អ្នកការទូត​ជាន់ខ្ពស់​កូរ៉េខាងជើង​ម្នាក់ទៀត​រត់គេច​ទៅ​ប្រទេស​កូរ៉េខាងត្បូង​

25-01-2021 5:18 pm 743

​លោក​Ryu Hyun-woo​អគ្គរដ្ឋទូត​ស្តីទី​កូរ៉េខាងជើង​ប្រចាំ​នៅ​ប្រទេស​គុយ​វ៉ែត បាន​ភៀសខ្លួន​ជាមួយ​ក្រុមគ្រួសារ​ទៅ​រស់នៅ​ប្រទេស​កូរ៉េខាងត្បូង តាំងតែ​ពី​ខែកញ្ញា​ឆ្នាំ​២០១៩​មក​ម្លេះ​។ ការ​ភៀសខ្លួន​មកសុំ​សិទ្ធិ​ជ្រកកោន​នៅ​ប្រទេស​កូរ៉េខាងត្បូង របស់លោក​Ryu Hyun-woo​ត្រូវបាន​រក្សាទុក​ជាសម្ងាត់​តាំងពីពេល​នោះមក​។ នេះ​បើតាម​លោក​Tae Yong Ho​ដែល​ធ្លាប់ជា​ឯកអគ្គរដ្ឋទូត​រងរ​បស់​កូរ៉េខាងជើង​ប្រចាំ​នៅ​ចក្រភព​អង់គ្លេស មុនពេល​មក​រស់នៅ​ប្រទេស​កូរ៉េខាងត្បូង​ក្នុង​ឆ្នាំ​២០១៦ ហើយ​ត្រូវបាន​ជាប់ឆ្នោត​ជា​សមាជិកសភា​កូរ៉េខាងត្បូង​កាលពី​ឆ្នាំមុន​។ 

​ជាធម្មតា​កម្រ​មាន​មន្ត្រីជាន់ខ្ពស់​កូរ៉េខាងជើង​រត់ចោល​ប្រទេស​ណាស់ បើទោះបីជា​មាន​ប្រជាជន​កូរ៉េខាងជើង​ប្រហែល​១០០០​នាក់ ប្រថុយ​គ្រោះថ្នាក់​រត់​ចេញពី​ប្រទេស​ជា​រៀងរាល់ឆ្នាំ​ក៏ដោយ​។ ប្រជាជន​ដែល​រត់​រួចខ្លួន​មក​បាន គឺ​មិន​ងាយស្រួល​ទេ​។ ពួកគេ​ប្រថុយ​ក្នុងការ​រត់គេច​ដ៏​គ្រោះថ្នាក់ ឆ្លងកាត់​ព្រំដែន​ដែលមាន​ការការពា​រ​សន្តិសុខដ៏​រឹងមាំ តាម​បណ្តោយ​ព្រំដែន​ជាមួយ​កូរ៉េខាងត្បូង ឬ​បើ​ព្យាយាម​រត់គេចខ្លួន​ដោយ​ឆ្លងកាត់​ព្រំដែន​ទៅ​ប្រទេស​ចិន ដែលជា​សម្ព័ន្ធមិត្ត​កូរ៉េខាងជើង នឹង​ត្រូវគេ​ចាប់បញ្ជូន​ត្រឡប់​ទៅ​កូរ៉េខាងជើង​វិញ​។​

​បើទោះបីជា​ករណី​កម្រ តែ​លោក​Ryu Hyun-woo​មិនមែនជា​មន្ត្រីជាន់ខ្ពស់​កូរ៉េខាងជើង​ទីមួយ​ទេ ដែល​បាន​ចាកចេញ​ពី​ប្រទេស​ដ៏​ឯកោ​បំផុត​លើ​ពិភពលោក​មួយ​នេះ​។ ពោល មន្ត្រី​ចុងក្រោយ​ម្នាក់ទៀត​បន្ទាប់ពី​លោក​Ryu Hyun-woo គឺ​លោក​Jo Song Gil​ឯកអគ្គរដ្ឋទូត​ស្តីទី​កូរ៉េខាងជើង​ប្រចាំ​នៅ​ប្រទេស​អ៊ីតាលី ដែល​បាន​បាត់​ខ្លួន​ជាមួយ​ភរិយា​ពី​ស្ថានទូត ហើយ​ស្រាប់តែ​ឃើញ​រស់នៅ​ក្នុងប្រទេស​កូរ៉េខាងត្បូង​។​

​លោក​Ryu Hyun-woo​អគ្គរដ្ឋទូត​ស្តីទី​កូរ៉េខាងជើង ប្រចាំ​នៅ​ប្រទេស​គុយ​វ៉ែត​ចាប់តាំងពី​ឆ្នាំ​២០១៧ ហើយ​លោក​ត្រូវជា​កូនប្រសារ​បស់លោក​Jon Il Chun​ដែលជា​អតីត​ប្រធានការិយាល័យ​ទទួលបន្ទុក​ថវិកា​សម្ងាត់​របស់​ថ្នាក់ដឹកនាំ​កូរ៉េខាងជើង​ផងដែរ​។ យោងតាម​ការចុះផ្សាយ​ដោយ​សារព័ត៌មាន​រ៉​យ​ទ័រ ការសម្រេច​ចាកចេញ​ពី​ប្រទេស​របស់​មន្ត្រីការទូត​កូរ៉េខាងជើង មក​រស់នៅ​ប្រទេស​កូរ៉េខាងត្បូង ដើម្បី​ផ្តល់​សេរីភាព និង​ការកសាង​អនាគត​ដ៏​ប្រសើរ​សម្រាប់​កូនៗ​របស់​ពួកគេ​។ លោក​Tae Yong Ho​បាន​អំពាវនាវ​ឲ្យ​មន្ត្រី​កូរ៉េខាងជើង​ផ្សេងទៀត ដែល​កំពុង​បម្រើ​ការងារ​នៅ​ទូទាំង​ពិភពលោក បើ​មានឱកាស​គួរតែ​យក​គំរូ​តាម​ពួកលោក​៕ ដោយ​៖​អ៊ុន សុខ​ឡា​

ព័ត៌មានផ្សេងទៀត