លោក​អូ​បា​ម៉ា​៖​​និយាយ​​ពី​តំណែង​​ប្រធានាធិបតី​ថ្មី​​គ្មាន​នរណា​​សម​ជាង​​លោក​ស្រី​គ្លីន​តុន​ទេ​

28-07-2016 5:29 pm 4110
លោក​អូបាម៉ា​ពេលថ្លែង​ទៅកាន់​សមាជិកបក្សប្រជាធិបតេយ្យ

​ថ្លែង​ក្រោយពេល​លោកស្រី​ហ៊ីល​ឡា​រី គ្លី​ន​តុ​ន បាន​ទទួល​ការតែងតាំង​ជា​ផ្លូវការ​ក្នុង​បក្ស​ប្រជាធិបតេយ្យ ជា​បេក្ខជន​ប្រធានាធិបតី​ចូល​ប្រកួតប្រជែង​យក​តំណែង​ប្រធានាធិបតី​អាមេរិក លោក​បា​រ៉ាក់ អូ​បា​ម៉ា​ជា​ប្រធានាធិបតី​អាមេរិក​ជិត​ផុត​អាណត្ដិ​ថា គ្មាន​នរណា​មាន​សមត្ថភាព​ជាង​លោក​ស្រីគ្លីន​តុន​ឡើយ​។​លោក​នៅ​តែ​គាំទ្រ​លោក​ស្រីគ្លីន​តុ​ន ធ្វើ​ជា​ប្រធានាធិបតី​បន្ទាប់ពី​លោក​ផុត​អាណត្ដិ​។​


​ពេល​ធ្វើ​សុន្ទរកថា​ទៅកាន់​សមាជិក​បក្ស​ប្រជាធិបតេយ្យ​ក្នុង​ក្រុង​Philadelphia លោក​បា​រ៉ាក់ អូ​បា​ម៉ា​ឲ្យដឹង​ទៀតថា គ្មាន​ស្ដ្រី​ណា ឬ​បុរស​ណា​មាន​សមត្ថភាព​ជាង​លោក​ស្រីគ្លីន​តុន​ឡើយ ដើម្បី​គ្រង​តំណែង​ប្រធានាធិបតី​អាមេរិក​។​លោក​សង្កត់ធ្ងន់​ថា លុះត្រាតែ​អ្នកឯង​អង្គុយ​នៅ​តុ​ធ្វើការ បើ​មិន​អ៊ីចឹង​ទេ​អ្នក​ប្រាកដជា​មិន​ដឹង​ឡើយ​ថា​ត្រូវធ្វើ​អ្វី ត្រូវ​គ្រប់គ្រង​វិបត្ដិ​ក្នុង​ពិភពលោក​យ៉ាង​ម៉េច ឬ​ក៏​ចង់ឲ្យ​អ្នកជំនាន់ក្រោយ​ជួប​សង្គ្រាម​?​ប៉ុន្ដែ​សម្រាប់​លោក​ស្រីគ្លីន​តុន​ធ្លាប់​ធ្វើ​កិច្ចការ​នេះ ហើយ​លោក​ស្រី​ក៏​ធ្លាប់​ជា​ផ្នែក​មួយ​នៃ​ការសម្រេចចិត្ដ​លើ​បញ្ហា​ដែល​បាន​ជួបប្រទះ​ជាច្រើន​មក​ដែរ​។​


​ការលើកឡើង​របស់​លោក​អូ​បា​ម៉ា ចង់​សម្ដៅ​គ្រា​ដែល​លោក​ស្រីគ្លីន​តុន​នៅ​ជា​រដ្ឋមន្ដ្រី​ការបរទេ​ស​អាមេរិក កាលណោះ​លោក​ស្រី​បាន​ស្ថិតនៅ​ជួរមុខ ដោះស្រាយ​បញ្ហា​ជាមួយ​នឹង​ភាព​វ័យ​ឆ្លាត ការវិនិច្ឆ័យ​ត្រឹមត្រូវ និង​វិន័យ​ដ៏​ល្អ​របស់​លោកស្រី​។​ដូច្នេះ​វា​ជា​ផ្នែក​មួយ​ដែល​លោក​អូ​បា​ម៉ា​គាំទ្រ​លោក​ស្រីគ្លីន​តុ​ន​។​


​ដោយឡែក​សម្រាប់​លោក​ដូណាល់ ត្រាំ ដែល​ទើបតែ​ជាប់​ការតែងតាំង​ផ្លូវការ​ជា​បេក្ខជន​ប្រធានាធិបតី​តំណាង​បក្ស​សាធារណរដ្ឋ លោក​អូ​បា​ម៉ា​មិន​ពេញចិត្ដ​ហើយក៏​មិន​គាំទ្រ​ឲ្យធ្វើ​ជា​ប្រធានាធិបតីអាមេ​រិក​ដែរ​។​លោក​អូ​បា​ម៉ា​បាន​រិះគន់​លើ​គោលនយោបាយ​មួយចំនួន​របស់​លោក​ដូណាល់ ត្រាំ មាន​គោលនយោបាយ​ទាក់ទង​នឹង​ជនអន្ដោប្រវេសន៍​ជាដើម ហើយ​លោក​បារម្ភ​ខ្លាច​អាមេរិក​ត្រូវ​ជួប​គ្រោះថ្នាក់ នៅ​ពេល​លោក​ត្រាំ​ជាប់​ជា​ប្រធានាធិបតី​។​


​យ៉ាងណាក៏ដោយ អ្វីៗ​មិន​អាច​ដឹង​មុន​បាន​ឡើយ ត្រូវ​រង់ចាំ​ការបោះឆ្នោត​នៅ​ខែ​វិច្ឆិកា​ខាង​មុខ​បិទ​បញ្ចប់​សិន​។​ទាំង​លោក​ស្រីគ្លីន​តុន​និង​លោកត្រាំ​សុទ្ធតែ​មាន​សំឡេង​គាំទ្រ​ដូចគ្នា ពិបាក​សន្និដ្ឋាន​ណាស់​ថា នរណា​នឹង​ក្លាយ​ជា​ប្រធានាធិបតី​អាមេរិកឲ្យ​ពិតប្រាកដ​។​ហេតុនេះ​មាន​តែ​រង់ចាំ​មើល​ទាំងអស់គ្នា​៕

ព័ត៌មានផ្សេងទៀត