មេដឹកនាំ​​ឃឺ​ដ​​នៅ​អ៊ីរ៉ាក់​​ជំរុញ​ឲ្យ​​រុស្ស៊ី​​និង​​អាមេរិក​​រួមគ្នា​​កម្ទេច​​ក្រុម​​IS

04-10-2015 2:06 pm 2022

​ឃឺ​ដ​ជា​ឈ្មោះ​ជនជាតិភាគតិច​រស់នៅ​តំបន់​មជ្ឈឹម​បូ​ព៌ា ភាគច្រើន​រស់នៅ​តំបន់​ភាគខាងត្បូង​តួរ​គី ភាគ​ខាងលិច​អ៊ីរ៉ង់ ភាគ​ខាងជើង​អ៊ីរ៉ាក់ និង​ភាគ​ខាងជើង​ប្រទេស​ស៊ី​រី ហើយ​មាន​ទំនោរ​សាសនា​និង​ប្រពៃណី​ទៅរក​អ៊ីរ៉ង់​។ ក្រុម​នេះ​បាន​ចូលរួម​ប្រយុទ្ធ​យ៉ាង​ខ្លាំងក្លា​ជាមួយ​រដ្ឋាភិបាល​អ៊ីរ៉ាក់ ប្រឆាំង​ក្រុម​អង្គការ​រដ្ឋ​អ៊ីស្លាម​។

 

​ស្របពេលរុស្ស៊ីកំពុងបើកការវាយប្រហារ ប្រឆាំងក្រុមISនៅស៊ីរី លោក​Massoud Barzani មេដឹកនាំ​ឃឺ​ដ បាន​ចេញ​មក​បង្ហាញ​ការពេញចិត្ត​ចំពោះ​​រុស្ស៊ី ខណៈ​អាមេរិក​កំពុង​រិះគន់​រុស្ស៊ី​ស្ទើរ​រាល់ថ្ងៃ​ទាក់ទង​ការវាយប្រហារនេះ​។ ក្រៅពីស្វាគមន៍​វត្តមាន​រុស្ស៊ី​នៅ​មជ្ឈឹម​បូ​ព៌ា មេដឹកនាំ​ឃឺ​ដក៏​បាន​និយាយ​ផងដែរ​ថា ប្រសិនបើ​រុស្ស៊ី និង​ក្រុមចម្រុះ​ដឹកនាំ​ដោយ​អាមេរិក​រួមគ្នា កម្ទេច​ក្រុម​រដ្ឋ​អ៊ីស្លាម លទ្ធផល​ប្រាកដជា​ល្អប្រសើរ​មិន​ខាន​។

 

​មិន​ត្រឹមតែ​មេដឹកនាំ​ឃឺ​ដ​ក្នុងប្រទេស​អ៊ីរ៉ាក់​ទេ​ដែល​ស្វាគមន៍​រុស្ស៊ី លោកនាយក​រដ្ឋមន្ត្រី​អ៊ីរ៉ាក់​ក៏​សំដែង​ការពេញចិត្ត​ពី​វត្តមាន​រុស្ស៊ី​នៅ​តំបន់​មជ្ឈឹម​បូព៌ា​នេះដែរ​។ លោកនាយក​រដ្ឋមន្ត្រី​អ៊ីរ៉ាក់​និយាយថា ខ្លួន​បាន​​ត្រៀម​ខ្លួន​សហការ​រួចជាស្រេច នៅ​ក្នុង​ការ​ស៊ើបការណ៍​និង​សន្តិសុខ​ក្នុង​ក្រុង​បា​ដា​ដ ជាមួយ​ប្រទេស​រុស្ស៊ី អ៊ីរ៉ង់ ស៊ី​រី​ដើម្បី​ប្រឆាំង​ក្រុម​IS​។ តែ​មន្ត្រី​អ៊ីរ៉ាក់​ឆ្លៀត​បញ្ជាក់ថា ការសហការ​ជាមួយ​រុស្ស៊ី មិនមែន​មានន័យថា អាមេរិក​នឹង​បាត់បង់​ឥទ្ធិពល​ជាមួយ​រដ្ឋាភិបាល​ក្រុង​បា​ដា​ដ​នោះទេ​។​

យន្តហោះ​ចម្បាំង​រុស្ស៊ី បាន​ចាប់ផ្តើម​បើក​ការវាយប្រហារ​តាម​អាកាស​ក្នុងប្រទេស​ស៊ី​រី​កាលពីដើម​សប្តាហ៍​នេះ​។ ប៉ុន្តែ​ក្រុមចម្រុះ​អន្តរជាតិ​ដឹកនាំ​ដោយ​អាមេរិក បាន​ចោទ​រុស្ស៊ី​ថា វាយប្រហារ​លើ​គោលដៅ​ផ្សេង​​ច្រើនជាង​វាយប្រហារ​លើ​ក្រុម​IS​។ ក្រៅពី​នោះ​ក៏​បាន​ចោទថា រុស្ស៊ី​មានបំណង​ជួយ​ប្រធានាធិបតី​ស៊ី​រី ដើម្បី​រក្សា​តំណែង ខណៈ​អាមេរិក​ចង់ឃើញ​ប្រធានាធិបតី​ស៊ី​រី​ចាកចេញ​ពី​តំណែង​ប្រធានាធិបតី​។ ចង់​អ្នក​ណា​រិះគន់​អ្វី​ក៏​រុស្ស៊ី​មិន​ខ្វល់​ដែរ ដោយ​នៅ​តែ​បន្ត​យុទ្ធនាការ​វាយប្រហារ​ក្នុង​ប្រទេស​ស៊ី​រី​ទៀត​នៅ​ថ្ងៃ​សៅរ៍​ទី​០៣​តុលា​៕(​ដោយ​៖​អ៊ុន សុខ​ឡា​)

ព័ត៌មានផ្សេងទៀត