​​ក្រុម​ឧទ្ទាម​​ចង់​​ចុះ​ហត្ថលេខា​ជាមួយ​រដ្ឋាភិបាល​​​មី​យ៉ាន់​ម៉ា​ដែលមាន​ការដឹង​លឺ​ពីភាគី​ផ្សេង

05-10-2015 11:13 am 1790

ជម្លោះ​ដ៏​រុំា​រៃ​រវាង​ក្រុម​ឧទ្ទាម​ជនជាតិភាគតិច​មី​យ៉ាន់​ម៉ា​និង​រដ្ឋាភិបាល​នៅ​មិនទាន់​ដាច់​ស្រាច់​នៅឡើយ ព្រោះ​ក្រុម​ឧទ្ទាម​ជនជាតិភាគតិច​មី​យ៉ាន់​ម៉ា​នៅតែ​បន្ត​ទាមទារ​ស្វែងរក​ស្វ័យភាព​នៅក្នុង​តំបន់។ តែ​យ៉ាងណាក៏ដោយ ក្រុម​ឧទ្ទាម​ជនជាតិភាគតិច​មី​យ៉ាន់​ម៉ា​នៅតែ​ព្យាយាម​ស្វែងរក​កិច្ចព្រមព្រៀង​ជាមួយ​រដ្ឋាភិបាល ដើម្បី​ទទួលបាន​ផលប្រយោជន៍​របស់​ខ្លួន​។ នៅ​ថ្ងៃ​ទី​១៥​តុលា​ខាង​មុខ ក្រុម​ឧទ្ទាម​ជនជាតិភាគតិច​មី​យ៉ាន់​ម៉ា​នឹង​ចុះហត្ថលេខា​បទ​ឈប់​បាញ់​នៅ​ទីក្រុង​មី​យ៉ាន់​ណៃ​ពិដោ​(Naypyidaw) ជាមួយ​រដ្ឋាភិបាល​មី​យ៉ាន់​ម៉ា​។


​កាលពី​ថ្ងៃ​ទី​០៣​តុលា ក្រុម​ឧទ្ទាម​ជនជាតិភាគតិច​មី​យ៉ាន់​ម៉ា បាន​ជំរុញ​ឱ្យ​សហគមន៍​អន្តរជាតិ​គាំទ្រ​កិច្ចខិតខំ​ប្រឹងប្រែង​សម្រាប់​កិច្ចសន្ទនា​នយោបាយ​សន្តិភាព​នៅ​មី​យ៉ាន់​ម៉ា​ឱ្យ​ពិតប្រាកដ​។ ការព្រមព្រៀង​ចុះហត្ថលេខា​បទ​ឈប់​បាញ់​នេះ បាន​ធ្វើឡើង​តាមរយៈ​ការចរចា​កាលពី​ថ្ងៃ​ទី​០៤​តុលា រវាង​ក្រុម​ឧទ្ទាម​ជនជាតិភាគតិច​និង​រដ្ឋាភិបាល​មី​យ៉ាន់​ម៉ា នៅ​មជ្ឈមណ្ឌល​សន្តិភាព​មី​យ៉ាន់​ម៉ា​ក្នុង​ទីក្រុង​Yangon ដែល​ច​រចាដោយ​លោក​Aung Min​ប្រធាន​អ្នក​ច​ចារ​សន្តិភាព​របស់​រដ្ឋាភិបាល​មី​យ៉ាន់​ម៉ា​។


​លោក​Aung Min​បានបញ្ជាក់​ថា រដ្ឋាភិបាល​មី​យ៉ាន់​ម៉ា​ប្រកាស​ទទួល​ស្វាគមន៍​ជានិច្ច​ដែល​ក្រុម​ឧទ្ទាម​ជនជាតិភាគតិច​ធ្វើការ​ចុះហត្ថលេខា​បទ​ឈប់​បាញ់ ហើយ​កិច្ចព្រមព្រៀង​បទ​ឈប់​បាញ់​ដែល​នឹង​ត្រូវ​ចុះហត្ថលេខា​នៅ​ពេល​ខាង​មុខ​នោះ នឹង​ចូលរួម​ពី​សាក្សី​ក្នុងស្រុក​និង​អន្តរជាតិ​។ ម្យ៉ាង​ទៀត​នឹង​កោះហៅ មេ​បក្ស​ប្រឆាំង​រដ្ឋាភិបាល​លោកស្រី​Aung San Suu Kyi​ឱ្យ​ចូលរួម​ដែរ​។

 

បើ​តាម​សមាជិក​ជាន់ខ្ពស់ ក្រុម​ច​រ​ចាសន្តិភាព​របស់​រដ្ឋាភិបាល​មី​យ៉ាន់​ម៉ា​លោក​Hla Maung Shwe​បានឱ្យដឹងថា ក្រុម​ឧទ្ទាម​ជនជាតិ​ភាគតិច​នៅ​មី​យ៉ាន់​ម៉ា​ចំនួន​៨​ក្រុម ក្នុង​នោះ​ក្រុម​សម្ព័ន្ធ​ជាតិ​Karen​បាន​សម្រេចចិត្ត​ចុះហត្ថលេខា​បទ​ឈប់​បាញ់​ទូទាំង​ប្រទេស​មី​យ៉ាន់​ម៉ា​។ យ៉ាងណា​ក៏​ដោយ​លោក​ថា ក្រុម​ឧទ្ទាម​ជនជាតិ​ភាគតិច​នៅ​តំបន់​កា​ជី មិន​យល់ព្រម​ចុះហត្ថលេខា​បទ​ឈប់​បាញ់​ឡើយ​។ បើ​តាម​ក្រុមប្រឹក្សា​អង្គការសហប្រជាជាតិ​បានបញ្ជាក់​ថា បទ​ឈប់​បាញ់​ទូទាំងប្រទេស ធ្វើ​ឡើង​តែ​ភាគី​ក្រុម​ឧទ្ទាម​មួយផ្នែក ក៏​នៅតែ​មិន​អាច​ក្លាយ​ជា​បទ​ឈប់​បាញ់​ពេញលេញ​​បានឡើយ​។​


​សូមបញ្ជាក់​ថា ការប្រយុទ្ធ​គ្នា​រវាង​រដ្ឋាភិបាល​មី​យ៉ាន់​ម៉ា និង​ក្រុម​ឧទ្ទាម​ជនជាតិភាគតិច បាន​ផ្ទុះឡើង​ខ្លាំង​នៅ​ឆ្នាំ​២០១៥​នេះ នៅ​តំបន់​កូកាង​ស្ថិត​នៅ​ភាគ​ខាងជើង​រដ្ឋ​Shan​ប្រទេស​មី​យ៉ាន់​ម៉ា​។ ចាប់តាំងពី​រដ្ឋាភិបាល​ស៊ីវិល​លោក​ថេន​សេន​ឡើងកាន់អំណាច​រយៈពេ​ល​៤​ឆ្នាំ​មកនេះ រដ្ឋាភិបាល​បាន​បើកទ្វារ​ឱ្យ​ក្រុម​ឧទ្ទាម​ធ្វើ​ការចរ​ចាដោយ​សន្តិភាព​៕(​ដោយ​៖​លាង ធីតា​)

ព័ត៌មានផ្សេងទៀត