លោក​ដូណាល់​ត្រាំ​​ឈ្នះ​សំឡេង​គាំទ្រ​​សមល្ម​ម​អា​ចតែង​តាំង​ជា​​បេក្ខជន​​តំណាង​បក្ស​​បាន​ហើយ​

27-05-2016 10:23 am 1570
បេក្ខជនប្រធានាធិបតីបក្សសាធារណរដ្ឋលោក​ដូណាល់ត្រាំ

​ពី​មុន​ឡើយ​លោក​ដូណាល់​ត្រាំគ្រាន់​តែ​ត្រូវ​គេ​សន្និដ្ឋាន​ថា អាច​ក្លាយជា​បេក្ខជន​ប្រធានាធិបតី​តំណាងឲ្យគណបក្ស​សាធារណ​រដ្ឋ នៅ​ពេល​លោក​បាន​យកឈ្នះ​លើ​គូប្រកួត​ក្នុង​ការបោះឆ្នោត​ជ្រើសរើស​បេក្ខជន​តំណាង​បក្ស​ក្នុង​រដ្ឋ​នៅ​អាមេរិក​។​លោក​ដូណាល់​ត្រាំ​បាន​យកឈ្នះ​លើ​បេក្ខជន​ក្នុង​បក្ស​១៦​នាក់​ផ្សេង​ទៀត ដោយ​ធ្វើឲ្យ​ពួកគេ​ត្រូវ​ធ្លាក់ចេញ​ពី​ការប្រ​កួ​ត​។​

 

​ប៉ុន្ដែ​កាលពី​ថ្ងៃ​ទី​២៦​ឧសភា លោក​ដូណាល់​ត្រាំ​បានឈ្នះ​ជា​ផ្លូវការ​នូវ​សំឡេង​គាំទ្រ​ពី​គណៈប្រតិភូ​ក្នុង​បក្ស ហើយ​មាន​សិទ្ធិ​គ្រប់គ្រាន់​ធ្វើជា​បេក្ខជន​ប្រធានាធិបតី​តំណាង​បក្ស មិនចាំបាច់​ភ័យខ្លាច​ឡើយ​។​ដើម្បី​អាច​ត្រូវ​តែងតាំង​ជា​បក្ខជន​ប្រធានាធិបតី​តំណាង​បក្ស​បាន លោក​ត្រាំ​ត្រូវ​ស្វែងរក​សំឡេងគាំទ្រ​១,២៣៧​សំឡេង​ពី​គណៈប្រតិភូ​ក្នុង​បក្ស​សិន តែ​ពេល​នេះ​លោក​ទទួលបាន​ការគាំទ្រ​១,២៣៨​សំឡេង​ហើយ លើស​មួយ​សំឡេង​។​នេះ​បើ​តាម​ការបញ្ជាក់​ពី​ទីភ្នាក់ងារ​សារព័ត៌មាន​Associated Press​។​ដូច្នេះ​បានន័យថា លោក​ដូណាល់​ត្រាំ​ពិតជា​ឈ្នះ​ការតែងតាំង​ជា​បេក្ខជន​ប្រធានាធិបតី​តំណាង​បក្ស​សាធារណរដ្ឋ​មិន​អាច​ប្រកែក​បាន​។​


​គណបក្ស​សាធារណរដ្ឋ​នឹង​បញ្ចប់​ការតែងតាំង​បេក្ខជន​ប្រធានាធិបតី​នៅក្នុង​មហាសន្និបាត​ក្នុង​ខែ​កក្កដា​ខាង​មុខ​។​ចំពោះ​លោក​ដូណាល់​ត្រាំ ទោះបី​ឈ្នះ​សំឡេង​គ្រប់គ្រាន់​អាច​ត្រូវ​តែងតាំង​ជា​បេក្ខជន​ប្រធានាធិបតី​តំណាង​បក្ស ប៉ុន្ដែ​ការតែងតាំង​នៅ​មិនទាន់​មាន​សុវត្ថិភាព​ទាំងស្រុង​ទេ​។​គណៈប្រតិភូ​នៅ​ក្នុង​បក្ស​អាច​ដកចិត្ដ​ទៅ​គាំទ្រ​បេក្ខជន​ផ្សេងទៀត តាម​ជម្រើស​ដែល​ខ្លួន​ពេញចិត្ដ​។​


​ប្រសិនបើ​ក្រោយ​បិទ​បញ្ចប់​ការតែងតាំង​បេក្ខជន​ប្រធានាធិបតី គណបក្ស​សាធារណរដ្ឋ​សម្រេច​តែងតាំង​លោក​ដូណាល់​ត្រាំ​មែន នោះ​លោក​អាច​ត្រូវ​ប្រកួតប្រជែង​នឹង​បេក្ខជន​ប្រធានាធិបតី​ដ៏​មាន​ប្រជាប្រិយភាព​មួយ​រូប​របស់​គណបក្ស​ប្រជាធិបតេយ្យ គឺ​លោកស្រី​ហ៊ីល​ឡា​រី គ្លី​ន​តុ​ន​។​បច្ចុប្បន្ន​លោក​ស្រីគ្លីន​តុន​កំពុង​នាំមុខ​ក្នុង​គណបក្ស​ប្រជាធិបតេ​យ្យ ប៉ុន្ដែ​លោកស្រី​ក៏​កំពុង​ជួប​ភាព​ប្រទាំង​ប្រទើស​ពាក់ព័ន្ធ​នឹង​ការប្រើប្រាស់​អ៊ីមែល​ផ្ទាល់ខ្លួន​ក្នុង​កិច្ចការ​រដ្ឋាភិបាល ដែល​ទង្វើ​នេះ​ត្រូវ​បាន​ហាមឃាត់​នៅ​អាមេរិក​។​ប៉ុន្ដែ​យ៉ាងណា​ក៏ដោយ​លោក​ស្រីគ្លីន​តុន​អះអាងថា បញ្ហា​ប្រើប្រាស់​អ៊ីមែល​របស់​លោក​ស្រី​នឹង​មិន​ប៉ះពាល់​ដល់​ការប្រកួតប្រជែង​តំណែង​ជា​ប្រធានាធិបតី​អាមេរិក​របស់​លោកស្រី​ឡើយ​។​


​គួរ​ជម្រាប​ថា នៅពេល​គណបក្ស​ទាំងពីរ​របស់​អាមេរិក​បញ្ចប់​ការតែងតាំង​បេក្ខជន​ប្រធានាធិបតី​ហើយ អ្នក​ត្រូវ​តែងតាំង​តំណាង​បក្ស​នឹង​ត្រូវ​ចូលរួម​ការបោះឆ្នោត​ប្រធានាធិបតី​អាមេរិក ដែល​នឹង​ប្រព្រឹត្ដទៅ​នៅ​ខែ​វិច្ឆិកា​ឆ្នាំ​២០១៦​នេះ​។​តើ​នរណា​មួយ​ដែល​អាច​ឈ្នះ​ការបោះឆ្នោត​ក្លាយ​ជា​ប្រធានាធិបតី​ទី​៤៥​របស់​អាមេរិក បន្ដ​តំណែង​ពី​លោក​បា​រ៉ាក់ អូ​បា​ម៉ា​?

ព័ត៌មានផ្សេងទៀត