ក្រសួង​រ៉ែ​​៖​​គ្មាន​ឡើយ​​ការ​​បូម​​ខ្សាច់​​ខុសច្បាប់​​នៅ​​តំបន់​ខេត្ត​កោះកុង

24-06-2015 6:47 pm 2525

​ការធ្វើ​អាជីវកម្ម​បូម​ខ្សាច់​យ៉ាង​អាណាធិបតេយ្យ នៅ​តំបន់​ជាច្រើន ក្នុង​ខេត្ត​កោះកុង បាន​ធ្វើឲ្យ​ប្រជាពលរដ្ឋ ពិសេស​ក្រុម​សកម្មជន​ចលនា​មាតា​ធម្មជាតិ ព្រួយបារម្ភ​ពី​ផលប៉ះពាល់​ដល់​ធនធាន​ធម្មជាតិ ដូចជា​ការបំផ្លាញ​ព្រៃកោងកាង ដែល​ដុះ​តាម​មាត់​ព្រែក ជីវចម្រុះ​ក្នុង​ទឹក និង​មច្ឆជាតិ ជា​ប្រភព​ស្បៀង​របស់​ពលរដ្ឋ ដែល​ប្រកប​មុខរប​នេសាទ  និង​ធ្វើឲ្យ​បំពុលទឹក បាក់​ឆ្នេរ និង​បាត់​កោះ​តូចៗ​ដូចជា កោះ​កាបុង​ជាដើម​។ តំបន់​ដែល​ធ្វើ​អាជីវកម្ម​បូម​ខ្សាច់​យ៉ាង​អាណាធិបតេយ្យ​នោះ គឺ​ស្ថិតក្នុង តំបន់​ស្ពាន​ស្រែអំបិល ស្ពាន​អណ្តូងទឹក ស្ពាន​ស្រែ​រូង និង​ស្ពាន​តាតៃ​ជាដើម​។ ក្រុមហ៊ុន​ដែល​ធ្វើ​សកម្មភាព​បូម​ខ្សាច់​ទាំងនោះ គឺជា​ក្រុមហ៊ុន​វៀតណាម​។ នេះ​បើ​តាម​ការអះអាង​ពី​សំណាក់​លោក​ស៊ន ចាន់​ដា​រ៉ា សកម្មជន​ចលនា​មាតា​ធម្មជាតិ ប្រាប់​ដល់​វិទ្យុ​វាយោ​នៅ​ថ្ងៃទី​២៤ មិថុនា​នេះ​។​ ​ក្រុម​សកម្មជន​ចលនា​មាតា​ធម្មជាតិ ក៏​នឹង​ជួបជុំ​គ្នា​ផង​ដែរ​នៅ​មុខ​មន្ទីរ​រដ្ឋសភា និង​ស្ថានទូត​សិង្ហ​បុរី នៅ​ថ្ងៃ​ទី​២៥ មិថុនា ដើម្បី​ធ្វើ​យុទ្ធនាការ បញ្ឈប់​ការ​បូម​ខ្សាច់ នៅ​ទូទាំង​ខេត្ត​កោះ​ជា​បណ្តោះអាសន្ន ដើម្បី​រង់ចាំ​ការសិក្សា​ពី​ផល​ប៉ះពាល់​ពី​ក្រុមអធិការកិច្ច ក្រសួង​រ៉ែ និង​ថាមពល​។​

សម្លេង​លោក​ស៊ន ចាន់​ដា​រ៉ា​

 

​កន្លងមក​ក្រុម​សកម្មជន​ចលនា​មាតា​ធម្មជាតិ ប្រជាពលរដ្ឋ​នៅ​តាម​មូលដ្ឋាន រួម​នឹង​សកម្មជន​មួយចំនួនទៀត ធ្លាប់បាន​ធ្វើ​យុទ្ធនាការ​បណ្តេញ​ក្រុមហ៊ុន​ដែល​ធ្វើ​សកម្មភាព​បូម​ខ្សាច់​នេះ និង​ការផ្ញើ​ញត្តិ​ដាក់ជូន​រដ្ឋសភា ដើម្បី​ឲ្យ​គណៈកម្មការ​ទី​៣​នៃ​រដ្ឋសភា កោះហៅ​ក្រសួង​ពាក់ព័ន្ធ​ដើម្បី​ចាត់​វិធានការ​ចំពោះ​បញ្ហា​នេះ ប៉ុន្តែ​គ្មាន​ការឆ្លើយតប​។​

​សម្លេង​លោក​ស៊ន ចាន់​ដា​រ៉ា

 

​ក្រសួង​រ៉ែ និង​ថាមពល តាមរយៈ​លោ​កឌិត ទីណា រដ្ឋលេខាធិការ បាន​អះអាង​ថា សម្រាប់​ការ​បូម​ខ្សាច់​នៅ​តំបន់​មួយចំនួន​ក្នុង​ខេត្ត​កោះកុង មិនមានក្រុមហ៊ុនណាមួយដែល ខុសច្បាប់​នោះ​ទេ សុទ្ធតែ​​ជា​ក្រុមហ៊ុន មាន​អាជ្ញា​បណ្ណ​ត្រឹមត្រូវ​។ លោ​កឌិត ទីណា បាន​សង្កត់ធ្ងន់ថា សម្រាប់​ការតវ៉ា លើ​បញ្ហា​បូម​ខ្សាច់​នៅ​ខេត្ត​កោះកុង​នេះ អាច​ជា​ការតវ៉ា​បែប​នយោបាយ និង​ទាំង​ងងឹត​ងងុល ដោយ​មាន​គ្មាន​ហេតុផល​បច្ចេកទេស​ច្បាស់លាស់​។ ក្រុមអធិការកិច្ច ក្រសួង​រ៉ែ និង​ថាមពល បាន​ចុះ​ពិនិត្យ​ជា​ទៀងទាត់ លើ​ការធ្វើ​អាជីវកម្ម​ខ្សាច់​នៅ​ខេត្ត​កោះកុង​នេះ ដោយ​មិន​មាន​ក្រុមហ៊ុន​ណា​ធ្វើ​អាជីវកម្ម​ដោយ​អាណាធិបតេយ្យ​នោះឡើយ​។​

សម្លេង​លោ​កឌិត ទីណា​

 

​បើ​តាម​ការអះអាង​ពី​សកម្មជន​ចលនា​មាតា​ធម្មជាតិ បានបញ្ជាក់​ថា ក្រុមហ៊ុន​ដែល​តែងតែ​បង្ក​ការព្រួយបារម្ភ តាមរយៈ​ការ​បូម​ខ្សាច់​នេះ បានបង្ហាញ​អាជ្ញា​បណ្ណ ដែល​ចេញ​ដោយ​ក្រសួង​ធនធានទឹក និង​ឧតុនិយម ប៉ុន្តែ​ប្រជាពលរដ្ឋ​ដឹងថា ជា​អាជ្ញា​បណ្ណ​ដែល​ផុត​សុពលភាព​។ យ៉ាងណាក៏ដោយ លោ​កឌិត ទីណា បានបញ្ជាក់​ថា ក្រសួង​នឹង​បង្ហាញ​ពី​ក្រុមហ៊ុន​បូម​ខ្សាច់​ដែលមាន​អាជ្ញា​បណ្ណ​ត្រឹមត្រូវ​នៅលើ​ទំព័​ហ្វេ​សប៊ុក​ក្រសួង ដើម្បី​បញ្ជាក់​ឲ្យបាន​ច្បាស់​។​

សម្លេង​លោ​កឌិត ទីណា

 


ព័ត៌មានផ្សេងទៀត