ភាពចម្រូងចម្រាស​ករណី​កូរ៉េខាងជើង​ប៉ុនប៉ង​លួច​ព័ត៌មាន​វ៉ាក់សាំង​កូវី​ដ​-១៩

17-02-2021 11:41 am 191

​ក្រុម​សេវាកម្ម​ស៊ើបការណ៍​សម្ងាត់​របស់​កូរ៉េខាងត្បូង​(NIS)​បាន​និយាយ​កាលពី​ថ្ងៃ​ទី​១៦​កុម្ភៈ​ថា ពួក Hacker​កូរ៉េ​ខាងជើង​បាន​ប៉ុនប៉ង​លួច​យក​ព័ត៌មាន​ស្តីពី​វ៉ាក់សាំង​ការពារ​និង​ការព្យាបាល​ជំងឺ​កូវី​ដ​-១៩​។  ប៉ុន្តែ​ក្រុម​ស៊ើបការណ៍​សម្ងាត់​នេះ​បាន​ច្រាន​ចោល​ការអះអាង​របស់​សមាជិក​សភា​ម្នាក់​ដែលថា ក្រុមហ៊ុន​ផលិត​វ៉ាក់សាំង​Pfizer​គឺ​ជា​គោលដៅ​ពិតប្រាកដ​របស់​ក្រុម​Hacker​។ 

​កន្លងមក​លោក​Ha Tae-keung​ជា​សមាជិក​សភា និង​ជា​សមាជិក​គណៈកម្មាធិកា​រ​ស៊ើបការណ៍​សម្ងាត់​របស់​សភា​កូរ៉េខាងត្បូង​បាន​ប្រាប់​អ្នកសារព័ត៌មាន​ថា ក្រុម​សេវាកម្ម​ស៊ើបការណ៍​ជាតិ​បាន​ប្រាប់​លោក​និង​សមាជិក​សភា​ដទៃ​ទៀត​ក្នុងអំឡុង​សន្និសីទកាសែត​ឯកជន​មួយ គឺ​ប្រទេស​កូរ៉េ​ខាងជើង​បាន​លួច​ព័ត៌មាន​ពី​ក្រុមហ៊ុន​Pfizer ដើម្បី​ទទួលបាន​បច្ចេកវិទ្យា​វ៉ាក់សាំង​ការពារ​ជំងឺ​កូវី​ដ​-១៩​។​

​តែ​បន្ទាប់​ពី​លោក​Ha Tae-keung​អះអាង​ដូច្នេះ NIS​បាន​និយាយថា​ខ្លួន​មិន​បាន​បញ្ជាក់​ពី​ឈ្មោះ​ក្រុមហ៊ុន​ផលិត​វ៉ាក់សាំង​ណាមួយ​ទេ នៅពេល​ដែល​ជូនដំណឹង​ប្រាប់​សមាជិកសភា​ថា​ពួក​Hacker កូរ៉េខាងជើង​កំពុង​ស្វែងរក​ព័ត៌មាន​អំពី​វ៉ាក់សាំង​ការពារ​មេ​រោគកូ​វីដ​១៩​។ NIS​បាន​ហៅ​ការអត្ថាធិប្បាយ​របស់​លោក​Ha Tae-keung ថា​ខុស​ពី​ការពិត​។ រីឯ​លោក​Ha​បន្ថែម​ថា​ការណ៍​ដែល​NIS​និយាយ​បែប​នេះ​ទំនង​ខ្លាច​កូរ៉េខាងជើង​ខឹង​ខ្លាំង​។​

​លោក​Ha Tae-keung​នៅ​តែ​គាំទ្រ​លើ​ការអះអាង​របស់​លោក​នៅ​កាន់​សារព័ត៌មាន​The Associated Press ដោយ​និយាយ​ថា​ឯកសារ​NIS​ដែល​ត្រូវ​បាន​បង្ហាញ​បាន​និយាយ​យ៉ាងច្បាស់ កូរ៉េ​ខាងជើង​បាន​លួច​ព័ត៌មាន​អំពី​វ៉ាក់សាំង​របស់​Pfizer និង​ប៉ុនប៉ង​លួច​បច្ចេកវិទ្យា​ពី​ក្រុមហ៊ុន​វ៉ាក់សាំង​កូរ៉េ​ខាងត្បូង​និង​ក្រុមហ៊ុន​ផលិត​ឱសថ​ថែមទៀត​។​

​ដោយឡែក​លោក​Kwon Bo-young អ្នកគ្រប់គ្រង​ទំនាក់ទំនង​សាធារណៈ​នៅ​ការិយាល័យ​កូរ៉េខាងត្បូង​របស់​ក្រុមហ៊ុន​Pfizer បាន​និយាយ​នៅក្នុង​សារ​មួយ​ថា លោក​កំពុង​ពិនិត្យមើល​ការអះអាង​របស់​លោក​Ha Tae-keung ប៉ុន្តែ​លោក​មិន​បាន​ឆ្លើយតប​ភ្លាមៗ​ទៅ​នឹង​សំណើ​ដើម្បី​ផ្ទៀងផ្ទាត់​ការអះអាង​របស់​លោក​Ha​នោះទេ​៕ ដោយ​៖ បឿ សុភា​

 ពាក្យគន្លឹះ  កូរ៉េខាងត្បូងPfizerNIS

ព័ត៌មានផ្សេងទៀត