ឡាវ​​៖រោងចក្រ​​​​អ​គ្គិស​នី​​ប្រើ​​​​ថាម​ពល​​ធ្យូង​ថ្ម​​លើក​ដំ​បូង​​​​នឹង​​​​ដំណើរ​​ការ​​នៅពាក់​កណ្តាល​​​​​​​​ឆ្នាំ​​​២០១៥​​​​​​

27-12-2014 4:31 pm 3799

 រោងចក្រអគ្គិសនីប្រើ​ថាមពល​ធ្យូងថ្ម​លើកដំបូងរបស់ឡាវ នឹង​ដាក់​ឱ្យ​ប្រើប្រាស់​នៅ​ខែមិថុនា ឆ្នាំ​២០១៥​ខាងមុខ​។ នេះបើយោងតាម​ទីភ្នាក់ងារ​ចិន​ស៊ីន​ហួរ បាន​ចេញផ្សាយ​កាលពី​យប់​ថ្ងៃ​ទី​២៦​ខែ​ធ្នូ​។

 

​​រដ្ឋ​មន្ត្រី​​ជាន់​ខ្ពស់​​ឡាវ​បានឱ្យដឹងថា រោងចក្រ​អគ្គីសនី​ប្រើ​ដោយ​ថាមពល​ធ្យូងថ្ម​នេះ អាច​ផលិត​អគ្គីសនី​បាន​ជិត​២​ពាន់​មេហ្កា​វ៉ាត់​ក្នុង​មួយ​ឆ្នាំ​។ មូលហេតុ​បង្កើត​រោងចក្រអគ្គិសនីនេះ ក្នុង​គោលបំណង ឱ្យ​ប្រ​ជា​​ជន​​ប្រើ​អគ្គីសនី​ងាយ​​ស្រួល និង​ក្នុង​តម្លៃ​ថោក​សមរម្យ ហើយ​អាច​កាត់បន្ថយ​ការនាំ​ចូល​អគ្គីសនី​ពី​ប្រទេស​ដទៃ ដែល​ធ្វើឱ្យ​មានការចំណាយ​ថវិការ​ជាតិ​ច្រើន​។


​មន្ត្រីរូបនេះបានបញ្ជាក់ទៀតថា ការបង្កើតរោងចក្រអគ្គីសនី​ឡាវ​ដំបូង​នេះ ចំណាយ​ទឹកប្រាក់ អស់​ចំនួន​៤​ពាន់​លាន​ដុល្លារ​​អា​មេ​រិក​​​។​ ក្នុង​​គ​ម្រោង​​នេះ ក្រុមហ៊ុន​ថៃ​មក​បណ្ដាក់ទុន​ជាមួយ​ឡាវ ចំនួន​៤០​ភាគ​រយ​​​ក្នុងចំណោម​ដើមទុន​សរុប ។ ចំណែកឯ ទីតាំង​រោងចក្រ​នេះ ស្ថិត​នៅ​ភាគ​ខាងជើង​ខេត្ត Xayaboury ក្នុងស្រុក​Hongsa ជិត​ព្រំដែន​ថៃ​-​ឡាវ​។


​រដ្ឋាភិបាល​ឡាវ​មាន​គម្រោង​បង្កើត​ថាមពលអគ្គីសនី​ដាក់ឱ្យ​ប្រជាជន​ប្រើប្រាស់ មាន​២​ដំណាក់កាល​ទៀត បន្ទាប់​ពី​ការដាក់​ឱ្យ​ប្រើប្រាស់​ក្នុង​ខែ​មិថុនា​ឆ្នាំ​២០១៥​ខាងមុខ​។ ដំណាក់កាល​ទី​១​ នឹង​ដាក់​ឱ្យ​ប្រើប្រាស់​នៅ ខែវិច្ឆិកា ឆ្នាំ​២០១៥ និង​ដំណាក់កាល​ទី​២ ដាក់ឱ្យ​ប្រើប្រាស់​នៅ​ខែ​មីនា ឆ្នាំ​២០១៦​ខាងមុខ​។


​ជា​ការកត់សម្គាល់ ឆ្នាំ​២០១៣-២០១៤ ឡាវ​បាន​នាំចូល​អគ្គីសនី​ពី​ប្រទេស​ដ​ទៃចំនួន​១.១៦​ពាន់​លាន​គីឡូវ៉ាត់ និង​បាន​ចំណាយ​ទឹកប្រាក់​ចំនួន ៦៣​លាន​ដុល្លារ​អាមេរិក​ក្នុង​មួយ​ឆ្នាំ ។​​ នេះ​បើ​តាម​ទិន្នន័យ​ក្រសួង​រ៉ែ​​និ​ង​​​​ថាម​ព​ល​​ឡាវ​​៕

(ដោយ៖លាង ធីតា)

ព័ត៌មានផ្សេងទៀត