ប្រទេស​ក្រិក​​កំពុង​​ជួប​​វិបត្តិ​​សេដ្ឋ​កិច្ច​​ធ្ងន់​​ធ្ង​រ​​ហៅ​​លែង​​លឺ​​

09-02-2015 11:58 am 3783

ប្រទេសក្រិ​កកំពុងតែ​ជួប​វិបត្តិ​សេដ្ឋកិច្ច​យ៉ាងធ្ងន់ធ្ងរ​បំផុត​។​ការធ្លាក់​សេដ្ឋកិច្ច គឺ​ដោយសារតែ​ប្រទេស​នេះ ជំពាក់​បំណុល​សហភាព​អ៊ឺរ៉ុប និង​បណ្ដា​ប្រទេស​អន្តរជាតិ​កាន់តែ​ច្រើន​ទៅៗ​។ គោលនយោបាយ​សេដ្ឋកិច្ច​ក្នុង​ប្រទេសក្រិក​នា​ពេលកន្លងមក គឺ​មាន​ការដំឡើង​ប្រាក់ខែ​មន្ត្រីរាជការ​ទៅ​តាម​ស្ដង់ដា​អ៊ឺរ៉ុប ការសាងសង់​ស្ពាន​ទំនើប​ទៅ​តាម​ការស្នើសុំ​ពី​ប្រជាពលរដ្ឋ​។


​ការ​ផ្ដល់​ប្រាក់ខែ​បុគ្គលិក​មន្ត្រីរាជការ និង​ការស្ថាបនា​ហេដ្ឋារចនាសម្ព័ន្ធ អាច​ធ្វើទៅបាន​ដោយ​ការ​ខ្ចី​លុយ​ពី​អន្តរជាតិ​ទាំងអស់​។ តែ​បច្ចុប្បន្ន​សហភាព​អ៊ឺរ៉ុប​និង​បណ្ដា​ប្រទេស​អន្តរជាតិ លែង​អនុញ្ញាតឱ្យ​ប្រទេស​ក្រិកខ្ចី​ថវិកា​ទៀតហើយ ព្រោះ​វា​ដល់​ព្រំ​ដែន​​នៃ​ប្រាក់​ដែល​ត្រូវ​ខ្ចី​។ ដូច្នេះ​ទើប​ក្រិក​គ្មាន​ប្រាក់​ដោះស្រាយ​បញ្ហា ធ្វើឱ្យ​សេដ្ឋកិច្ច​ដាំ​ក្បាល​ចុះ​យ៉ាងខ្លាំង​។​


​ពាក់ព័ន្ធ​នឹង​បញ្ហា​នេះ នាយករដ្ឋមន្ត្រី​ក្រិកដែ​ល​ទើប​ឡើង​កាន់តំណែង​លោក Alexis Tsipras បាន​ថ្លែង​សន្ទក​ថា​លើក​ដំបូង​ក្នុង​សភា​កាលពី​ថ្ងៃ​ទី​០៨​ខែ​កុម្ភៈ​ថា លោក​ចង់ឱ្យ​ប្រទេសក្រិក​ជៀសផុត​ពី​វិបត្តិ​សេដ្ឋកិច្ច​។ ដូច្នេះ​ក្នុង​នាម​លោក​ជា​នាយករដ្ឋមន្ត្រី លោក​នឹង​ដោះស្រាយ​បញ្ហា​ឱ្យបាន​។​គម្រោង​ដោះស្រាយ​វិបត្តិ​សេដ្ឋកិច្ច​របស់​លោក​តាម​វិធីសាស្ដ្រ​ណា​នោះ នៅ​មិន​បាន​បញ្ជាក់​លម្អិត​ទេ​។ លោក​Alexis Tsipras គ្រាន់តែ​បញ្ជាក់ថា​លោក​នឹង​ធ្វើ​កំណែទម្រង់​សេដ្ឋកិច្ច​លើ​ចំណុច​ខ្លះ ។


​គួរបញ្ជាក់​ថា សហភាព​អ៊ឺរ៉ុប​និង​បណ្ដា​ប្រទេស​អន្តរជាតិ តែងតែ​ទារបំណុល​ពី​ប្រទេសក្រិក​ស្ទើរតែ​រាល់​ឆ្នាំ ប៉ុន្តែ​ប្រទេស​មួយ​នេះ​គ្មាន​សមត្ថភាព​បង់​ឡើយ​ទាំង​ការប្រាក់​និង​ដើម​បំណុល​៕(​ដោយ​៖​លាង ធីតា​)

ព័ត៌មានផ្សេងទៀត