ម្ចាស់​ស្ថានីយទូរទស្សន៍​ទាំងអស់​នឹង​ផ្លាស់ប្តូរការ​ផ្សាយ​ភាពយន្ត​បរទេស​ក្នុងពេល​ឆាប់ៗ​នេះ​

30-12-2015 11:52 am 2209

​ម្ចាស់​ស្ថានីយទូរទស្សន៍​ក្នុងប្រទេស​កម្ពុជា​ទាំងអស់​បាន ឯកភាព ក្នុង​ការអនុវត្តន៍​តា​ម​សេចក្តីជូនដំណឹង​របស់​ក្រសួង​ព័ត៌មាន ដោយ​មិន​ធ្វើ​ការចាក់ផ្សាយ​ភាពយន្ត​បរទេស​នៅក្នុង​ចន្លោះ​ម៉ោង​ចាប់ពី​ម៉ោង ៧ ដល់​ម៉ោង ៩​យប់ ទៀត​ទេ​។ ការ​មិន​ចាក់ផ្សាយ​ភាពយន្ត​បរទេស​នេះ គឺ​ដើម្បី​យក​ភាពយន្ត​ខ្មែរ ឬ​កម្មវិធី​ផ្សេងៗ​ដែល ផលិត​ដោយ​ខ្មែរ មកចាក់​ជំនួស​នៅក្នុង​ម៉ោង​នេះ​វិញ​។ នេះ​បើ​តាម​គេហទំព័រ​ទីភ្នាក់ងារ​សារព័ត៌មាន​ជាតិ​។​


​ស្រប​ពេល​ឯកភាព​មិន​ចាក់ផ្សាយ​ភាពយន្ត​បរទេស​នេះ ម្ចាស់​ស្ថានីយទូរទស្សន៍​មួយចំនួន​បាន​សំដែង​ពី​ការព្រួយបារម្ភ​ក្នុង​ការបាត់បង់​ចំណូល ហើយ​អ្នកទស្សនា​នឹង​បែរ​ទៅ​មើល​ប៉ុស្តិ៍​ទូរទស្សន៍​ខ្សែកាប​វិញ ព្រោះ​ទូរទស្សន៍​ខ្សែ​កាប្តិ៍​មានរឿង បរទេស​ដែល​មាន​គុណភាព និង​ល្អមើល​ជាង​ខ្សែភាពយន្ត​ខ្មែរ ដែល​គុណភាព​នៅ​មាន​កម្រិត​នៅឡើយ​។​


​លោក​ខៀវ កាញារីទ្ធ រដ្ឋមន្ត្រីក្រសួង​ព័ត៌មាន បានបញ្ជាក់​ថា ក្រសួង​ព័ត៌មាន ធ្វើ​ដូច្នេះ ក្នុង​គោលបំណង ដើម្បី​លើក​ស្ទួយ​​វិស័យ​វប្បធម៌ និង​អត្តសញ្ញាណ​ជាតិខ្មែរ ហើយក៏​ជា ការឆ្លើយតប​ទៅនឹង​មតិ​មហាជន​មួយចំនួន ដែល​បាន​រិះគន់​អំពី​ការចាក់ផ្សាយ​ភាពយន្ត​បរទេស យ៉ាងច្រើន តាម​បណ្តា​ស្ថានីយ​ទូរទស្សន៍​ក្នុង​ស្រុក​ផងដែរ​។​


​សូមបញ្ជាក់​ថា កាលពី​ព្រឹក​ថ្ងៃទី​២៩ ខែ​ធ្នូ ឆ្នាំ​២០១៥​លោក ខៀវ កាញារីទ្ធ រដ្ឋមន្ត្រីក្រសួង​ព័ត៌មាន បាន​ប្រជុំ ជាមួយ​ម្ចាស់​ស្ថានីយទូរទស្សន៍​ក្នុងប្រទេស​កម្ពុជា​ទាំងអស់ នៅ​ទីស្តីការក្រសួង​ព័ត៌មាន អំពី​ការ​កំណត់​ម៉ោង​ចាក់ផ្សាយ​ភាព​យន្ត​​បរទេស​៕

​(​ដោយ​៖ គីម ចាន់​ចាវ​)

ព័ត៌មានផ្សេងទៀត