សាលារាជធានីភ្នំពេញ​នៅមិនទាន់​ទទួលបាន​លិខិត​បញ្ជាក់ពីការ​ដង្ហែសព​លោក​កែម ឡី​

19-07-2016 1:32 pm 1672

​ទីបំផុត គណៈកម្មការ​បុណ្យ​សព និង​ក្រុមគ្រួសារ​សព​បាន​សម្រេច​ធ្វើការ​ដង្ហែ​សព​លោក​កែម ឡី ទៅ​បញ្ចុះ​នៅ​ស្រុកកំណើត​របស់​លោក​នា​ចុង​សប្តាហ៍​នេះ ក្រោយ​ពី​ពន្យារពេល​ម្តង​រួចមកហើយ ក្រោម​មូលហេតុ​ជាការ​សំណូមពរ​របស់​សាធារណជន ដែល​ចង់​បន្ត​មក​ចូលរួម​ចែករំលែក​ទុក្ខ​នៅក្នុង​ពិធីបុណ្យ​នេះ នៅ​វត្ត​ពោធិយារាម ហៅ​វត្ត​ចាស់​។

 

​បើ​តាម​សេចក្តីប្រកាស​ព័ត៌មាន​ស្តីពី​ការ​ដង្ហែ​សព​លោក​បណ្ឌិត​កែម ឡី បានឲ្យដឹងថា នៅ​ម៉ោង​៧​ព្រឹក​ថ្ងៃ​អាទិត្យ ទី​២៤ ខែកក្កដា សព​លោក​បណ្ឌិត​កែម ឡី នឹង​ចាប់ផ្តើម​ដង្ហែ​ចេញពី​វត្ត​ពោធិយារាម ហៅ​វត្ត​ចាស់ តាម​បណ្តា​យ​ផ្លូវជាតិ​លេខ​៣ ឆ្ពោះ​ទៅ​ទីកន្លែង​កំណើត​របស់​បណ្ឌិត​ស្ថិតនៅ​ភូមិ​អង្គ​តា​កុក ឃុំ​លាយ​បូរ ស្រុក​ត្រាំកក់ ខេត្តតាកែវ​។ ជាមួយគ្នានេះ គណៈកម្មការ​បុណ្យ​សព​បាន​អំពាវនាវ​ឲ្យ​សាធារណៈ​ជនជាតិ និង​អន្តរជាតិ​ចូលរួម​អមដំណើរ​សព​លោក​បណ្ឌិត​កែម ឡី ឲ្យបាន​ច្រើន​កុះករ​។​

 

​ទាក់ទង​នឹង​គម្រោង​ហែរ​សព​លោក​បណ្ឌិត​កែម ឡី នៅ​ចុង​សប្តាហ៍​នេះ​ដែរ សាលា​រាជធានី​ភ្នំពេញ រហូតមក​ដល់​រសៀល​ថ្ងៃទី​១៩​កក្កដា​នេះ នៅ​មិនទាន់​ទទួល​បាន​លិខិត​ជូន​ដំណឹង​ពី​ថ្ងៃ​ដង្ហែ​សព​ជា​ផ្លូវការ​នៅឡើយ​ទេ​។ លោក​មាន ចាន់​យ៉ាដា អ្នកនាំពាក្យ​សាលា​រាជធានី​ភ្នំពេញ បាន​ប្រាប់​វិទ្យុ​វាយោ​ថា គិត​មក​ដល់​ម៉ោង​២​រសៀល​នេះ ក្រុមគ្រួសារ​សព​លោក​កែម ឡី នៅ​មិនទាន់​យក​លិខិត​បញ្ជាក់​ពី​ថ្ងៃ​ដង្ហែ​សព​មក​ជូន​សាលា​រាជធានី​ភ្នំពេញ​នៅ​ឡើយ​ទេ​....​។​

​សំឡេង​លោក​មាន ចាន់​យ៉ាដា​៖

 

​អ្នកនាំពាក្យ​សាលា​រាជធានី​ភ្នំពេញ​រូបនេះ បញ្ជាក់ដែរថា សាលា​រាជធានី​មានការ​ខកបំណង​យ៉ាងខ្លាំង ចំពោះ​គណៈកម្មការ​រៀបចំ​ពិធី​បុណ្យសព និង​ក្រុមគ្រួសារ​សព ដែល​បាន​សម្រេច​លើក​ពេល​ដង្ហែរ​សព​លោក​កែម ឡី ដូច​អ្វី​ដែល​គណៈកម្មការ​នេះ​ធ្លាប់​បាន​ស្នើសុំ​មក​សាលា​រាជធានី​នោះ​។ លោក​មាន ចាន់​យ៉ាដា ឲ្យដឹងទៀតថា នឹង​អញ្ជើញ​ក្រុមគ្រួសារ​សព ក៏​ដូចជា​គណៈកម្មការ​រៀបចំ​បុណ្យ​សព​មក​ពិភាក្សា​លើ​ចំណុច​នេះ ដោយសារ​តែ​ខកខាន​ម្តង​រួចមកហើយ​។

 

​សូមជម្រាបថា កាលពី​ថ្ងៃ​ទី​១៦ ខែកក្កដា ព្រះ​តេជគុណ​ប៊ុត ប៊ុនតិញ គណៈកម្មការ​រៀបចំ​បុណ្យសព បានប្រកាស​ពន្យារពេល​ហែរ​សព​លោក​កែម ឡី ដែល​គ្រោង​ដង្ហែ​នៅ​ថ្ងៃទី​១៧​កក្កដា ក្រោម​មូលហេតុ​ជាការ​សំណូរមពរ​របស់​សា​ធា​រណជន ដែល​ចង់​បន្ត​មក​ចូលរួម​ចែករំលែក​ទុក្ខ​នៅក្នុង​ពិធីបុណ្យ​នេះ​។ ហើយ​ការគ្រោង​ដង្ហែ​សព​លោក​បណ្ឌិត​កែម ឡី​នេះដែរ ក៏​មាន​ការលេចលឺ​ព័ត៌មាន​ថា មាន​ការមិនចុះសម្រុង​គ្នា​បន្តិចបន្តួច​រវាង​ក្រុមគ្រួសារ​សព និង​គណៈកម្មការ​រៀប​ចំ​បុណ្យសព​ផងដែរ​៕

(​ដោយ​៖ អឿន ភា​រ៉ា​)

 ពាក្យគន្លឹះ  កែម ឡី​

ព័ត៌មានផ្សេងទៀត