UN​​បង្ហាញ​​វិធាន​ការ​​ទប់​ស្កាត់​​ការ​កើន​ឡើង​​សេដ្ឋ​កិច្ច​​របស់​​ក្រុម​​អ៊ីស្លាម​​IS​

14-02-2015 1:04 am 4295

សេដ្ឋកិច្ច​របស់​ក្រុម​សកម្មប្រយុទ្ធ​អ៊ីស្លាម​IS​កំពុង​តែ​កើនឡើង​ជា​លំដាប់​ហើយ​។ កើន​ឡើង​នោះ គឺ​ដោយសារតែ​ក្រុម​អ៊ីស្លាម​IS បាន​លក់​ប្រេង​ឆៅ​ខុសច្បាប់ និង​លក់​វត្ថុ​បុរាណ​មួយចំនួន​ទៅ​ឱ្យ​អន្តរជាតិ​ជា​ដើម​​។ ការកើនឡើង​សេដ្ឋកិច្ច​នេះ​ហើយ ធ្វើ​ឱ្យ​រដ្ឋ​អ៊ីស្លាម​មាន​អំណាច ហើយ​បាន​ដើរ​គំរាម​អន្តរជាតិ ជាពិសេស​គំរាម​ដល់​អាមេរិក​ទៀត​ផង​។ បច្ចុប្បន្ន​​ក្រុម​​អ៊ី​ស្លាម​​កំពុង​តែ​​លុក​លុយ​​ដល់​​ប្រទេស​​លោក​ខាង​​លិច ដែល​ធ្វើឱ្យ​ប្រជាជន​អឺរ៉ុប​រស់នៅ​ជាមួយ​ភាពភ័យខ្លាច​បំផុត​។


​ពាក់ព័ន្ធ​នឹង​បញ្ហា​នេះ ក្រុមប្រឹក្សាសន្តិសុខ​អង្គការសហប្រជាជាតិ​កាលពី​ថ្ងៃ​ទី​១២​ខែ​កុម្ភៈ បាន​បើក​កិច្ចប្រជុំ​មួយ​ស្ដី​ពី​វិធានការ​ទប់ស្កាត់​ការកើនឡើង​សេដ្ឋកិច្ច របស់​ក្រុម​សកម្មប្រយុទ្ធ​រដ្ឋ​អ៊ីស្លាម​IS​។​ក្នុង​កិច្ចប្រជុំ​នោះ សមាជិក​ក្រុមប្រឹក្សា​សន្ដិសុខ​អង្គការសហប្រជាជាតិ​១៥​ប្រទេស បាន​ចាត់វិធានការ​ទប់ស្កាត់​ដូចជា​៖ បញ្ឈប់​ការផ្ដល់​ហិរញ្ញប្បទាន​ជា​ប្រាក់ ឬ​កម្ចី​ណាមួយ​ដល់​ក្រុម​សកម្មប្រយុទ្ធ​អ៊ីស្លាម​IS​។ មួយវិញទៀត អន្តរជាតិ​ត្រូវ​សហការ​គ្នា​ទប់ស្កាត់​ការលក់​និង​ទិញ​វត្ថុ​បុរាណ​តាមផ្លូវ​សម្ងាត់​ចេញពី​ប្រទេស​ស៊ី​រី​និង​អ៊ីរ៉ាក់ ហើយ​មួយ​ករណី​ទៀត ត្រូវ​ទប់ស្កាត់​ការទិញ​ប្រេង​ឆៅ​ខុសច្បាប់​ពី​ក្រុម​អ៊ីស្លាម​IS​ផងដែរ​។​


​ក្រៅពីនេះ អ្នកនាំពាក្យ​អគ្គលេខាធិការ​អង្គការសហប្រជាជាតិ លោក​Stephane Dujarric​បានបញ្ជាក់​ថា អន្តរជាតិ​កំពុង​តែ​ជួប​ហានិភ័យ​ពាក់ព័ន្ធ​នឹង​បញ្ហា​ជំរិត​ទារប្រាក់ បង្ក​ដោយ​ក្រុម​អ៊ីស្លាម​IS​។​ដូច្នេះ អន្តរ​ជាតិ​​ត្រូវ​តែ​បង្កើន​ការប្រុងប្រយ័ត្ន​ឱ្យ​ខ្ពស់​បំផុត​។ ម្យ៉ាងទៀត គឺ​ត្រូវ​ពង្រឹង​កងកម្លាំង​សន្តិសុខ​បន្ថែម ដើម្បី​ជៀសផុត​ពី​គ្រោះថ្នាក់​ជា​យថាហេតុ​។


​លោក​Stephane Dujarric បាន​លើកឡើង​ទៀត​ថា កាលពី​ខែ​សីហា​ឆ្នាំ​២០១៤ អង្គការសហប្រជាជាតិ​បាន​អំពាវនាវ​ឱ្យ​ធនាគារពិភពលោក បញ្ឈប់​ការផ្ដល់​ប្រាក់កម្ចី​ទៅ​ក្រុម​អ៊ីស្លាម​។ លើសពីនេះទៅទៀត អង្គការសហប្រជាជាតិ​ក៏​បាន​អំពាវនាវ​ឱ្យ​អន្តរជាតិ​រួម​គ្នា​ទប់ស្កាត់​ការទិញ​ប្រេង​ពី​ក្រុម​អ៊ីស្លាម​IS​រួចមកហើយ​ដែរ​។ ប៉ុន្តែ​យ៉ាងណា​ក៏ដោយ រហូតមកដល់​ពេលនេះ​សេដ្ឋកិច្ច​របស់​រដ្ឋ​អ៊ីស្លាម​IS​នៅ​តែ​កើន​ឡើង​​​​​ខ្លាំង​​​ដដែល​​​៕(​ដោយ​៖​លាង ធីតា​)

ព័ត៌មានផ្សេងទៀត