ក្រុមបាតុករ​​រាប់ពាន់​​នាក់​​តវ៉ា​នៅ​អ៊ីរ៉ាក់​​ទាមទារ​ឲ្យ​​រដ្ឋាភិបាល​​ធ្វើ​កំណែ​ទម្រង់​

03-10-2015 2:28 pm 1669
ទិដ្ឋភាព​ក្រុមបាតុករ​តវ៉ា​​នៅ​ក្នុង​ប្រទេស​អ៊ីរ៉ាក់

​ក្រុមបាតុករ​រាប់ពាន់​នាក់​បាន​នាំគ្នា​ត​វ៉ា​នៅក្នុង​ទីក្រុង​បា​ដា​ដ​និង​នៅតាម​ទីក្រុង​មួយចំនួន​ទៀត​ក្នុង​ប្រទេស​អ៊ីរ៉ាក់​។ ការប្រមូលផ្ដុំ​តវ៉ា​នេះ បាន​ធ្វើឡើង​កាលពី​ថ្ងៃ​ទី​០២​តុលា ក្នុង​គោលបំណង​ដាក់​សម្ពាធ​ដល់​រដ្ឋាភិបាល​អ៊ីរ៉ាក់ ឲ្យ​គោរព​តាម​សន្យា​របស់ខ្លួន ចំពោះ​ការធ្វើ​កំណែទម្រង់ គឺ​ការដោះស្រាយ​បញ្ហា​អំពើ​ពុករលួយ​និង​ការ​អ​ភ​វិ​ឌ្ឍ​ន៍​លើ​សេវា​នានា​។ ការតវ៉ា​នៅ​ក្នុង​ប្រទេស​អ៊ីរ៉ាក់ បាន​ធ្វើឡើង​ប្រចាំ​សប្ដាហ៍​តាំងពី​ខែកក្កដា​មកម្ល៉េះ ដែល​ជា​ចលនា​ទាមទារ​ឲ្យ​កាត់បន្ថយ​អំណាចរដ្ឋាភិបា​ល ដើម្បី​ធ្វើ​កំណែទម្រង់​នយោបាយ​។


​នៅ​ក្នុង​ចលនា​តវ៉ា មាន​ការចូលរួម​យ៉ាង​ច្រើន​ពី​ប្រជាជន​សាមញ្ញ រួម​នឹង​ក្រុម​សកម្មជន អង្គការ​សង្គម​ស៊ីវិល​ជាច្រើន​ទៀត ទាមទារ​តម្រូវកា​ររ​បស់​ខ្លួន​ឲ្យ​រដ្ឋាភិបាល​ធ្វើ​កំណែទម្រង់​តាម​ការសន្យា​។ អ្នកចូលរួម​ការតវ៉ា​ម្នាក់​បាន​លើកឡើង​ថា លោកនាយក​រដ្ឋមន្ដ្រី​ត្រូវ​បាន​ហាមឃាត់​ក្នុង​កិច្ចខិតខំ​ប្រឹងប្រែង​ធ្វើកំណែទម្រង់​ដោយ​គណបក្ស​Dawa របស់​លោក​ផ្ទាល់​។ ក្រៅពីនេះ នៅ​មាន​អង្គការ​សង្គម​ស៊ីវិល​ផ្សេង​ទៀត​សម្ដែង​ការ​មិន​ពេញចិត្ដ​ដូចគ្នា និង​និយាយ​ថា​ការតវ៉ា​កើតឡើង ដោយសារ​បច្ចុប្បន្ន​ការធ្វើកំណែទម្រង់​របស់​លោកនាយក​រដ្ឋមន្ដ្រី​Haider al-Abadi​ដើរ​យឺត​ពេក​។


​សូមបញ្ជាក់​ថា ការតវ៉ា​របស់​ក្រុមបាតុករ​ធ្វើឡើង​ក្រោម​ការការពារ​ពី​ប៉ូលិស​និង​កងទ័ព​ជាច្រើន​នាក់ ដើម្បី​ការពារ​កុំឲ្យ​មាន​គ្រោះថ្នាក់​កើតឡើង​។ មាន​ក្រុម​តវ៉ា​មួយចំនួន​តូច​ត្រូវបាន​ចាប់ខ្លួន​នៅ​ក្នុង​ទីក្រុង​ដទៃ​ក្រៅ​ពី​ទីក្រុង​បា​ដា​ដ​ផងដែរ ជា​ទីក្រុង​មាន​ការប្រមូល​ផ្ដុំ​ដូចគ្នា​៕​​ដោយ​៖​ពេញ ផេង​

ព័ត៌មានផ្សេងទៀត