ស្ថានភាព​​ហិរញ្ញវត្ថុ​​ក្រិក​​កំពុង​​ស្ថិត​ក្នុង​​ភាព​គ្រោះថ្នាក់​

19-03-2015 4:39 pm 3491
លោកនាយករដ្ឋមន្រ្តីក្រិកAlexis Tsiprasនៅខាងស្តាំ លោក​​Martin Schulzនៅខាងឆ្វេង

​ស្ថានភាព​​ហិរញ្ញវត្ថុ​​ប្រទេសក្រិក​​កាន់តែ​​ទ្រុឌទ្រោម​​ទៅៗ អាច​ប្រឈម​​ទៅ​នឹង​​ការ​​ក្ស័យធន​។ បើ​តាម​ប្រធានសភា​​សហភាព​​អឺរ៉ុប​​លោក​​Martin Schulz បានឲ្យដឹង​ថា ស្ថានភាព​​ហិរញ្ញ​វត្ថុ​​ប្រទេសក្រិក​​ពេល​​នេះ​​​គឺ​ស្ថិត​​ក្នុង​ភាព​គ្រោះថ្នាក់​។ ប្រទេស​មួយ​នេះ ត្រូវការ​ប្រាក់​ប្រមាណ​ពី​២​ទៅ​៣​ពាន់​លាន​អឺរ៉ូ ដើម្បី​យក​មក​គាំទ្រ ហើយ​ទឹកប្រាក់​នោះ​ត្រូវ​ប្រមូល​ឲ្យបាន​យ៉ាង​ឆាប់រហ័ស​ជាទីបំផុ​ត បើ​មិន​ដូច្នោះ​ទេ ក្រិក​​នឹង​មិន​អាច​ជៀសផុត​ពី​ការ​ក្ស័យធន​បាន​នោះទេ ទាំង​ធនាគារ​នៅក្នុង​ប្រទេសក្រិក រួម​ទាំង​ថវិកា​ជាតិ​របស់​ក្រិក​ផងដែរ​។​

 

​ប្រធាន​សភា​អឺរ៉ុប​បាន​ថ្លែង​បែបនេះ តែ​ប៉ុន្មាន​ម៉ោង​ប៉ុណ្ណោះ គឺ​មុនពេល​ដែល​មេដឹកនាំ​សហភាព​អឺរ៉ុប ជួប​ពិភាក្សា​គ្នា​នៅ​ក្រុង​ព្រុច​សែ​ល​។ ជា​ការជួប​ពិភាក្សា​អំពី​បញ្ហា​ថវិកា ដើម្បី​សង្គ្រោះ​ប្រទេសក្រិក​។ បើ​តាម​លោក​Martin Schulz លោក​ថា​ក្រិក​ត្រូវចាយ​ប្រាក់​ច្រើន​នៅ​ចុងខែ​នេះ ដូច្នេះ ក្រិក​ត្រូវការ​លុយ​ជា​ចាំបាច់ ដើម្បី​ផ្គត់ផ្គង់​មូលនិធិ​របស់​ខ្លួន​ដែល​កំពុង​តែ​ខ្សត់ខ្សោយ​។​

 

ក្រិក​បាន​ជួប​វិបត្តិ​ផ្នែក​ហិរញ្ញវត្ថុ​កាន់តែ​ធ្ងន់ធ្ងរ មិន​ត្រឹមតែ​ជួយ​ខ្លួនឯង​មិនបាន ថែម​ទាំង​រួម​រិត​ទៅ​ដោយ​បំណុល​ជុំវិញខ្លួន​។ ក្រិក​ត្រូវ​អន្តរជាតិ​ទាមទា​រ​ឲ្យ​សងបំណុល​ដែល​ជំពាក់​មុខក្រោយ ចាប់តាំងពី​ដំណឹង​នៃ​វិបត្តិ​ហិរញ្ញវត្ថុ​ក្រិក​បានបែកធ្លាយ​។ កន្លង​មក​ប្រទេស​មួយ​នេះ​បាន​ប្រើ​លុយ​ខ្ជះខ្ជាយ ដោយ​រដ្ឋាភិបាល​បាន​កាន់​យក​គោលនយោបាយ​មួយ​គឺ ធ្វើយ៉ាងណា​ឲ្យ​ប្រជាពលរដ្ឋ​រស់នៅ​សុខ​ស្រួល ដោយ​យក​ពន្ធ​តិច និង​ផ្តល់​ប្រាក់ខែ​ខ្ពស់​ដល់​បុគ្គលិក​។​

 

​វិបត្តិ​ហិរញ្ញ​វត្ថុ​ក្រិក បាន​ទាញ​ពេលវេលា​ឲ្យ​សហភាព​អឺរ៉ុប​ជួប​ជជែក​គ្នា​កាន់តែ​ញឹកញាប់ ដើម្បី​រក​ដំណោះស្រាយ​។ ការ​ពិភាក្សាគ្នា​កាលពីពេល​កន្លង​ទៅ សហភាព​អឺរ៉ុប​បាន​ផ្តល់​អនុសាសន៍​ឲ្យ​ក្រិក ផ្លាស់​ប្តូរ​គោលនយោបាយ។ សហភាព​​អឺរ៉ុប​ថ្លែងថា ក្រិក​ត្រូវតែ​បង្កើនព​ន្ធ និង​ទម្លាក់​ប្រាក់ខែ​បុគ្គលិក ទើប​អាច​ស្ដារ​ស្ថានការណ៍​វិញ​បាន​៕

(​ដោយ​៖​អ៊ុន សុខ​ឡា​)

ព័ត៌មានផ្សេងទៀត