​របស់​កម្ពុ​ជា ដោយសារ​តែ​ស្តេច​ខ្មែរ​ឈ្លោះ​គ្នា​ដើម្បី​ដណ្តើម​រាជបល្ល័ង្ក​។ កម្ពុជា​បាន​ក្លាយជា​កូនអុក​មួយ ក្នុង​ការដណ្ដើម​អំណាច​គ្នា រវាង​ប្រទេស​ជិតខាង​ពីរ គឺ ថៃ និង វៀតណាម​។ ការតាំង​ទី​លំនៅ​របស់​វៀតណាម​នៅ​លើ​តំបន់ ដីសណ្ដ​ទន្លេមេគង្គ ឬ​ហៅ​ម្យ៉ាង​ថា ដី​កម្ពុជា​ក្រោយ ត្រូវបាន​វៀតណាម កាន់កាប់ នៅ​ចុង​សតវត្ស​ទី ១៧ ។ នេះ​ជា​ប្រវត្តិសាស្ត្រ​ខ្លះៗ​របស់​កម្ពុជា​នា​ពេល​ដែល ប្រទេស​វៀតណាម​បាន​រំលោភ​យក​ដី​។​

 

​ដូច្នេះ​ដើម្បី​ដោះស្រាយ​បញ្ហា​នេះ ពលរដ្ឋ​ខ្មែរ​គួរ​គប្បី​ស្វែង​យល់​ឲ្យបាន​ស៊ីជម្រៅ​អំពីឫ​សគល់​របស់​វា ហើយ​យើង​ត្រូវតែ​សួរ​ខ្លួនឯង​ថា តើ​មាន​មូលហេតុ​អ្វី​បានជា​វៀតណាម​អាច​យក​ដី​កម្ពុជា និង​អាច​គ្រប់គ្រង​កម្ពុជា​បាន​។ ពលរដ្ឋ​ខ្មែរ ត្រូវតែ​យកគំនិត​ស្អប់​វៀតណាម​មក​ជា​ការ​អភិវឌ្ឃន​ខ្លួន ដើម្បី​តទល់​ជាមួយ​វៀតណាម ហើយ​យក​ប្រវត្តិសាស្ត្រ​ជា​មេរៀន​។ កម្ពុជា​មិន​អាច​លើក​ទឹកដី​ឲ្យចេញ​ឆ្ងាយ​ពី វៀតណាម​បាន​ទេ ដូច្នេះ​កម្ពុជា​ត្រូវការ​មាន​ព្រំដែន​មួយ​ដោយ​ជាក់លាក់ ដោយ​មាន​ការទទួលស្គាល់​ពី​អន្តរជាតិ​។ ចំណុច​មួយ​ទៀត​គ្មាន​ប្រទេស​ណាមួយ ដែល​អាច​រស់នៅ​ក្នុង​ស្ថានភាព​ឯកោ រឺ​យក​ប្រទេស​ជិតខាង​ខ្លួន មក​ធ្វើ​ជា​សត្រូវ​ស៊ីសាច់ហុតឈាម​នោះទេ ទាំង​កម្ពុជា និង​វៀតណាម បាន​ក្លាយ​ជា​បងប្អូន ក្នុង​ត្រកូល​អាស៊ាន ដូច្នេះ​ចង់​មិន​ចង់ គំនិត​ជាតិនិយម ង​ប់ង​ល់ មិន​បាន​នាំឲ្យ​មាន​ការអភិវឌ្ឍ​ន៍​សម្រាប់​កម្ពុជា​នោះ​ទេ​។

 

ជា​ឧទាហរណ៍ នៅពេល​មាន​បញ្ហា​កើតឡើង នៅលើ​ជនជាតិ​វៀតណាម​នៅ​កម្ពុជា មិន​ត្រូវបាន​យកចិត្តទុកដាក់ ការចោទប្រកាន់​លើ​ជនជាតិ​វៀតណាម ពាក់​ពន្ធ័​នឹង​អំពើរចោរកម្ម ឧក្រិដ្ឋកម្ម តាមរយៈ​ការវាយតម្លៃ​ជាតិ​សាសន៍​និយម​។ និន្នាការ​នេះ​ពុំមែន​ជា​រឿង​ល្អ​សម្រាប់​កម្ពុជា និង​អាច​ត្រូវ​ប្រទេស​ដ៏​ទៃ​មើល​មក​ក្នុង​រូបភាព​មិនល្អ​ផងដែរ​។​

 

​ចំណែក​អ្នក​នយោបាយ​ខ្មែរ​វិញ ត្រូវតែ​បញ្ចប់​ការ​ធ្វើ​នយោបាយ​លាប់​ពណ៌​គ្នា និង​នយោបាយ​ចាស់គំរឹល ក្នុង​ចេតនា​ដើម្បី​តែ​អំណាច​តែ​ក្រុមគ្រួសារ និង​បក្សពួក​របស់​ខ្លួន​។ ម្ប៉ាង​វិញ​ទៀត នយោបាយ​ខ្មែរ ត្រូវតែ​បញ្ចប់​នូវ​សារ​នយោបាយ​ណា ដែល​ធ្វើឲ្យ​សង្គម​ខ្មែរ​បែកបាក់​គ្នា និង​មាន​ចលាចល​។

 

​ដោយឡែក រាជរដ្ឋាភិបាល​វិញ ត្រូវតែ​បំពេញ​ការងារ​របស់​ខ្លួន​ដោយ​គោរព​តាម​ច្បាប់​រដ្ឋធម្មនុញ្ញ​កម្ពុជា​ឲ្យបាន​ពេញលេញ ទទួលបាន​នូវ​ភាពជឿ​ទុកចិត្ត​ពី​ប្រជាពលរដ្ឋ​។ រដ្ឋាភិបាល​ត្រូវតែ​មាន​គោលនយោបាយ​សាធារណៈ​ប្រកប​ដោយ​ទស្សនៈវិស័យ ដើម្បី​អភិវឌ្ឃន​ប្រទេស​ឲ្យ​ភាពរឹងមាំ​។ ជា​ការពិត​ណាស់ កម្ពុជា​សព្វថ្ងៃ​ចាំបាច់ គឺ​ត្រូវកា​រ​ពង្រឹក​សេដ្ឋកិច្ច​ឲ្យ​កាន់តែខ្លាំង ដើម្បី​តតាំង​ជាមួយ​ប្រទេស ដែល​ធ្លាប់​ជិះជាន់​កម្ពុជា​។ កម្ពុជា​ត្រូវការ​នយោបាយ​ការ​បរទេស​មួយ​ដ៏​មាន​ភាព​វៃឆ្លាត ដើម្បី​អភិវឌ្ឃន​ប្រទេស​៕

 

(ដោយ៖គួន សំបូរ)

 


 ពាក្យគន្លឹះ  កម្ពុជា វៀតណាម

ព័ត៌មានផ្សេងទៀត