អង្គការ​សង្គម​ស៊ីវិល​ទទូចឲ្យ​រដ្ឋាភិបាល​ស្តារ​បរិយាកាស​នយោបាយ​ឡើងវិញ​

13-07-2016 1:43 pm 2582

ក្រុមអង្គការសង្គមស៊ីវិល ចាត់ទុកការជាការបាត់បង់លោកកែម ឡី គឺជាការបន្ថែម​ទម្ងន់កាន់​តែខ្លាំង​ទៅ​លើ​បញ្ហាដែលកើត​មាន​កន្លងមក ​ ដែលបង្កើនឲ្យបរិយាកាស មុន​ការ​បោះ​ឆ្នោត​ខាងមុខ ស្ថិត​ក្នុងការ​បំភិតបំភ័យ គំរាមកំហែង និងការភ័យខ្លាច។ ក្រុមអង្គការសង្គមស៊ីវិល ទាម​ទារឲ្យ ការ​ស៊ើប​អង្កេត របស់​សមត្ថកិច្ច​ប្រកបដោយឯករាជ្យ និងតម្លាភាព ហើយរដ្ឋាភិបាលត្រូវតែ​ស្តារ​បរិយា​កាស​នយោ​បាយ​ឡើង​វិញ សម្រាប់ការចុះឈ្មោះបោះឆ្នោត និងអំឡុងពេលបោះឆ្នោត ត្រូវតែ​ប្រកប​ដោយសុវត្ថភាព និងសេរី​ភាព​ពេញលេញ។

 

អង្គការសង្គមស៊ីវិលធំៗនៅកម្ពុជា ប្រមាណជាង១០បានចេញសេចក្តីថ្លែងការណ៍ ទទូចឲ្យរដ្ឋាភិបាល​កម្ពុជា​ ត្រូវតែ​ស្តារបរិយាកាសនយោបាយឡើង ដើម្បីសុវត្ថិភាពសម្រាប់ការបោះឆ្នោតមួយ ប្រកបដោយ​សេរី និងយុត្តិធម៌នៅ​ពេលខាងមុខ។ការចេញសេចក្តីថ្លែងការណ៍នេះ ធ្វើឡើងបន្ទាប់ពី មានករណី​ឃាត​កម្ម​ដ៏​សាហាវ​ឃោរ​ឃៅ លើលោក​កែម ឡី ដែលអង្គការសង្គមស៊ីវិលទាំងនេះចាត់ទុកថា លោកកែម ឡី គឺជាតួអង្គតែ​មួយ​គត់ ក្នុងការ​ផ្តល់​ភាពជឿជាក់ ​ជូនប្រជាពលរដ្ឋចូលក្នុងដំណើរការនយោបាយ និងការ​បោះឆ្នោត។

សេចក្តីថ្លែងការណ៍ បានចាត់ទុកការស្លាប់របស់លោកកែម ឡី គឺជាការបាត់បង់ដ៏ធំអំពីការបញ្ចេញមតិ ការពិភាក្សាខាង​នយោបាយសម្រាប់ការបោះឆ្នោតខាងមុខដ៏មានអត្ថន័យ។ក្រុមអង្គការសង្គមស៊ីវិលដដែល​លើកឡើងថា ករណីនេះគឺជា​ការបន្ថែមទម្ងន់កាន់តែខ្លាំងទៅលើករណីផ្សេងទៀត ដែលកើត​មាន​កន្លងមក ជាលំនាំ​ការចោទប្រកាន់ ការវាយដំ ការ​ចាប់ខ្លួនតំណាងរាស្ត្រ និងការចោទប្រកាន់​មន្ត្រី​អង្គការ​​សង្គមស៊ីវិលខាងសិទ្ឋិមនុស្ស​ ដែលបង្កើនឲ្យបរិយាកាសមុនការ​បោះឆ្នោតខាងមុខ ស្ថិតក្នុងការ​បំភិតបំភ័យ គំរាមកំហែង និងការភ័យខ្លាច។

 

លោកកែម ឡី ត្រូវបានក្រុមអង្គការសង្គមស៊ីវិល ចាត់ទុកជាធនធានមនុស្ស​ដ៏មានសក្តានុពលក្នុង​ការ​លើក​ស្ទួយ និងជំរុញការពិភាក្សាដេញដោលលើការដឹកនាំរដ្ឋាភិបាល បញ្ហានយោបាយ ព្រំដែន សិទ្ឋិ​មនុស្ស ធនធានធម្មជាតិ បរិស្ថាន និងអភិបាលកិច្ច ដូចជារបាយការណ៍ថ្មីៗនេះរបស់Global Witness ដែលជះឥទ្ឋិពលខ្លាំងទៅលើ​ក្រុម​យុវជន និងប្រជាពលរដ្ឋ ពិសេសអ្នកប្រើប្រាសបណ្តាញសង្គម និង​អ្នក​តាមដានព័ត៌មាននៅតាមប្រព័ន្ឋ​ផ្សព្វ​ផ្សាយ​ឯករាជ្យ។​ដូច្នេះការសម្លាប់នេះពិតជាមានឥទ្ឋិពល ដែលប៉ះ​ពាល់ និងទាក់ទងដល់បញ្ហា និងដំណើរការនយោ​បាយ​នៅកម្ពុចា ពិសេសការបោះឆ្នោតនៅ​ពេលខាង​មុខ។

 

សេចក្តីថ្លែងការណ៍ដដែលបញ្ជាក់ថា អង្គការសង្គមស៊ីវិល និងប្រជាពលរដ្ឋ មានការសង្ស័យយ៉ាង​ខ្លាំង​អំពី​ការផ្តល់​សក្ខីកម្មរបស់ជនសង្ស័យដែលបានផ្សព្វផ្សាយកន្លងមក ហើយអង្គការសង្គមស៊ីវិល ទាម​ទារឲ្យ ការស៊ើបអង្កេត​របស់សមត្ថកិច្ចប្រកបដោយឯករាជ្យ និងតម្លាភាព ហើយរដ្ឋាភិបាលត្រូវតែ​ស្តារ​បរិយាកាសនយោបាយឡើង​វិញ សម្រាប់ការចុះឈ្មោះបោះឆ្នោត និងអំឡុងពេលបោះឆ្នោត ត្រូវតែ​ប្រកប​ដោយសុវត្ថភាព​ និងសេរីភាពពេញលេញ។

 

ជាការកត់សម្គាល់លោកកែម ឡី ត្រូវបានពលរដ្ឋខ្មែរទូទៅទទួលស្គាល់ថា ជាអ្នកវិភាគដ៏ក្លាហានមួយរូប ដែលហាន​រិះគន់ចំៗ លើការដឹកនាំរបស់រដ្ឋាភិបាល ពីបញ្ហានយោបាយ បញ្ហាអភិបាលកិច្ច ហើយ​ចុង​ក្រោយ លោកបានធ្វើការ​វិភាគ​ទាក់ទងនឹងរបាយការណ៍អាជីវកម្មត្រកូល«ហ៊ុន»របស់អង្គការ Global Witnessផងដែរ៕

 

ដោយ៖ខាត់ សុធី

 

 

 ពាក្យគន្លឹះ  អង្គការសង្គមស៊ីវិល

ព័ត៌មានផ្សេងទៀត