ក្រសួង​២​​និង​កម្លាំង​​អាវុធ​ហត្ថ​​សម្រេច​​រួម​គ្នា​​ដោះ​​ស្រាយ​​បន្ទាន់​​លើ​​បញ្ហា​​អាជីវកម្ម​​ខ្សាច់​​

25-03-2015 8:37 pm 2431

​ថ្លែង​នៅក្នុង​សន្និសីទ​សារព័ត៌មាន​ស្តីពី កិច្ចសហការ​រវាង​ក្រសួង​បរិស្ថាន និង​កងរាជអាវុធហត្ថ​លើ​ផ្ទៃ​ប្រទេស និង​ក្រសួង​រ៉ែ និង​ថាមពល ក្នុង​ការដោះស្រាយ​បញ្ហា​ការធ្វើ​អាជីវកម្ម​ខ្សាច់ និង​ពង្រឹង​ការអនុវត្ត​ច្បាប់​ស្តីពី​ការគ្រប់គ្រង និង​ការធ្វើ​អាជីវកម្ម​ធនធាន​រ៉ែ នៅ​ថ្ងៃ​ទី​២៥ មីនា​នេះ លោក​ស៊ុយ សែម រដ្ឋមន្ត្រី​ក្រសួង​រ៉ែ និង​ថាមពល បាន​មានប្រសាសន៍ថា ដើម្បី​អនុវត្ត​តាម​យុទ្ធសាស្ត្រ​កំណែ​ទម្រង់​ស៊ីជម្រៅ​លើ​គ្រប់​វិស័យ​របស់​រដ្ឋាភិបាល និង​អនុសាសន៍​របស់​លោកនាយ​ក​រដ្ឋមន្ត្រី​ហ៊ុន សែន ដែល​ស្នើ​ឲ្យ​ក្រសួង​រ៉ែ និង​ថាមពល ផ្អាក​បណ្តោះអាសន្ន ការផ្តល់​អាជ្ញាប័ណ្ណ​ថ្មី និង​ធ្វើ​ការពិនិត្យ និង​វាយតម្លៃ​ឡើងវិញ​នូវ​ក្រុមហ៊ុន ដែល​មាន​អាជ្ញា​បណ្ណ​ស្រាប់ និង​សកម្មភាព​អនាធិបតេយ្យ ជីក​យក​រ៉ែ​ទាំងឡាយ​នៅ​ទូទាំង​ប្រទេស ក្រសួង​រ៉ែ និង​ថាមពល បាន​សម្រេច​បង្កើត​ក្រុមការងារ​អធិការកិច្ច​ចំនួន​៣ ដែល​មួយ​ក្រុមៗ ដឹកនាំ​ដោយ​រដ្ឋលេខាធិការ​មួយរូប និង​មន្ត្រី​ជំនាញ​មួយ​ក្រុម​៖

 

១.​ក្រុមទី​១ ដឹកនាំ​ដោយ​លោក​ម៉េង សក្តិ​ធារ៉ា រដ្ឋលេខាធិការ ទទួលបន្ទុក​ចុះ​ត្រួតពិនិត្យ នៅ​បណ្តា​ខេត្ត​នៃ​តំបន់​ភាគ‌​ឦសាន​។​

២. ក្រុមទី​២ ដឹកនាំ​ដោយ​លោក​ហូរ វិចិត្រ រដ្ឋលេខាធិការ ទទួលបន្ទុក​ចុះ​ត្រួតពិនិត្យ នៅ​បណ្តា​ខេត្ត​នៃ​តំបន់​ភាគ​ពាយ័ព្យ​។​

៣. ក្រុមទី​៣ ដឹកនាំ ដោយ​លោក ឌិ​ត ទីណា រដ្ឋលេខាធិការ ទទួលបន្ទុក​ចុះ​ត្រួតពិនិត្យ នៅ​រាជធានី​ភ្នំពេញ ខេត្ត​កណ្តាល និង​បណ្តា​ខេត្ត​នៃ​តំបន់​ភាគ​និរតី​។​

 

​លោក​រដ្ឋមន្ត្រី​មានប្រសាសន៍​បន្ត​ថា ការបង្កើត​ក្រុម​ការងារ​អធិការកិច្ច​ទាំង​៣​ក្រុម​នេះ គឺ​ដើម្បី​ដោះស្រាយ​បញ្ហា​ចំពោះមុខ ដូចជា​ការដោះស្រាយ​បញ្ហា​ការធ្វើ​អាជីវកម្ម​ធនធាន​រ៉ែ​ខុសច្បាប់ ការចេញ​អាជ្ញា​បណ្ណ​អាជីវកម្ម​ខ្សាច់​ឲ្យបាន​ទាន់​ពេលវេលា និង​ការដោះស្រាយ​អំពី​តម្រូវការ​ទីផ្សារ​លើ​ធនធាន​ខ្សាច់​ជាដើម បន្ទាប់ពី​បាន​ចុះ​ធ្វើ​អធិការកិច្ច​ចាប់តាំងពី​ខែ​មករា ឆ្នាំ​២០១៥​មក​។​

សម្លេង​លោក​ស៊ុយ សែម​

 

​ជាមួយគ្នានេះ ក្រសួង​រ៉ែ និង​ថាមពល ក៏​បាន​ចាត់វិធានការ​មួយចំនួន​ផង​ដែរ ដើម្បី​ដោះស្រាយ​បន្ទាន់​លើ​បញ្ហា​នេះ​។ វិធានការ​ទាំងនោះ​រួមមាន​៖

 

- ការបន្ត​ពន្យា​អាជ្ញា​បណ្ណ​ដែល​មាន​ស្រាប់​នៅក្នុង​តំបន់​ដែល​បាន​សិក្សា​រួចជាស្រេច​ទៅលើ​ផល​ប៉ះពាល់​សង្គម សេដ្ឋកិច្ច និង​បរិស្ថាន​

- ចំពោះ​អាជ្ញា​បណ្ណ​ថ្មី​ក្នុង​តំបន់​ថ្មី ត្រូវតែ​មាន​ការវាយតម្លៃ និង​សិក្សា​ឲ្យបាន​ច្បាស់លាស់​ជា​មុន​សិន ទៅលើ​ផល​ប៉ះពាល់​សង្គម សេដ្ឋកិច្ច និង​បរិស្ថាន ពី​ក្រុម​ជំនាញ​បច្ចេកទេស​ដែល​ទទួលស្គាល់​ដោយ​​​​ក្រសួង​បរិស្ថាន និង​ក្រសួង​រ៉ែ និង​ថាមពល​

- ក្រសួង​ក៏​នឹង​រៀបចំ​យុទ្ធនាការ “​ឆ្មាំ​ទន្លេ​” ដើម្បី​ការពារ​ទន្លេ ប្រឆាំង​ទប់ស្កាត់​នឹង​ការធ្វើ​អាជីវកម្ម​ខ្សាច់​ខុសច្បាប់​

- បង្កើត​លេខ​ទូរស័ព្ទ​ទាន់​ហេតុ​ការ​(Hotline) ដើម្បី​ទទួលបាន​ដំណឹង​ទាក់ទង​នឹង​ការ​បូម​ខ្សាច់​អនាធិបតេយ្យ នៅតាម​សមុទ្រ ទន្លេ និង​ស្ទឹង​។​

- រៀបចំ និង​ពិនិត្យ​ឡើងវិញ​នូវ​រាល់ ការចេញ​លក្ខខណ្ឌ ក្នុង​ការផ្តល់​អាជ្ញា​បណ្ណ រួម​នឹង​ការធ្វើ​លទ្ធកម្ម​ជ្រើសរើស​អ្នកជំនាញ​បច្ចេកទេស​បរិស្ថាន ដើម្បី​ជួយ​សិក្សា​តំបន់​ដែល​អាច​ធ្វើ​អាជីវកម្ម​ខ្សាច់​បាន​ដោយ​មិន​ប៉ះពាល់​ដល់​ច្រាំងទន្លេ សមុទ្រ និង​ស្ទឹង​។​

 

​កន្លង​មក​ការ​បូម​ខ្សាច់​យ៉ាង​អនាធិបតេយ្យ ត្រូវបាន​ប្រជាពលរដ្ឋ​រស់នៅ​តាម​ដង​ទន្លេមេគង្គ​អះអាងថា បាន​បង្ក​ឲ្យមាន​ការបាក់​ស្រុត​ដី​ច្រាំងទន្លេ រលំ​ផ្ទះ​សំបែង ដែល​បង្ក​ការប៉ះពាល់​យ៉ាងខ្លាំង​ដល់​ការរស់នៅ​របស់​ពួកគាត់​។

 

​យ៉ាងណាក៏ដោយ សម្រាប់​ក្រសួង​បរិស្ថាន ដែល​មាន​ភារកិច្ច​ក្នុង​ការចួលរួម​សហកា​រ​ពង្រឹង​ការអនុវត្ត​ច្បាប់​ស្តីពី​ការគ្រប់គ្រង និង​ការធ្វើ​អាជីវកម្ម​ធនធាន​រ៉ែ​នេះ បាន​ត្រៀម​ខ្លួន​រួចរាល់​ហើយ ក្នុង​កិច្ចសហការ​ជាមួយនឹង​ក្រសួង​រ៉ែ និង​ថាមពល​។ លោក​សាយ សំ​អាល់ រដ្ឋមន្ត្រី​ក្រសួង​បរិស្ថាន បានបញ្ជាក់​ថា សម្រាប់​កិច្ច​សហការ​នេះ ក្រសួង​មាន​ភារកិច្ច​សិក្សា និង​វាយតម្លៃ​ឲ្យបាន​ច្បាស់លាស់​ទៅ​លើ​ទីតាំង​សម្រាប់​ធ្វើ​អាជីវកម្ម​ខ្សាច់​។ ការសិក្សា វាយ​តម្លៃ​នេះ ក្រសួង​នឹង​រៀបចំ​ធ្វើ​ជា​ប្រចាំ យ៉ាងហោចណាស់ ក៏​មួយឆ្នាំ​១​ម្តង​ដែរ​។​

សម្លេង​លោក​សាយ សំ​អាល់​​

 

​កិច្ចសហការ​នេះ ក៏​មាន​ការចូលរួម​ផងដែរ​ពី​កងរាជអាវុធហត្ថ​លើ​ផ្ទៃ​ប្រទេស ដែល​មាន​តួនាទី​សំខាន់​បំផុត​គឺ​ការចុះ​ការពារ​ដល់​មន្ត្រី​ក្រសួង​រ៉ែ និង​ថាមពល ក៏ដូចជា​ក្រសួង​បរិស្ថាន និង​មន្ត្រី​មួយចំនួនទៀត ដែល​មាន​ភារកិច្ច និង​តួនាទី ក្នុង​ការចុះ​ធ្វើ​អធិការកិច្ច និង​ត្រួតពិនិត្យ លើ​អាជីវកម្ម​ខ្សាច់​នេះ​។ ទន្ទឹមនឹងនេះ កង​រាជ​អាវុធ​ក៏​នឹង​ផ្តល់​ឧបករណ៍​សម្រាប់​ចុះ​ប្រតិបត្តិការ​ផងដែរ ដូចជា​អូប័រ​។ នេះ​ជា​ការបញ្ជាក់​ពី​សំណាក់​លោក​សៅ សុខា មេបញ្ជាការ​កងរាជអាវុធហត្ថ​លើ​ផ្ទៃ​ប្រទេស​។​

សម្លេង​លោក​សៅ សុខា​​

 

​គួរបញ្ជាក់​ថា បើតាម​សេចក្តីសម្រេច​របស់​រដ្ឋាភិបាល​ស្តីពី​ការ​កំណត់​គោលការ​ណ៍​ធ្វើ​អាជីវកម្ម​ខ្សាច់ គឺ​បាន​ប្រគល់​ភារកិច្ច​ជូន​ក្រសួង​រ៉ែ និង​ថាមពល ជា​អ្នកចេញ​អាជ្ញា​បណ្ណ និង​ទទួលខុសត្រូវ​គ្រប់បែបយ៉ាង លើ​ការធ្វើ​អាជីវកម្ម​ខ្សាច់​គ្រប់​ប្រភេទ ដោយ​គិត​ចាប់តាំងពី​ពេល​ដាក់​ពាក្យ​ស្នើសុំ រហូត​ដល់​ការចេញ​អាជ្ញា​បណ្ណ ។ រាល់​អាជ្ញា​បណ្ណ ដែល​បាន​ចេញ​ទាំងអស់ ក្រសួង​រ៉ែ និង​ថាមពល ត្រូវ​ចម្លង​ជូន​គណៈកម្មាធិកា​រ​គ្រប់គ្រង​ធនធាន​ខ្សាច់ និង​ក្រសួង ស្ថាប័ន​ពាក់ព័ន្ធ​ជា​កំហិត​។ មិន​អនុញ្ញាត​ឲ្យចេញ អាជ្ញា​បណ្ណ បណ្តោះអាសន្ន​ជាដាច់ខាត​។​

ដោយឡែក បើ​តាម​សេចក្តីប្រកាស​អន្តរ​ក្រសួង​រវាង​ក្រសួង​រ៉ែ និង​ថាមពល ជាមួយនឹង​ក្រសួង​សេដ្ឋកិច្ច និង​ហិរញ្ញវត្ថុ បានឲ្យដឹងថា សម្រាប់​អាជ្ញា​បណ្ណ​លើ​អាជីវកម្ម​ខ្សាច់​សំណង់ គ្រួស និង​ដីឥដ្ឋ ក្នុង​១​អាជ្ញា​បណ្ណ មានតម្លៃ​១០​លាន​រៀល​។ ក្រសួង​នឹង​ផ្តល់ជូន​អាជ្ញា​បណ្ណ​នេះ ក្នុង​រយៈពេល​៤៥​ថ្ងៃ ក្រោយ​ការ​ដាក់​ពាក្យ​ស្នើសុំ និង​មាន​សុពលភាព​មាន​រយៈពេល​២​ឆ្នាំ​។ ​បើ​តាម​របាយការណ៍រ​បស់​ក្រសួង​​រ៉ែ និង​ថាមពល បានបង្ហាញ​ថា បច្ចុប្បន្ន​អាជីវកម្ម​ខ្សាច់​នៅ​ទូទាំង​ប្រទេស ទាំង​អាជីវកម្ម​ខ្សាច់​លើក​គោក​(​ខ្សាច់​បក​) និង​ក្នុង​ទឹក​(​ខ្សាច់​សំណង់​) មាន​ចំនួន​១៤២​ក្រុមហ៊ុន ក្នុងនោះ​អាជ្ញា​បណ្ណ​ខ្សាច់​លើគោក​មាន ៣៧​អាជ្ញា​បណ្ណ និង​ខ្សាច់​ក្នុង​ទឹក​មាន​៨៦​អាជ្ញា​បណ្ណ​៕ ដោយៈ​សៅ វិសាល​

 

 


     

ព័ត៌មានផ្សេងទៀត